Read SEBR SÕNGO, 1998 Vẽnegre 21 Bible Online

Vẽnegre 21 - SEBR SÕNGO, 1998 bible

Vẽnegre 21

¹Mam yãnda yĩngr paalga, la dũni paalga, bala, dẽenem yĩngrã ne dẽenem tẽngã loogame, la ko-kãsengã ka leb n be yɛs ye.

²La mam yãnda tẽn-sõngã, Zeruzalɛm paalgã sẽn yi Wẽnnaam nengẽ n sigda, la a wẽnda wa pag sẽn nags a meng a sɩd yĩnga.

³Mam wʋma koe-kãseng sẽn yi geerẽ wã n yeele: Ad Wẽnnaam yirã bee ninsaalb sʋka. Wẽnnaam na n zĩnda ne nebã. Bãmb na n yɩɩ Wẽnnaam nebã, la Wẽnnaam mengã na n paa ne bãmba.

⁴Wẽnnaam na n yẽesa nintãm fãa sẽn be b ninẽ wã. Kũum kõn leb n zĩnd ye, la sũ-sãang wall yãbre, wall toog kõn leb n zĩnd ye. Bala, dẽenem bũmbã fãa loogame.

⁵Ned ning sẽn zao geerã yeelame yaa: Ade, mam maanda bũmbã fãa paalse. La b yeel yaa: Gʋlse, bala, gom-kãensã yaa vẽenega, la b yaa sɩda.

⁶Bãmb yeela maam yaa: Maaname! Maam la Alfa la Omega, Sɩngre, la Sɛɛbo. Mam na n kõo ned ning ko-yũud sẽn tarã vɩɩm ko-bundmã zaalem.

⁷Ned ning sẽn na n tõogã pʋɩɩr na n yɩɩ a woto: Mam na n yɩɩ yẽnda Wẽnnaam, la yẽnda na n yɩɩ mam biiga.

⁸La sã n yaa ne rabɛɛmbã, la ka-tẽeb rãmbã, la tʋʋm-dẽgd maandbã, la nin-kʋʋdbã, la nin-yoaadbã, la tɩ-maandbã, la wẽn-naands pʋʋsdbã, la zĩrẽ‑be‑nebã fãa, bãmb pʋɩɩr na n yɩɩ tɩ kẽ bugum mogrẽ wã, zĩig ning kidbr sẽn dɩtã. Rẽ yaa kũum a yiib soabã.

⁹Dẽ poore, malegs a yopoe wã sẽn da zãad laas a yopoe sẽn pid ne yaoolem tood a yopoe wã ned a yembr waa n goma ne maam n yeel yaa: Wa tɩ m na n wilg-f‑la pʋg-paalã, pe-bilã pagã.

¹⁰Malɛɛkã rɩka maam m yamẽ n kẽng tãn-kãseng sẽn yaa lug‑lug zugu. La a wilga maam tẽn-sõngã sẽn yaa Zeruzalɛmã sẽn yi yĩngri, Wẽnnaam nengẽ n sigdã.

¹¹Tẽngã dag n tara Wẽnnaam zĩirã. Yẽnda ra-sãndã rag n wẽnda wa kugr sẽn be yõod wʋsg neerlem, wa kugr b sẽn boond tɩ zaspe[8] n tond wa vɛɛre.

¹²A rag n tara lal-kãseng sẽn yaa zãondgo. A rag n tara zag-noy piig la a yiibu, tɩ malegs piig la a yiib be zag-noeyẽ wã. Yʋy n da gʋls b zutu: Yaa Israyɛll buud piig la a yiibã yʋya.

¹³Zag-noy a tãab n be yaanga, t'a tãab be rɩtgo, t'a tãab be goabga, t'a tãab be nin-taoore.

¹⁴Tẽngã lalg mee yẽbgr piig la a yiib zugu, la b gʋlsa pe-bilã tẽn-tʋmdb piig la a yiibã yʋy yẽbg-kãens zutu.

¹⁵Malɛɛk ning sẽn dag n gom-a ne maamã dag n tara makdg sẽn yaa sãnem dasaare, n na n mag tẽngã ne a zag-noyã la a lalgã.

¹⁶Tẽngã ra yaa maoko, t'a woglmã ne a yalmã zem taaba. Malɛɛkã maga tẽngã ne sãnem dasaarã: Yaa kɩlo tus a yi. A woglmã ne a yalmã la a zãntlemã rag n zema taaba.

¹⁷Yẽnda maka lalgã: A yaa kãntɩɩs koabg la pis-naas la a naase, ninsaal kãntɩɩga, sẽn yaa a yembr ne malɛɛkã kãntɩɩga.

¹⁸Lalgã mee ne kugr sẽn boond tɩ zaspe, la tẽngã yaa sãnem halaal sẽn wẽnd wa vɛɛr halaale.

¹⁹Tẽngã lalgã yẽbgrã rag n nagsa ne kug buud fãa sẽn be yõodo. Pipi yẽbgrã yɩɩ ne zaspe, la yiibẽ soabã yɩɩ ne kugr sẽn boond tɩ safɩɩre, la tãabẽ soabã yɩɩ ne kugr sẽn boond tɩ kalsedoan, la naasẽ soabã yɩɩ ne kugr sẽn boond tɩ emeroode,

²⁰la a nu soabã yɩɩ ne kugr sẽn boond tɩ sadonigsi, la a yoob soabã yɩɩ ne kugr sẽn boond tɩ sardoan, la a yopoe soabã yɩɩ ne kugr sẽn boond tɩ kirzoliti, la a nii soabã yɩɩ ne kugr sẽn boond tɩ berilli, la a wɛ soabã yɩɩ ne kugr sẽn boond tɩ topaaze, la piig soabã yɩɩ ne kugr sẽn boond tɩ kirzopraaze, la piig la a yembr soabã yɩɩ ne kugr sẽn boond tɩ Iyasẽnte, la piig la a yiib soabã yɩɩ ne kugr sẽn boond tɩ ametisti.

²¹Zag-noyã piig la a yiibã yɩɩ ne kugr b sẽn boond tɩ pɛrle. Zag-noor fãa yaa kug-yende. Tẽngã soay yaa sãnem halaale, n tond wa vɛɛre.

²²Mam ka yã wẽnd-doog tẽngã pʋg ye. Bala, Zu-soab a Wẽnnaam Sẽn‑Tõe‑Fãa wã la pe-bilã me yaa tẽngã wẽnd doogo.

²³Tẽngã ka baood tɩ wĩntoog bɩ kiuug yãg beenẽ ye. Bala, Wẽnnaam ziirã kõt-a-la vẽenem, la pe-bilã yaa a fɩtla.

²⁴Soolem dãmbã na n kẽna bãmb vẽenemẽ wã, la dũni rĩm-dãmbã na n waa ne b zĩirã beenẽ.

²⁵Tẽngã zag-noy kõn pag wĩndg ye, yʋng ka na n zĩnd beenẽ ye.

²⁶B na n talla soolem dãmbã ziirã la b waoogrã n wa beenẽ.

²⁷Bũmb sẽn yaa rẽgdo, wall ned ning sẽn maan wẽnga wall a yagd zĩrẽ kõn kẽ be ye. Yaa neb nins yʋy sẽn gʋls pe-bilã vɩɩm sebrẽ wã bal n na n kẽ.