Read SEBR SÕNGO, 1998 Vẽnegre 5 Bible Online

Vẽnegre 5 - SEBR SÕNGO, 1998 bible

Vẽnegre 5

¹La mam yãnda sebr sẽn be sẽn zao-a geerã zugã nug‑rɩtgẽ. Sebrã pʋg ne a poorã fãa gʋlsame, la b sog-a-la ne sogds a yopoe.

²La mam yãnda malɛɛk sẽn tar pãng sẽn zẽkd a koɛɛg n sokdẽ yaa: Ãnda n zems tɩ sok sogdsã la a lak sebrã?

³La ned baa a yembr da ka be arzãn wall tẽng zugu, wall tẽngã tẽngr sẽn dag n tõe n lak sebrã wall a ges-a ye.

⁴La b sẽn ka yã ned baa a ye sẽn zems tɩ lak sebrã wall tɩ ges-a wã yĩnga, mam da yãbda wʋsgo.

⁵La kãsem-dãmbã ned a yembr yeela maam yaa: Da yãb ye. Ad Zʋʋda buudã gɩgemd sẽn yaa a Davɩɩd yagengã paama tõogre, n na n sok sogds a yopoe wã la a lak sebrã.

⁶La mam yãnda pe-bil sẽn yas yĩngr geerã sʋka, la bõn-vɩɩs a naasã ne kãsem-dãmbã sʋka, la a yaa wa pesg b sẽn kodge. Pe-bilã dag n tara yɩɩl a yopoe la nin a yopoe sẽn yaa Wẽnnaam sɩɩs a yopoe wã b sẽn tʋm dũniyã tɛk fãa wã.

⁷Pe-bilã waa n deega sebrã sẽn be sẽn zao-a geerã zugã nug‑rɩtgẽ wã.

⁸Pe-bilã sẽn deeg sebrã, bõn-vɩɩs a naasã ne kãsem-dãmbã pisi la a naasã wõgemda bãmb taoore, la bãmb ned kam fãa zãada pɛndg la sãnem laag sẽn pid ne tɩdar sẽn tar yũ-noogo, sẽn yaa nin-sõamyã pʋʋsgo.

⁹La bãmb da yɩɩnda yɩɩn-paalg n yetẽ: Yãmb n zems tɩ reeg sebrã la y sogs a sogdsã, bala b ra kʋʋ yãmba, la yãmb fãaga neb buud fãa pʋgẽ, goam buud fãa pʋgẽ, tẽms fãa pʋgẽ, soolem fãa pʋgẽ ne yãmb zɩɩm tɩ b lebg Wẽnnaam nebã.

¹⁰Yãmb kɩtame tɩ bãmb lebg soolem la maan-kʋʋdb tõnd Wẽnnaamã yĩnga, la bãmb na n dɩɩ naam dũni zugu.

¹¹Mam gesame la m wʋma malegs wʋsg sẽn gũbg geerã, ne bõn-vɩɩsã la kãsem-dãmbã koeese, la bãmb sõorã yaa tus piig naoor tus piiga, la tus naoor tusa.

¹²Bãmb da zẽkda b koees n yetẽ: Pe-bil ning b sẽn dag n kʋ wã zemsame tɩ reeg pãn-tõogo, arzegse, yam, pãnga, waoogre, ziiri, la pẽgre.

¹³La mam wʋma bõn-naandsã fãa sẽn be arzãna, la sẽn be tẽng zug la tẽngã tẽngre, la ko-kãsengã zugu, la bũmb nins fãa sẽn be be wã sẽn yet yaa: Sẽn zao-a geerã zugã la pe-bilã n tog ne pẽgre, la waoogre, la ziiri, la pãnga, zamaan woo zamaane.

¹⁴La bõn-vɩɩs a naasã yeelame yaa: Ãmina! La kãsem-dãmbã yĩgimdame n waoog-ba.