Read SEBR SÕNGO, 1998 Vẽnegre 7 Bible Online

Vẽnegre 7 - SEBR SÕNGO, 1998 bible

Vẽnegre 7

¹Dẽ poore, mam yãnda malegs a naas sẽn yas dũniyã kɩrems a naasã. Bãmb dag n yõka dũniyã sebd a naasã, sẽn na yɩl tɩ b ra wẽ tẽngã wall ko-kãsengã wall tɩɩg baa a yembr ye.

²La mam yãnda malɛɛk a to sẽn yi yaang n zẽkdẽ, la yẽnda ra zãada Wẽnnaam sẽn vɩ wã bãn-ningdga. Malɛɛkã zẽka a koɛɛg n kelem n yeel malegs a naasã b sẽn da kõ noor tɩ b maan tẽngã ne ko-kãsengã wẽngã yaa:

³Da maan-y tẽngã wall ko-kãsengã wall tɩɩsã bũmbu, hal tɩ tõnd paam n ning d Wẽnnaamã tʋmtʋmdbã rĩyã bãnde.

⁴La mam wʋma neb nins b sẽn ning bãndã sõore. Yaa neb tus koabg la tus pis-naas la a naase, a Israyɛll buudã fãa kambã sʋka.

⁵A Zʋʋda buudã neb b sẽn ning bãndã sõor yaa tus piig la a yiibu. A Rubɛn buudã me yaa neb tus piig la a yiibu. A Gaad buudã me yaa neb tus piig la a yiibu,

⁶a Azɛɛr buudã me yaa neb tus piig la a yiibu, a Neftali buudã me yaa neb tus piig la a yiibu, a Manaase buudã me yaa neb tus piig la a yiibu,

⁷a Sɩmyõ buudã me yaa neb tus piig la a yiibu, a Leevi buudã me yaa neb tus piig la a yiibu, a Isakaar buudã me yaa neb tus piig la a yiibu,

⁸a Zabulõ buudã me yaa neb tus piig la a yiibu, a Zozɛf buudã me yaa neb tus piig la a yiibu, a Benzame buudã me yaa neb tus piig la a yiibu.

⁹Dẽ poore, mam gesame, la mam yãnda neb kʋʋng ned sẽn ka tõe n sõd n sɛ ye. Bãmb yii soolem dãmbã fãa pʋse, buud toay-toayã fãa pʋse, tẽms toay-toayã fãa pʋse, la sẽn gomd goam buud toay-toayã. Bãmb dag n yera fu-peelse, la b zãad koms vãad b nusẽ n yas geerã taoore, la pe-bilã taoore.

¹⁰Bãmb dag n zẽkda b koees ne pãng n yetẽ: Fãagrã bee ne tõnd Wẽnnaam sẽn zao geerã zugã, la ne pe-bilã.

¹¹La malegsã fãa ra yas n gũbga geerã ne kãsem-dãmbã la bõn-vɩɩs a naasã. Bãmb wõgemdame n fõgen b nens tẽng geerã taoor n waoog Wẽnnaam

¹²n yetẽ yaa: Ãmina! Pẽgre, la ziiri, la yam la bark pʋʋsgo, la waoogre, la pãn-tõogo, la pãng yaa tõnd Wẽnnaamã n so zamaan woo zamaana! Ãmina!

¹³Dẽ, kãsem-dãmbã ned a yembr gomame n sok maam yaa: Neb nins sẽn yeelg fu-peelsã yaa ãnda rãmba, la b yita yɛ?

¹⁴Mam leoka yẽnda yaa: M zu-soaba, yãmb n mi. La a yeela maam yaa: Yaa neb nins sẽn yi to-kãsengã pʋgẽ wã. Bãmb pegsa b fut pe-bilã zɩɩmẽ tɩ b lebg peelse.

¹⁵Yaa woto yĩng n kɩt tɩ b be Wẽnnaam geerã taoore, n tʋmd Wẽnnaam tʋʋmd wĩndg la yʋng bãmb roogã pʋgẽ. Ned ning sẽn zao-a geerã zugã na n ninga bãmb b fu‑roogã pʋga.

¹⁶Kom kõn leb n yõk-ba, ko-yũud kõn leb n yõk-ba, la wĩntoogo, wall tʋʋlg kõn leb n wẽ-b ye.

¹⁷Bala, Pe-bilã sẽn be geerã sʋkã na n dɩlga bãmba, la b tall-b n kẽng vɩɩm ko-bunds zĩisẽ, la Wẽnnaam na n yẽesa bãmb nintãmã fãa.