Read SEBR SÕNGO, 1998 A Ruti 4 Bible Online

A Ruti 4 - SEBR SÕNGO, 1998 bible

A Ruti 4

¹Dẽ, a Boaaz kẽnga tẽnga noor n tɩ zĩndi. La mikame, tɩ yẽnda sẽn dag n gom ned ning yell n yeel t'a tog n deega a Rutã n loogd be. La a Boaaz yeel-a lame: «Kolg ka wɛ m ned sõngo, wa zĩndi.» La yẽnda kolgame n zĩndi.

²Dẽ, a Boaaz kosa tẽnga nin-kẽemb piiga, tɩ b wa zĩnd ne-ba, la b wa n zĩndame.

³Woto, a Boaaz yeela raoã yaa: «A Naoomi sẽn yi Moaab n wa wã rat n koosa pʋʋg ninga tõnd ba-biig a Elimelɛk sẽn dag n so wã.

⁴Dẽ, mam tagsame tɩ yaa sõama, tɩ tẽngã kãsem-dãmbã, ne neb nins sẽn be ka wã nifẽ, bɩ m wilg-fu, tɩ sã n ta f yam, bɩ f reeg pʋʋgã n da! Sã n mikame tɩ fo rata pʋʋgã n da, bɩ f ra! La f sã n ka rat-a, bɩ f togs-ma. Bala, fo sẽn yãk f toogo, yaa maam n pʋgde.» La a leokame tɩ yẽnda na n daame.

⁵Dẽ, a Boaaz yeelame: «Yell kae ye, la yaa f bãng tɩ daar ning fo sẽn na n da pʋʋgã a Naoomi nengẽ wã, fo tog n kell n peega Moaab bi-pugl a Rut n maan f paga, sẽn na n yɩlẽ tɩ pʋʋg ning a sɩdã sẽn ki n basã kell n yɩ a buudã rẽnda t'a yʋʋrã ra menem ye.»

⁶Rao ning sẽn dag n tog n da-a pʋʋgã yeelame: «Sã n yaa woto, mam ka na n tõog n da-a ye, bɩ fo mengã reeg-a n da. Mam zoeta m na wa sãam m paoongã.»

⁷Sã n yaa ne pĩndã, Israyɛll nebã rag n tara miningu, tɩ ned sã n dat n yao n deeg bũmbu, wala a tek-a ne bũmb a to, sẽn na n yɩlẽ tɩ yell ra wa zĩndi, ned a ye n yãkd a neoodr n kõ a to wã, n na n gãneg raagã. Woto dag n yaa rog-n-mik Israyɛll pʋgẽ.

⁸La ned ning sẽn dag n tog n da pʋʋgã yeela a Boaaz yaa: «Fo tõe n daa pʋʋgã.» La yẽnda yãka a neoodrã n kõ a Boaaze.

⁹Dẽ, a Boaaz yeela kãsem-dãmbã ne neb nins fãa sẽn be beenẽ wã yaa: «Dũndã, yãmb yaa mam kaset-dãmb tɩ mam deega a Elimelɛk ne a Kilyõ, la Maklõ sẽn dag n so wã fãa n da a Naoomi nengẽ.

¹⁰La mam kell n naag n deega Moaab bi-pugl a Rut sẽn dag n yaa a Maklõ pagã n maan m paga, sẽn na n yilẽ tɩ kiidã sẽn so wã tõe n yɩ buudã rẽnda, la t'a tõe n dog kamba, t'a yʋʋrã ra menem a saam-biisã sʋk ye. Dẽ, a kõn kong ned sẽn na n wa leok gomd a buudã pʋg ye. Woto wã, yãmb yaa bõn-kãng kaset-dãmb dũndã.»

¹¹Kãsem-dãmbã ne neb nins sẽn dag n zĩ tẽngã noorã yeelame: «N-yẽe! D yaa kaset-dãmba. La bɩ Sẽn-Ka-Saab kɩt tɩ pag ning sẽn na n kẽ fo zakẽ wã yɩ wa a Rasɛll la a Leya. Yaa bãmb b yiibã n yalg Israyɛll buudã. Bɩ f paoongã paas Efrata, la bɩ f yʋʋrã yi, n yɩ kãseng Betlehɛm pʋgẽ.

¹²Bɩ kamb nins Sẽn-Ka-Saab sẽn na n kõ pʋg-kãngã wã yɩ wʋsgo, wala a Zʋʋda pag a Tamaar biig a Perɛɛz buudã.»

¹³Dẽ, a Boaaz peega a Rut n maan a paga, la a kẽe ne-a, la Sẽn-Ka-Saab kɩtame t'a rɩk pʋg n dog bi-ribla.

¹⁴Woto, Betlehɛm pagbã yeela a Naoomi yaa: «Bɩ Sẽn-Ka-Saab yʋʋr paam waoogre, bala, rũndã daarã, bãmb kõo foom ned sẽn na n zã-fo. Bɩ bi-kãngã yʋʋrã yi, n yɩ kãseng Israyɛll soolmã pʋgẽ.

¹⁵Bi-kãngã na n kɩtame tɩ fo vɩɩmd ne sũ-noogo, la a zã foom f kʋʋlem wakate. Sɩd-sɩdã, fo bi-pagã tara yõod n yɩɩd raop a yopoe, a nonga foom, a leb n doga bi-ribl n kõ-fo!»

¹⁶Dẽ, a Naoomi reega biigã n mobge, la yaa yẽnda n wub-a.

¹⁷La yagsã yeelame: «A Naoomi paama bi-ribla!» La b pʋda a yʋʋr t'a Obɛɛde, la yaa a Obɛɛd n dog a Izayi, t'a Izayi rog a Davɩɩde.

¹⁸A Perɛts yagensã la woto: «A Perɛts rog a Ɛtsron,

¹⁹t'a Ɛtsron dog a Ram, t'a Ram dog a Aminadaabe.

²⁰A Aminadaab n dog a Nakõ, t'a Nakõ dog a Salma.

²¹A Salma n dog a Boaaze, t'a Boaaz rog a Obɛɛde.

²²A Obɛɛd n dog a Izayi, t'a Izayi rog a Davɩɩde.»