Read SEBR SÕNGO, 1998 1 Sãmwɛlle 10 Bible Online

1 Sãmwɛlle 10 - SEBR SÕNGO, 1998 bible

1 Sãmwɛlle 10

¹A Sãmwɛll dɩka tʋk ne kaam n pʋdg a Sayull zugã, la a mok-a n yeele: «Sẽn-Ka-Saab ninga fo zug naam kaam tɩ f lebg bãmb nebã naaba.

²Rũndã, fo sã n yi mam nengẽ, fo na n tɩ yãnda raop a yiib a Rasɛll yaoogã sẽn be Sɛlsa sẽn be Benzame soolmã toadgẽ wã sɛɛga. Bãmb na n togsa foom tɩ b yãnda bõens nins fo sẽn dag n baoodã, la fo ba wã basa bõensã yelle, n maand yɩɩr yãmb yĩng n yetẽ: Mam na n maana a wãn ne m biigã yelle?

³La fo sã n yi be n ta Taboor tɩ-kẽengã sẽn beẽ wã, fo na n sega neb a tãab tɩ b rabd Betɛll n na n tɩ waoog Wẽnnaam. Ned a yembrã tɛta bulli a tãabo, t'a yembrã zãad bur a tãabo, t'a yembrã tar reezẽ rãam ne ko-waooga.

⁴Bãmb na n pʋʋsa foom, la b rɩk bur a yiib n kõ foom tɩ f reege.

⁵Dẽ zugẽ, fo na n taa Gɩbeya sẽn yaa Wẽnnaam tãngã, sẽn yaa Filistẽ-dãmbã tãb-sik zĩigã. Fo sã n wa kẽed tẽngã, fo na n sega Wẽnnaam no-rɛɛsdb sull tɩ b yit maoongã kʋʋb zĩigẽ, tɩ b manesmã yaa no-rɛɛsdb manesem. La neb n na n be b taoor n wẽed koal ne sɩlsãgse, la wɩɩs ne pendse.

⁶Wẽnnaam Sɩɩgã na n kẽe foom la fo me na n naaga bãmb n maan no-rɛɛs manesem, la fo na n tekame n lebg ned a to.

⁷Bãn-kãens fãa sã n wa paam pidsg fo zugu, bɩ f maan bũmb nins fo sẽn tog n maanã, bala, Wẽnnaam bee ne foom.

⁸La rẽ poore, bɩ f reng maam n kẽng Gilgalle, tɩ mam na n wa paama foom beenẽ, n wa maan maand sẽn yõogd bugum ne zems-n-taar maando. Fo na n yalsa beenẽ rasem a yopoe hal tɩ mam wa wilg foom bũmb ning f sẽn na n maanã.»

⁹A Sayull sẽn yi a Sãmwɛll nengẽ wã bal yee, Wẽnnaam kõ-a-la yam-paalga, la bãn nins fãa a Sãmwɛll sẽn togsã paama pidsg badaar bala.

¹⁰A Sayull ne a tʋmtʋmdã sẽn ta Gɩbeya, Wẽnnaam no-rɛɛsdb sull n wa n seg bãmba. Wẽnnaam Sɩɩgã kẽ a Sayulli, t'a naag bãmb n maand no-rɛɛs manesem.

¹¹Neb nins fãa sẽn dag n mi a Sayullã sẽn yã t'a naaga Wẽnnaam no-rɛɛsdbã n maand no-rɛɛs manesmã, b rag n sokda taab yaa: «Bõe n tar a Kiis biig a Sayulli? Yẽnda me lebga Wẽnnaam no-rɛɛs la?»

¹²Tẽngã ned a yembr yeelame yaa: «Ãndã la Wẽnnaam no-rɛɛsdbã taoor soaba?» La bõn-kãng lebga yel-bũnd tɩ b tar n yetẽ: «A Sayull me yaa Wẽnnaam no-rɛɛs la?»

¹³A Sayull sẽn maan no-rɛɛs manesmã n sɛ, yẽnda kẽnga maoongã kʋʋb zĩigẽ.

¹⁴A Sayull baaba-bilã soka a Sayull ne a tʋmtʋmdã yaa: «Yãmb dag n kẽnga yɛɛnẽ?» A Sayull leokame: «Tõnd dag n kẽnga bõensã baoobo, la d ka yãnd-b ye. Dẽ, tõnd kẽnga a Sãmwɛll nengẽ.»

¹⁵A Sayull baaba-bilã leb n sokame: «M kot-f lame tɩ f togs maam a Sãmwɛll sẽn yeel yãmb bũmb ninga!»

¹⁶A Sayull leoka a baaba-bilã yaa: «A Sãmwɛll yeela tõnd tɩ b yãnda bõensã.» La b ka sak n togs yẽnda a Sãmwɛll sẽn gom rĩungã wɛɛngẽ wã ye.

¹⁷A Sãmwɛll boola nebã tɩ b tigim Sẽn-Ka-Saab taoor Mispa,

¹⁸la yẽnda yeela Israyɛll nebã yaa: «Ad Sẽn-Ka-Saab sẽn yaa Israyɛll Wẽnnaamã sẽn yeta: «Yaa maam n yiis Israyɛll nebã Ezɩpte. Mam fãaga yãmb Ezɩpt nebã nugẽ, la ne soolem-dãmb a taab nins fãa sẽn dag n namsd yãmbã nugẽ.

¹⁹La rũndã, yãmb kɩɩsa y Wẽnnaamã sẽn fãagd yãmb y toogã la y sũ-sãamsã pʋgẽ wã, n yetẽ tɩ b bao rĩm n kõ-y t'a soog-yã. Moasã, bɩ y kolg Sẽn-Ka-Saab taoore, buud-buudu, la roog-roogo.»

²⁰A Sãmwɛll kɩtame tɩ Israyɛll buudã fãa kolge, la Sẽn-Ka-Saab yãka Benzame buudã.

²¹La a leb n kɩtame tɩ Benzame buudã kolg roog-roogo, la b yãka a Matri roogã. Dẽ zugẽ, b yãka a Kiis biig a Sayulli. La b baoo a Sayull n ka yã ye.

²²B leb n soka Sẽn-Ka-Saab yaa: «Ned a to waa ka bɩ?» La Sẽn-Ka-Saab leokame: «A solga teedã poore.»

²³La b wudg n tɩ yiisa a Sayull beenẽ n tall n wa t'a yals nebã sʋka, la yẽnda zugã woglem dag n yɩɩda nebã fãa.

²⁴A Sãmwɛll yeela nebã fãa yaa: «Yãmb yãnda ned ning Wẽnnaam sẽn yãkã? Buudã fãa pʋgẽ, yẽnda ka tar to ye.» La nebã fãa kelmame n yeele: «Wẽnd na kaoos rĩmã!»

²⁵Dẽ, a Sãmwɛll yalsa nebã taoor n sõdg bũmb nins fãa rĩmã sẽn tar noor ne wã, la yẽnda gʋls-b-la sebr pʋgẽ n dɩgl Sẽn-Ka-Saab taoore, n yaool n kɩt tɩ ned kam fãa lebg n kuil a yiri.

²⁶A Sayull me lebg n kuila a yir Gɩbeya. La Wẽnnaam kɩtame tɩ gãndaad bãmb sẽn yãk yãag a Sayulli.

²⁷La nin-yood me n zĩnd be n dag n yetẽ yaa: «Ayii! Nin-kãngã tõe n fãag tõndo!» Bãmb paooga a Sayull n ka tol n kõ-a kũun meng ye, la a Sayull ka leok-b tɩ bũmb ye.