Read SEBR SÕNGO, 1998 1 Sãmwɛlle 12 Bible Online

1 Sãmwɛlle 12 - SEBR SÕNGO, 1998 bible

1 Sãmwɛlle 12

¹A Sãmwɛll yeela Israyɛll nebã fãa yaa: «Ade, mam kelga yãmb sẽn kos bũmb ningã fãa, n kõ yãmb rĩm t'a soog-yã.

²Moasã, ad rĩm ning sẽn na n lʋɩ yãmb taoorã. Sã n yaa ne maam, mam lebga nin-kẽema, la mam zug pelgame. La mam kambã bee ne yãmba. Mam lʋɩɩ yãmb taoor hal m yãadem wakat tɩ ta rũndã.

³Ad-m sẽn yase! Leok-y maam Sẽn-Ka-Saab ne rĩm ning bãmb sẽn yãkã taoore, tɩ b yɩ kaset rãmba. Ãnda naaf la m deeg yã? Ãnda bõang la m deeg yã? Ãnda la m maan pãnga? Ãnda la m nams yã? Ãnda kũun la m deeg yã, n mum m nin n kao a soab bʋʋd kegre? Bɩ y togs tɩ m bao n lebs a soaba.»

⁴Nebã leokame: «Yãmb ka nams tõndo, yãmb ka reeg kũun d nengẽ, la y ka reeg ned bũmb ne pãng me ye.»

⁵A Sãmwɛll leb n yeelame: «Sẽn-Ka-Saab ne rĩm ning bãmb sẽn yãkã yaa kaset rãmb dũndã, tɩ yãmb bũmb ka be m nengẽ ye.» La nebã leokame: «B yaa kaset rãmba.»

⁶A Sãmwɛll yeela nebã yaa: «Yaa Sẽn-Ka-Saab n yãk a Moyiis ne a Aarõ, la b yiis y yaab-rãmbã Ezɩpt tẽnga.

⁷Moasã, yals-y Sẽn-Ka-Saab taoore, tɩ m bʋ ne-yã, sẽn kẽed ne tɩrlem nins fãa Sẽn-Ka-Saab sẽn maan n kõ yãmb ne y yaab-rãmbã wɛɛngẽ.

⁸A Zakoob ne a nebã sẽn wa n kẽng Ezɩptã, yãmb yaab-rãmbã kelmame n kos Sẽn-Ka-Saab sõngre. La Sẽn-Ka-Saab tʋma a Moyiis ne a Aarõ tɩ b yiis bãmb Ezɩpt tẽngã, n tall-b n wa zĩ-kãngã pʋgẽ.

⁹La bãmb yĩma Sẽn-Ka-Saab sẽn yaa bãmb Wẽnnaamã yelle, tɩ Sẽn-Ka-Saab bas-b Hatsoor tẽngã tãb-biis naab a Sisera nugẽ, ne Filistẽ-dãmbã, la Moaab rĩmã nugẽ, tɩ b zab n tõog-ba.

¹⁰Bãmb kelem n boola Sẽn-Ka-Saab n yeele: ‹Tõnd beegame. Bala, tõnd basa Sẽn-Ka-Saabo, n tũ Baall ne Astarte wẽn-naandsã. Bɩ y fãag tõnd d bɛɛbã nusẽ moasã, tɩ d na n tũu yãmba.› »

¹¹La Sẽn-Ka-Saab tʋma a Yeruball[3] ne a Bedan la a Zɛfte ne a Sãmwɛlle, tɩ b fãag yãmb y bɛɛb nins sẽn dag n gũbg yãmbã nugẽ, la yãmb vɩɩmda ne bãane.

¹²Moasã, yãmb sẽn yã tɩ Amo nebã naab a Nahaas wat n na n zab ne yãmbã, la yãmb sẽn yeel maam tɩ yãmb data rĩm sẽn na n soog yãmbã. Yaool n yaa Sẽn-Ka-Saab sẽn yaa yãmb Wẽnnaamã n yaa yãmb dĩma.

¹³Moasã, ad rĩm ning yãmb sẽn yãkã, ad rĩm ning yãmb sẽn kosã. Sẽn-Ka-Saab kõ-y-la rĩm t'a soog-yã.

¹⁴Yãmb sã n zoe Sẽn-Ka-Saabo, n tũ bãmb la y sak bãmb noorã, yãmb sã n ka kɩɩs Sẽn-Ka-Saab noorã, yãmb ne rĩm ning sẽn so-a yãmbã na n kell n tũu Sẽn-Ka-Saab sẽn yaa yãmb Wẽnnaamã.

¹⁵La yãmb sã n ka sak Sẽn-Ka-Saab noore, yãmb sã n kɩɩs bãmb goamã, Sẽn-Ka-Saab na n sɩbga ne y yaab-rãmbã.

¹⁶Moasã, segl-y y mens n ges bõn-kãseng ning Sẽn-Ka-Saab sẽn na n maan yãmb nifẽ wã.

¹⁷Ka bɩle tigsg wakat la woto sɩda? Mam na n kosa Sẽn-Ka-Saab tɩ b tʋm sa-kelems ne saaga. Dẽ, yãmb na bãng tɩ y sẽn kos Sẽn-Ka-Saab tɩ y rata rĩmã yaa wẽng Sẽn-Ka-Saab nifẽ.

¹⁸A Sãmwɛll kelem n boola Sẽn-Ka-Saabo, la b kɩtame tɩ sa-kelems zĩndi tɩ saag ni badaare, la Sẽn-Ka-Saab ne a Sãmwɛll dabeem yõka nebã fãa.

¹⁹Nebã fãa yeela a Sãmwɛll yaa: «Pʋʋs-y Sẽn-Ka-Saab sẽn yaa y Wẽnnaamã, tõnd sẽn yaa y tʋmtʋmdbã yĩnga, tɩ d ra ki ye. Bala, tõnd paasa d yel-wẽnã sõore, tõnd sẽn kos tɩ d rata rĩmã yĩnga.»

²⁰A Sãmwɛll yeela nebã yaa: «Da zoe-y rabeem ye. Yaa sɩd tɩ yãmb maana wẽnga, la ra wẽnemd-y n bas-y Sẽn-Ka-Saab ye. Sak-y bãmb ne y sũyã fãa.

²¹Da bʋdg-y n bas-y bãmba, n tɩ tũ bõn-zaals sẽn ka nafde, la sẽn ka fãagd ye. Bala, b yaa bõn-zaals sẽn ka tar yõodo.

²²Sẽn-Ka-Saab yʋʋrã sẽn yaa kãsengã yĩnga, b ka na n bas b nebã ye. Bala, taa Sẽn-Ka-Saab yam tɩ b yãk yãmb tɩ y lebg bãmb nebã.

²³Mam kõn tol n bas n ka pʋʋs Sẽn-Ka-Saab yãmb yĩnga, n wa beeg bãmb ye. Mam na n zãmsa yãmb sor sẽn yaa sõama, la tɩrga.

²⁴La bũmb sẽn be bala, bɩ y zoe Sẽn-Ka-Saabo, la y tũ bãmb ne sɩda, la ne y sũyã fãa. Ges-y bõn-kãsems nins bãmb sẽn maan yãmb sʋkã.

²⁵La yãmb sã n maan wẽnga, b na n sãama yãmb ne y rĩmã.»