Read SEBR SÕNGO, 1998 1 Sãmwɛlle 16 Bible Online

1 Sãmwɛlle 16 - SEBR SÕNGO, 1998 bible

1 Sãmwɛlle 16

¹Sẽn-Ka-Saab yeela a Sãmwɛll yaa: «Fo na n yãba a Sayull yĩng hal tɩ ta dabʋre? Mam zãgsame t'a ka na n leb n yɩ Israyɛll rĩm ye. Pids f yɩɩllã kaam n yik n sɩng kẽnde, tɩ mam tʋmda foom a Izayi zakẽ wã Betlehɛm. Bala, mam yãnda biig a yembr yẽnda kom-dibli wã sʋk mam sẽn yãk t'a na n yɩ rĩmã.»

²A Sãmwɛll yeelame: «Mam na n maana a wãn n kẽnge? A Sayull sã n bãnge, a na kʋ maam.» Sẽn-Ka-Saab yeel-a lame: «Tall nag-sadg n kẽnge, la f yeel tɩ f waame n na n maan maoong Sẽn-Ka-Saab yĩnga.»

³La f bool a Izayi t'a wa maoongã zĩigẽ. Yaa mam mengã n na n wilg foom bũmb nins fãa fo sẽn segd n maane, la f ning soab ning m sẽn na n wilg foomã zug rĩung kaam.

⁴A Sãmwɛll maana wa Sẽn-Ka-Saab sẽn yeel t'a maan bũmb ningã. Yẽnda kẽnga Betlehɛm, la tẽngã kãsem-dãmb yiime n seg-a ne rabeem n digda, la b sok-a lame yaa: «Yaa noog tɩ y wat kaanẽ?»

⁵A Sãmwɛll leokame: «Yaa noogo. Mam waame n na n maan maoong Sẽn-Ka-Saab yĩnga. Yɩlg-y y mens n tũ maam tɩ d kẽng maoongã zĩigẽ.» A Sãmwɛll kɩtame t'a Izayi ne a kambã me yɩlg b mense, t'a peeg-b n kẽng maoongã zĩigẽ.

⁶La bãmb sẽn ta beenẽ, a Sãmwɛll gesa a Eliyaab n tags a sũurẽ yaa: «Hakɩɩka, yaa Sẽn-Ka-Saab sẽn yãk-a soabã la sẽn be bãmb taoorã.»

⁷La Sẽn-Ka-Saab yeela a Sãmwɛll yaa: «Da ges a ra-sãndã ne a woglmã ye. Bala, mam zãgs-a lame. Sẽn-Ka-Saab ka get wa ninsaal sẽn getã ye. Ninsaal geta sẽn be ra-sãnde, la Sẽn-Ka-Saab geta sũuri.»

⁸A Izayi boola a biig a Abinadaab t'a kolg a Sãmwɛll taoore.

⁹La a Sãmwɛll yeelame: «Sẽn-Ka-Saab ka yãk bi-kãngã me ye.» Dẽ, a Izayi kɩtame t'a biig a Sama kolge, la a Sãmwɛll yeelame tɩ leb n ka yẽnda me la Sẽn-Ka-Saab yãkɩ ye.

¹⁰A Izayi kɩtame t'a kom-dibli a yopoe wã kolg a Sãmwɛll taoore, la a Sãmwɛll yeela a Izayi yaa: «Sẽn-Ka-Saab ka yãk ned ba a yembr bãmb sʋkã ye.»

¹¹La a Sãmwɛll soka a Izayi yaa: «Yaa yãmb kom-dibli wã tɛk la woto bɩ?» La yẽnda leokame: «Yao-zʋʋgã bal n kete, la a gũuda piisi.» La a Sãmwɛll yeela a Izayi yaa: «Tʋm tɩ b tɩ tall-a n wa, bala, tõnd ka na n tol n zĩndi, sã n ka yẽnda n wa ye.»

¹²Dẽ, a Izayi tʋmame tɩ b tɩ tall-a n wa. La a Davɩɩd dag n yaa moeega, t'a ninã ne a mengã be ra-sãnde. Dẽ, Sẽn-Ka-Saab yeela a Sãmwɛll yaa: «Yik n ning rĩung kaam a zugu, bala, yaa yẽnda la mam yãk yã.»

¹³A Sãmwɛll dɩka yɩɩllã ne kaamã, n pʋdg yẽnda zug a ba-biisã nifẽ. Sẽn sɩng ne badaare, Sẽn-Ka-Saab Sɩɩgã kẽ a Davɩɩde. La a Sãmwɛll yikame n lebg n leb Rama.

¹⁴Sẽn-Ka-Saab Sɩɩgã sẽn yi n bas a Sayullã, sɩ-wẽng Sẽn-Ka-Saab sẽn tʋm n wa n kẽ-a, n kẽesd-a rabeem-kãsenga.

¹⁵A Sayull tʋmtʋmdbã yeel-a lame yaa: «Sɩ-wẽng ning Wẽnnaam sẽn tʋmã kẽe yãmb n kẽesd-y rabeem-kãsengã.»

¹⁶D soaala, d kotame tɩ y kõ-d noore, tɩ d bee ka yãmb yĩnga. Tõnd na n baoo bi-bɩɩg sẽn mi kʋnd wẽebo, tɩ sɩ-wẽnsã sã n wa yik-yã, bɩ a wẽ kʋndã tɩ y paam yolsgo.»

¹⁷A Sayull leoka a tʋmtʋmdbã yaa: «M kotame tɩ y bao ned sẽn mi kʋnd wẽeb sõama n tall-a t'a wa.»

¹⁸Dẽ, yẽnda tʋmtʋmd a ye yeelame: «Mam yãnda Betlehɛm tẽng rao a Izayi biig a ye sẽn mi kʋnd wẽeb sõama. A yaa gãndaoog n mi zabr sõama, a mii goamã, a yaa ra-sãnga, la Sẽn-Ka-Saab bee ne-a.»

¹⁹A Sayull tʋma neb tɩ b tɩ yeel a Izayi t'a kõ yẽnda a biig a Davɩɩd sẽn gũud piisã.

²⁰A Izayi baoo bõanga, n zɩlg bur ne ko-waoog sẽn pid ne reezẽ rãam, n paas bulla, n tʋm a biig a Davɩɩd t'a tɩ kõ a Sayulli.

²¹A Davɩɩd sẽn ta a Sayull nengẽ, a Sayull sũurã yɩɩ noog ne-a wʋsgo, t'a kɩt t'a lebg a rakõor n zãad yẽnda zab-teedã.

²²A Sayull tʋmame tɩ b tɩ yeel a Izayi yaa: «Mam kotame tɩ f bas a Davɩɩd t'a pa ne maam, bala, a taa mam yam.»

²³Wẽnnaam sẽn tʋm sɩ-wẽng ning tɩ wa kẽ a Sayullã sã n wa namsd-a, a Davɩɩd rɩkda a kʋndã n wẽ, tɩ sɩ-wẽngã yi n bas-a.