Read SEBR SÕNGO, 1998 1 Sãmwɛlle 21 Bible Online

1 Sãmwɛlle 21 - SEBR SÕNGO, 1998 bible

1 Sãmwɛlle 21

¹A Davɩɩd yikame n looge, la a Zonatã lebg n leba tẽngã pʋga.

²A Davɩɩd kẽnga Noob maan-kʋʋd a Ayimelɛk nengẽ. La a Ayimelɛk wudg n sega a Davɩɩd ne rabeem n sok-a yaa: «Yaa a wãn tɩ f wat f yembr tɩ ned ka tũud-fu?»

³A Davɩɩd leoka maan-kʋʋd a Ayimelɛk yaa: «Yaa rĩmã n tʋm maam, la b yeelame tɩ ned ka segd n bãng bũmb ning yĩng bãmb sẽn tʋm maamã, la noor ning b sẽn kõ maamã ye. Mam yãka sɛk zĩig n wilg m nebã tɩ d na n sega taab beenẽ.

⁴La moasã, bõe rɩɩb la yãmb tara? Kõ-y-m bur a nu wall y sẽn tar bala.»

⁵Maan-kʋʋdã leoka a Davɩɩd yaa: «Mam ka tar bur-zaalg ye. Yaa Wẽnnaam doogã bur bal n be kaanẽ. Y kom-bɩɩsã sã n ka lagem ne pagb bɩ y rɩke.»

⁶A Davɩɩd leoka maan-kʋʋdã yaa: «B gɩdga tõnd tɩ d ra lagem paga, wa mam sẽn minim n maand zabr kẽnd wakatã. Dẽ, sã n yaa tɩ kom-bɩɩsã yɩlgda b teedã kẽn-zaall daar yĩnga, bõe yĩng tɩ b ka na n yɩlg b teedã rũndã daarã n yɩɩda?»

⁷Woto, maan-kʋʋdã rɩka bur ning sẽn dag n be Wẽnnaam doogẽ wã n kõ a Davɩɩde, bũmb a to sẽn dag n ka be wã yĩnga. Yaa bur ning sẽn dag n be Sẽn-Ka-Saab taoore, tɩ b yiisd-a daar fãa n ledgd ne bur-tʋʋlgã bal n dag n be.

⁸La mikame tɩ badaare, a Sayull tʋmtʋmd n dag n be Sẽn-Ka-Saab taoor beenẽ. Yẽnda rag n yaa Edom ned t'a yʋʋr boondẽ t'a Doɛɛge, n yaa a Sayull pe-kɩɩmbã naaba.

⁹A Davɩɩd soka a Ayimelɛk yaa: «Yãmb ka tar kãnd bɩ zabr sʋʋg n kõ-ma? Mam ka tõog n yals n dɩk m zabr sʋʋgã wall m zab-teedã ye. Bala, rĩmã sẽn tʋm maam tɩ m tɩ maan bũmb ningã rag n yaa yãgb yelle.»

¹⁰Maan-kʋʋdã yeela a Davɩɩd yaa: «Ad Filistẽ ned a Golyate, rao ning fo sẽn dag n kʋ Ela tɩɩsã long pʋgẽ wã sʋʋga. B vil-a-la ne fuug t'a be maan-kʋʋr fuugã poore. F sã n dat-a lame bɩ f rɩke, tɩ m ka tar a to kaanẽ ye.» A Davɩɩd yeelame: «Sʋʋg ka leb n be n yɩɩd sʋ-kãngã ye. Rɩk-y-yã-a n kõ-ma.»

¹¹Badaar bala, a Davɩɩd yikame n zoe n zãag ne a Sayulli. La yẽnda taa Gat rĩm a Akiis nengẽ.

¹²A Akiis tʋmtʋmdbã yeel-a lame: «Rẽ yĩnga, ka Israyɛll dĩm a Davɩɩd la woto sɩda? Ka yẽnda yĩng la nebã sẽn saood n yɩɩndẽ n yetẽ tɩ: ‹A Sayull kʋʋ neb tusri, t'a Davɩɩd kʋ neb tus piigã wɛ?›»

¹³Gom-kãens kẽesa a Davɩɩd rabeem, la yẽnda rag n zoeta Gat rĩm a Akiis wʋsgo.

¹⁴A Davɩɩd maana a meng wa gãeeng bãmb taoore, n wʋkd teed n sõod zagsã noyã, la a bas a kolkoodã tɩ sedgd ne a toɛɛngã.

¹⁵A Akiis yeela a tʋmtʋmdbã yaa: «Yãmb ka ne tɩ rao-kãngã yaa gãeeng sɩda? La yaa a wãn tɩ y tar-a n wat mam nengẽ?

¹⁶Rẽ yĩnga yaa gãeems n ka be kaanẽ bɩ? Bɩ yaa bõe tɩ y wat ne nin-kãngã t'a wa maand a gãeemdã mam taoore? Ned a woto kõn kẽ mam zakẽ wã ye.»