Read SEBR SÕNGO, 1998 1 Sãmwɛlle 23 Bible Online

1 Sãmwɛlle 23 - SEBR SÕNGO, 1998 bible

1 Sãmwɛlle 23

¹Daar a yembre, b wa n togsa a Davɩɩd tɩ Filistẽ-dãmbã yika zabr ne Keyila nebã, n wat n wʋkd b koodã b zeesẽ wã.

²A Davɩɩd soka Sẽn-Ka-Saab n ges yẽnda sã n tog n kẽng n tɩ zaba ne Filistẽ nebã. La Sẽn-Ka-Saab yeel-a lame t'a kẽng n tɩ zab ne-b n fãag Keyila nebã.

³La a Davɩɩd nebã yeela a Davɩɩd yaa: «Gese, tõnd sẽn be Zʋʋda kaanẽ tɩ rabeem tar tõndã, tõnd sã n kẽng Keyila n na n tɩ zab ne Filistẽ-dãmbã, na n yɩ a wãna?»

⁴A Davɩɩd leb n soka Sẽn-Ka-Saabo, la Sẽn-Ka-Saab yeel-a lame: «Yik n kẽng Keyila, tɩ mam na n kɩtame tɩ fo tõog Filistẽ-dãmbã.»

⁵A Davɩɩd ne a nebã kẽnga Keyila. Bãmb zaba ne Filistẽ-dãmbã, n tõog-b ne tõog-kãsenga, la b kãag b rũmsã. Woto, bãmb fãaga Keyila nebã.

⁶A Ayimelɛk biig a Abiyataar sẽn wa n zoet n dabd a Davɩɩd nengẽ Keyila wã t'a rag n zãada maan-kʋʋr kãsem fuugã.

⁷B tɩ togsa a Sayull t'a Davɩɩd kẽnga Keyila. A Sayull tagsame: «Wẽnnaam bas-a lame tɩ m na n paam-a. Bala, yẽnda sẽn tɩ kẽ tẽng ningã yaa tẽng sẽn tar kʋɩlems ne kʋɩlen-kuyã.»

⁸A Sayull boola a nebã fãa tɩ b sũ tãp n kẽng Keyila n na n tɩ gũbg a Davɩɩd ne a nebã.

⁹A Davɩɩd sẽn bãng t'a Sayull dat n maan-a yẽnda wẽngã, a yeela maan-kʋʋd a Abiyataar t'a rɩk maan-kʋʋr fuugã n wa.

¹⁰A Davɩɩd yeelame: «Sẽn-Ka-Saab sẽn yaa Israyɛll Wẽnnaam, mam yaa yãmb tʋmtʋmda, la mam wʋmame t'a Sayull dat n waa Keyila n wa sãam tẽngã, mam sẽn be beenẽ wã yĩnga.

¹¹Keyila pãn-soaadbã na n yõka maam n kõ a Sayull bɩ? A Sayull sɩd na n waa wa mam sẽn wʋmã bɩ? Sẽn-Ka-Saab sẽn yaa Israyɛll Wẽnnaam, m kot-y lame tɩ y leok y tʋmtʋmdã!» La Sẽn-Ka-Saab leokame t'a Sayull na n waame.

¹²A Davɩɩd sokame: «Keyila pãn-soaadbã na n yõka maam ne m nebã n kõ a Sayull bɩ?» Sẽn-Ka-Saab leokame: «Bãmb na yõka foom n kõ a Sayulli.»

¹³Dẽ, a Davɩɩd ne a nebã sẽn kolg kobs-yoobã yii Keyila n kẽng zĩig a to. A Sayull wʋmame t'a Davɩɩd zoeeme n yi Keyila, la a basame n ka leb n kẽng beenẽ ye.

¹⁴A Davɩɩd paa Zɩf we-raoogã tãms sẽgsẽ. La daar fãa, a Sayull dag n baood-a lame, la Wẽnnaam ka sak t'a paam-a ye.

¹⁵A Davɩɩd sẽn bãng t'a Sayull sɩd baood-a lame n dat n kʋ wã, a kell n paa Zɩf we-raoogã sẽn dag n be Horsa tẽngã pʋgẽ.

¹⁶Daar a yembre, a Sayull biig a Zonatã kẽnga a Davɩɩd nengẽ Horsa n na n tɩ paas-a raood Wẽnnaam pʋgẽ.

¹⁷Yẽnda yeela a Davɩɩd yaa: «Da zoe rabeem ye, m ba a Sayull ka na n paam foom ye. Yaa foom n na n lebg Israyɛll rĩmã, la maam n na n yɩ yãmb pʋgdga. M ba a Sayull meng mii bõn-kãng vẽenega.»

¹⁸Bãmb b yiibã maana kaool ne taab Sẽn-Ka-Saab taoore. A Davɩɩd paa Horsa weoogã pʋgẽ, la a Zonatã kuila a yiri.

¹⁹Zɩf neb kẽer kẽnga Gɩbeya n tɩ yeel a Sayull yaa: «A Davɩɩd solga tõnd tẽngã pʋgẽ Horsa, Hakɩla kunkubã pẽgsẽ, zĩ-koɛɛngã sẽn be nug goabgã sẽnẽ.

²⁰N-na, yãmb sã n data, bɩ y wa tɩ tõnd na n yõk-a lame n kõ-yã.»

²¹La a Sayull yeelame yaa: «Bɩ Sẽn-Ka-Saab ning y zug barka, y sẽn zoe mam nimbãanegã yĩnga.

²²M kot-y lame tɩ y lebg n kẽng n tɩ ges neere, n bãng zĩig ning a sẽn be wã, la y wa togs maam sẽn yaa ned ning n yãnd-a beenẽ. Bala, b yeela maam t'a tara sɩlem wʋsgo.

²³Bɩ y mao n bãng zĩ-solgdsã fãa. La y sã n wa bãng a sẽn be zĩig ningã vẽenega, bɩ y wa wilg-m tɩ m tũ-y n kẽnge. A sã n bee tẽngã pʋgẽ, mam na n bao-a lame, baa sã n yaa tɩlɛ tɩ mam gẽes-a Zʋʋda buudã fãa sʋka.»

²⁴La Zɩf nebã yikame n deng a Sayull n kẽng Zɩfe. A Davɩɩd ne a nebã rag n bee Mawõ we-raoogã pʋgẽ, zĩ-koɛɛngã sẽn be nug-goabgã sẽnẽ.

²⁵A Sayull ne a nebã kẽnga a Davɩɩd baoobo. B tɩ togsa a Davɩɩde, la a Davɩɩd yii pĩisã zut n tɩ zĩnd Mawõ we-raoogã pʋgẽ. A Sayull sẽn wʋm dẽ, a kẽnga Mawõ we-raoogã pʋgẽ n na n tɩ yõk a Davɩɩde.

²⁶A Sayull ne a nebã rag n bee tãngã kɩreng a yembr n kẽnda, t'a Davɩɩd ne a nebã me be kɩreng a to wã. A Davɩɩd ne a nebã rag n kẽnda tao-tao n dat n paam n põse, la a Sayull ne a nebã rag n gũbga bãmb n dat n paam n yõge.

²⁷Wakat-kãng bala, ned n wa n yeel a Sayull t'a wa tao-tao tɩ Filistẽ-dãmbã waame n dat n zab ne soolmã.

²⁸Dẽ, a Sayull basa a Davɩɩd rigbu, n na n lebg n tɩ zab ne Filistẽ-dãmbã. Rẽ kɩtame tɩ b boond zĩ-kãng tɩ Sela-Malkote, sẽn dat n togs tɩ ‹welgr pĩig kugri.›