Read SEBR SÕNGO, 1998 1 Sãmwɛlle 25 Bible Online

1 Sãmwɛlle 25 - SEBR SÕNGO, 1998 bible

1 Sãmwɛlle 25

¹A Samwɛll kiime. La Israyɛll nebã fãa tigma taab n yãb-a, la b tɩ mum-a-la a yirã Rama. Rẽ zugẽ, a Davɩɩd yikame n kẽng Paarã we-raoogã pʋgẽ.

²Rao a ye n dag n be Mawõ, n kẽnd n tʋmd Karmelle. A rag n yaa nin-kãseng n tar piis tus a tãab ne bʋʋs tusri. La yẽnda rag n bee Karmell n wõrsd a piisi.

³Rao-kãng yʋʋr la a Naballe, t'a pagã yʋʋr la a Abigayɩlle. A Abigayɩll dag n yaa pʋg-sõng la pʋg-neere, la a sɩdã rag n yaa nin-toaag n maand tʋʋm-wẽnse. Yẽnda yaa a Kalɛɛb buudã neda.

⁴A Davɩɩd zĩnda we-raoogã pʋgẽ n wʋm t'a Naball wõrsda a piisi.

⁵Dẽ, a Davɩɩd tʋma kom-bɩɩs piig tɩ b kẽng a Naball nengẽ Karmell n tɩ pʋʋs-a n sok a keelem yẽnda yʋʋr yĩnga,

⁶la b yeel-a yaa: «Bɩ yãmb ne y yirã la bũmb nins yãmb sẽn so wã fãa zĩnd ne bãane!

⁷Mam wʋmame tɩ y wõrsda y piisi, yaa woto tɩ m yeel tɩ b wa wilg-y tɩ yãmb pe-kɩɩmbã zĩnda ne tõnd la tõnd ka nams-b ye. Wakat ning fãa bãmb sẽn zĩnd ne tõnd Karmellã, b bũmb ka menem ye.

⁸Sok-y yãmb tʋmtʋmdbã n ges tɩ b na n wilg-y lame tɩ yɩ a woto. La a Davɩɩd yeelame tɩ y ges b tʋmtʋmdbã yell neere, bala, tõnd waa tigr daare! Dẽ, d kotame tɩ y bao y nug bũmb n kõ tõnd sẽn yaa yãmb tʋmtʋmdbã, ne a Davɩɩd sẽn yaa yãmb biigã.»

⁹A Davɩɩd tʋmtʋmdbã sẽn ta a Naball nengẽ, b kell n togs-a-la goam nins fãa a Davɩɩd sẽn yeelã, la b bas n gũud a Naball leokre.

¹⁰A Naball leoka a Davɩɩd tʋmtʋmdbã yaa: «A Davɩɩd la ãnda? A Izayi biig la ãnda? Rũndã-rũndã wã, yembs wʋsg n zoet n basd b zu-soben-dãmba.

¹¹Mam ka na n dɩk m dɩɩbã ne m koomã la m nemdã m sẽn segl n na n kõ m pe-wõrsdbã, n kõ neb m sẽn ka mi ye.»

¹²A Davɩɩd nebã lebg n leba a Davɩɩd nengẽ n tɩ togs-a goam nins fãa a Naball sẽn gomã.

¹³Woto, a Davɩɩd yeela a nebã fãa tɩ b rɩk b zabr sʋʋs n sẽbg[6] b seese. A Davɩɩd me rɩka a zabr sʋʋg n bobe. Neb kobs-naas n tũ a Davɩɩde, tɩ neb kobessi pa n na n gũ teedã.

¹⁴A Naball tʋmtʋmd a yembr n tɩ yeel a Naball pag a Abigayɩll yaa: «A Davɩɩd tʋma neb tɩ b yi we-raoogã pʋgẽ n wa ning tõnd soaalã barka[7], la yẽnda leng-b lame.

¹⁵Nin-bãmb yaool n maana tõnd neer wʋsgo. B ned ba a ye ka maan tõnd wẽng ye. La wakat ning fãa tõnd sẽn zĩnd ne bãmb weoogẽ wã, b ned ka reeg tõnd bũmb ba a yembr ye.

¹⁶Wakat ning fãa tõnd sẽn zĩnd ne bãmb n gũ d rũmsã, b yɩɩ wa yãgr tõnd yĩng wĩndg la yʋngo.

¹⁷Moasã, bɩ y ges yãmb sẽn na n maan bũmb ninga, bala, b zoe n yãka yam n na n sãam tõnd soaalã ne a zakã rãmba. A Naball la sẽn yaa nin-yoog tɩ ned ka tõe n gom ne-b la!»

¹⁸Dẽ, a Abigayɩll yika tao-tao n yãk bur kobessi ne reezẽ rãam ko-waoos a yiibu, la piis a nu b sẽn segle, la ka-sẽedem peoog a nu ne reezẽ-gil-koeems koabga, la kankam-koeems-gil kobessi, n zɩlg bõense.

¹⁹A Abigayɩll yeela a tʋmtʋmdbã tɩ b rengdẽ taoor t'a watẽ. La yẽnda ka yeel a sɩd a Naball tɩ bũmb ye.

²⁰Yẽnda zomba bõanga, n tũud tãngã kɩreng a ye n sigda, la a Davɩɩd ne a nebã rag n watame n tek n seg yẽnda sorã zugu.

²¹A Davɩɩd dag n yetame: «Mam sẽn gũ rao-kãngã paoongã fãa we-raoogẽ wã, t'a sẽn so wã bũmb ba a yembr ka menemã yaa zaalem bala. Mam maana yẽnda neere, la yẽnda lebsa maam wẽnga.

²²Mam sã n bas a Naball yirã bi-ribl a ye meng tɩ ta beoogo, bɩ Wẽnnaam sɩbg maam ne sɩbg-kãsenga!»

²³A Abigayɩll sẽn yãnda a Davɩɩde, a siga a bõangã zug tao-tao, n fõgen a neng tẽng a Davɩɩd taoore.

²⁴Yẽnda wõgemda a Davɩɩd taoor n yeele: «M soaala, yaa maam n konge. M kotame tɩ y sak tɩ m gom ne-yã, la y kelg y tʋmtʋmd-poakã goamã.

²⁵M kot-y lame tɩ y ra rɩk nin-yoog a Naball manesmã n ning y sũurẽ ye. Yẽnda kell n yaa wa a yʋʋrã: nabd bala. Mam ka yã neb nins yãmb sẽn tʋmã ye.

²⁶La moasã, m soaala, mam wẽenda ne Sẽn-Ka-Saab sẽn vɩ wã, la ne yãmb me, tɩ yaa Sẽn-Ka-Saab n gɩdg yãmb tɩ y ra raag zɩɩm, n bao tɩ fãag y meng ye. Bɩ yãmb bɛɛbã ne neb nins sẽn dat-b yãmb ne wẽnga lebg wa a Naballe.

²⁷Dẽ wã, m soaala, reeg-y kũun nins mam sẽn zã n wa n na n kõ yãmbã, n kõ kom-bɩɩs nins sẽn be ne yãmbã.

²⁸M kot-y lame tɩ y kõ y tʋmtʋmd-poakã sugr a beegrã yĩnga, Sẽn-Ka-Saab na n kɩtame tɩ y roogã me, bala, yãmb zabda Sẽn-Ka-Saab yĩnga. Bɩ ned da yã wẽng yãmb pʋgẽ ye.

²⁹Ned sã n yik n dat n sãam yãmba, yaa Sẽn-Ka-Saab sẽn yaa yãmb Wẽnnaamã n na n gũ yãmb vɩɩmã. La b na n lobga y bɛɛbã wa ned sẽn dɩk kugr n ning loaabgẽ n lobge.

³⁰Sẽn-Ka-Saab sã n wa maan yãmb neer wa b sẽn yeelã, n kɩt tɩ y lebg Israyɛll dĩma,

³¹yãmb ka na n maan y bãngẽ, la y sũur kõn sãam y sẽn ka raag zɩɩm zaalmã yĩnga, la y sẽn ka bao tɩ fãag y mengã yĩng ye. La Sẽn-Ka-Saab sã n wa maan m soaalã neere, bɩ y tẽeg y tʋmtʋmd-poakã yelle.»

³²A Davɩɩd yeela a Abigayɩll yaa: «Bɩ Sẽn-Ka-Saab sẽn yaa Israyɛll Wẽnnaamã, sẽn tʋm-a foom tɩ f wa seg maam dũndã daarã paam pẽgre!

³³Mam pẽgda fo yamã, bɩ f paam barka, fo sẽn gɩdg maam tɩ m ka raag ned zɩɩm n bao m meng fãagrã yĩnga.

³⁴M wẽenda ne Sẽn-Ka-Saab sẽn yaa Israyɛll Wẽnnaamã sẽn vɩ wã, sẽn gɩdg-a maam tɩ m ka maan foom wẽngã, tɩ sã n ka fo sẽn wa tao-tao n wa seg maamã, ka ne sõorã pukri, bi-ribl ba a yembr ka na n kellẽ a Naball zakã pʋgẽ ye.»

³⁵A Davɩɩd reega kũunã a Abigayɩll sẽn wa ne wã, la a yeel-a yaa: «Lebg n kuil ne bãane, bala, mam kelga f koɛɛgã, la m saka f sẽn kosã.»

³⁶A Abigayɩll sẽn lebg n ta a Naball yiri, a mikame t'a maanda tigr wa rĩm tigri. A Naball sũurã rag n yaa noog hal wʋsgo. Yẽnda yũu reezẽ rãam t'a neng yilimdẽ. La a Abigayɩll ka togs-a baa fɩ, hal tɩ beoogã vẽege.

³⁷La beoogã sẽn vẽeg tɩ reezẽ rãamã yi n bas a Naballã, a pagã togs-a-la bũmb nins fãa sẽn maanã. La a Naball pɛlengã yɩkame t'a sobg n gãe.

³⁸La rasem piig rẽ zugẽ, Sẽn-Ka-Saab wẽ a Naball t'a ki.

³⁹A Davɩɩd sẽn wʋm t'a Naball kiime, yẽnda yeelame: «Bɩ Sẽn-Ka-Saab paam pẽgre! Bala, bãmb doka mam sũur ne a Naballe, a sẽn paoog maamã yĩnga, la b gɩdg maam tɩ m ka maan wẽng ye! Sẽn-Ka-Saab kɩtame tɩ wẽng ning a Naball sẽn maanã leb-a.» Dẽ poore, a Davɩɩd tʋma neb tɩ b tɩ wilg a Abigayɩll t'a rat-a lame n maan a paga.

⁴⁰A Davɩɩd tʋmtʋmdbã kẽnga a Abigayɩll nengẽ Karmell n tɩ yeele: «A Davɩɩd n tʋm tõnd tɩ d wa peeg-f n wa t'a maan a paga.»

⁴¹A Abigayɩll fõgna a neng tẽng n yeele: «Ad-ma, mam yaa yãmb tʋmtʋmd-poaka. Mam na n tũume n tɩ waasd m soaalã tʋmtʋmdb nao.»

⁴²A Abigayɩll yika tao-tao n zomb bõanga, la yem-pogs a nu n tũ yẽnda. Bãmb tũ a Davɩɩd tʋmtʋmdbã, la a Abigayɩll tɩ lebga a Davɩɩd paga.

⁴³A Davɩɩd peega Zizreyɛll tẽng bi-pugl a Ayinoam me n maan a paga, la bãmb b yiibã fãa lebga a Davɩɩd pagba.

⁴⁴A Sayull dɩka a biig a Mikall sẽn dag n yaa a Davɩɩd pagã n kõ Galim ned a Layiis biig a Palti t'a maan a paga.