Read SEBR SÕNGO, 1998 1 Sãmwɛlle 31 Bible Online

1 Sãmwɛlle 31 - SEBR SÕNGO, 1998 bible

1 Sãmwɛlle 31

¹Filistẽ-dãmbã yika zabr ne Israyɛll nebã Gilboa tãngã zugu, la yɩɩ tɩlɛ ne Israyɛll nebã tɩ b zoe sẽn na yɩl n põs Filistẽ-dãmbã. Israyɛll neb wʋsg kii tãngã zugu.

²Filistẽ-dãmbã kolg n dɩdga a Sayull ne a kom-dibli wã, n kʋ a Zonatã ne a Abinadaab la a Malki-Suwa sẽn yaa a Sayull kom-dibli wã.

³Sẽn sɩng ne wakat-kãnga, zabrã wa n lebga a Sayull bal la b baooda. Tãb-tãoodbã yãnd-a lame, la rabeem yõk-a lame t'a rigd hal wʋsgo.

⁴La a Sayull yeela bi-bɩɩg ning sẽn dag n zãad-a yẽnda zab-teedã yaa: «Wõog f sʋʋgã n kõs-m n kʋ, tɩ nin-bãmbã sẽn ka kẽ bãongã ra wa yaal-m n yaool n kʋ-m ye.» La bi-bɩɩg ning sẽn dag n zãad-a yẽnda zab-teedã ka sak ye. Bala, rabeem dag n tar-a lame. Dẽ, a Sayull dɩka a sʋʋgã n tilg n bas a meng n lʋɩ a zugu.

⁵Bi-bɩɩg ning sẽn dag n zãad-a a Sayull zab-teedã sẽn yã t'a Sayull kiime, yẽnda me rɩka a sʋʋgã n tilg n bas a meng n lʋɩ a zug n ki.

⁶Yɩɩ woto la a Sayull ne a kom-dibli a tãabã, la a sẽn dag n zãad-a yẽnda zab-teedã ne a nebã fãa naag taab n ki badaare.

⁷Israyɛll nebã sẽn be Zizreyɛll longã sẽnẽ wã ne neb nins sẽn be Zʋrdẽ kʋɩlgã rʋʋndã sẽn yã tɩ Israyɛll nebã zoeeme, la t'a Sayull ne a kambã kiime wã, bãmb basa b tẽmsã n zoe, la Filistẽ-dãmbã tɩ zĩnda tẽn-kãens pʋsẽ.

⁸Vẽkembeoogo, Filistẽ-dãmbã wa n wʋka sẽn ki-bã teedo, la bãmb yãnda a Sayull ne a kom-dibli wã sẽn ki n dɩg Gilboa tãngã zugu.

⁹Dẽ, bãmb fiuuga a Sayull zugã, la b yees a zab-teedã. La b tʋma neb tɩ b kẽng Filistẽ-dãmbã tẽms pʋsẽ n tɩ togs koe-noogã b bõn-naandsã rotẽ ne b nebã fãa.

¹⁰Bãmb bĩnga a Sayull zab-teedã Astarte-rãmbã roog pʋgẽ, la b yagl a kũumã Bɛt-Sam lalgã zugu.

¹¹Galaad-Yabɛɛs nebã sẽn wʋm bũmb nins Filistẽ-dãmbã sẽn maan a Sayullã,

¹²b gãndaadã fãa yikame n kẽn yʋngã tõre, n tɩ sik a Sayull ne a kambã kũum Bɛt-Sam lalgã zugu, n tall-b n kẽng Yabɛɛs n tɩ yõog bugum.

¹³Dẽ, bãmb wʋka b kõabã n tɩ mum Yabɛɛs tɩɩgã tẽngre, la b loe noor dasem a yopoe.