Read SEBR SÕNGO, 1998 1 Sãmwɛlle 4 Bible Online

1 Sãmwɛlle 4 - SEBR SÕNGO, 1998 bible

1 Sãmwɛlle 4

¹A Sãmwɛll goamã rag n yaa Israyɛll nebã fãa yĩnga. Israyɛll nebã yiime n na n tɩ zab ne Filistẽ-dãmbã. Bãmb tɩ tilga b tãb-sikã Ebɛn-Ezɛɛre, tɩ Filistẽ-dãmbã tɩ tilg b tãb-sikã Afɛke.

²Filistẽ-dãmbã sũu tãpo, n teedg n na n zab ne Israyɛll nebã. Zabrã sɩngame, la Filistẽ-dãmbã tõoga Israyɛll nebã zabrã zĩigẽ, n kʋ neb sõor sẽn kolg tus a naase.

³Dẽ, Israyɛll nebã lebg n leba b tãb-sikẽ wã, la Israyɛll kãsem-dãmbã sokame: «Yaa wãn tɩ Sẽn-Ka-Saab bas tɩ Filistẽ-dãmbã tõog tõndo? Wa-y tɩ d kẽng Sɩlo n tɩ tall Sẽn-Ka-Saab kaoolã koglgã n wa. Bɩ Sẽn-Ka-Saab wa tõnd sʋka, n fãag-d d bɛɛbã nugẽ.»

⁴Woto, Israyɛll nebã tʋma neb Sɩlo tɩ b tɩ tall Sẽn-Ka-Saab kaoolã koglgã n wa. Yaa koglg ning zug Saasẽ-Pãng-Soabã sẽn zĩ serubẽ-rãmbã sʋkã. A Eli kamb a yiibã, a Ofni ne a Fineyaas rag n bee ne Wẽnnaam kaoolã koglgã.

⁵Wakat ning Sẽn-Ka-Saab kaoolã koglgã sẽn ta tãb-sikẽ wã, Israyɛll nebã fãa kaasame, la tẽngã fãa rigimdame.

⁶Filistẽ-dãmbã sẽn wʋm kaasgã, b sokame: «Yaa bõe bʋr-kãseng la sẽn yit Ebre rãmbã tãb-sikẽ wã?» La b wa n bãngame tɩ yaa b sẽn tall Sẽn-Ka-Saab kaoolã koglgã n wa b tãb-sikẽ wã yĩnga.

⁷Dẽ, rabeem-kãseng yõka bãmb tɩ b yeele: «Wẽnnaam waa tãb-sikẽ wã! Tõnd na n paama toogo, bala, yellã ka na n leb n yɩ wa pĩndã ye!

⁸Tõnd na n paama toogo! Ãnda n na n fãag tõnd Wẽnnaam sẽn tar pãn-kãseng a woto wã nugẽ? Yaa bãmb n sãam Ezɩpt nebã ne tood buud toor-toor we-raoogã pʋgẽ.

⁹Filistẽ-dãmba, keng-y y mens n yɩ raopa, n da wa lebg Ebre rãmbã yembs wa bãmb sẽn yaa yãmb yembsã ye. Bɩ yãmb yɩ raop n zabe.»

¹⁰Filistẽ-dãmbã zab n tõoga Israyɛll nebã, la Israyɛll nebã ned kam fãa zoe n kuila a yiri. Sãoongã yɩɩ kãsenga: b kʋʋ Israyɛll tãb-biis tus pis-tã.

¹¹Filistẽ-dãmbã zabame n yõk Wẽnnaam kaoolã koglgã n deege, la b kʋʋ a Eli kamb a yiibã, a Ofni ne a Fineyaase.

¹²Benzame buudã ned a yembr n yi zabrã zĩigẽ badaar n zoe n ta Sɩlo. La a futã fãa rag n pãrsame t'a zugã fãa yaa tom.

¹³Raoã taame n mik t'a Eli rag n zĩ a goeel zug sorã noore, n gũud kibare, bala, yẽnda rag n yɛɛsda kaoolã koglgã yĩnga. Raoã sẽn ta tẽngã pʋgẽ, a togsa bũmb nins sẽn maanã, la tẽngã neb fãa wiisame.

¹⁴A Eli sẽn wʋm nebã wiisgã, a sokame tɩ yaa bõe wiisg la sẽn wiisdã? La raoã zoee tao-tao n tɩ togs a Eli bũmb nins sẽn maanã.

¹⁵Wakat-kãng t'a Eli rag n tara yʋʋm pis-wɛ la a nii, la a ninã rag n ka leb n ne ye.

¹⁶Raoã yeela a Eli yaa: «Ade, mam yii zabrã zĩigẽ. Yaa rũndã la mam yi beenẽ n zoe n wa.» La a Eli sok-a lame yaa: «M biiga, yaa bõe yell n maane?»

¹⁷Raoã leokame: «Ade, Filistẽ-dãmbã riga Israyɛll nebã tɩ b zoe, la nebã paama sãoong-kãsenga. Baa yãmb kamb a yiibã, a Ofni ne a Fineyaas kiime, la Filistẽ-dãmbã yõka Wẽnnaam kaoolã koglgã n deege.»

¹⁸Raoã sẽn wilg kaoolã koglgã yellã bal yee, la a Eli sẽn yi a goeelã zug n lʋɩ a zãmbɛɛl tẽngã rignoor sɛɛgẽ, t'a yublã kao t'a ki. Bala, a rag n yaa nin-kẽema, la a mengã rag n zɩsame. A Eli yɩɩ Israyɛll nebã bʋ-kaood yʋʋm pis-naase.

¹⁹A Eli biig a Fineyaas pagã rag n kẽnda ne pʋ-bɩɩng n kolg rogem. Pagã sẽn wʋm tɩ Filistẽ-dãmbã reega kaoolã koglgã, la a wʋm a sɩdã ba wã ne a sɩdã kũumã, a pʋgã yika zabr zĩig pʋgẽ, la a yĩgimdame n doge.

²⁰La toogã sẽn sãag-a t'a rat n ki wã, pagb nins sẽn dag n be ne yẽnda wã yeel-a lame: «Da zoe rabeem ye. Bala, fo roga bi-ribla.» La a ka tõog n leok tɩ bũmb ye. A ka kelg-b meng ye.

²¹Yẽnda pʋda bi-riblã yʋʋr tɩ Ikaboode, sẽn dat n togs tɩ ‹Israyɛll ziirã loogame.› A rag n goma woto, b sẽn deeg kaoolã koglgã, n paas a sɩdã ne a sɩdã ba sẽn ki wã yĩnga

²²Pagã yeelame: «Israyɛll ziirã loog n bas-a lame!» Filistẽ-dãmbã sẽn yõk Wẽnnaam kaoolã koglgã n deegã yĩngã.