Read SEBR SÕNGO, 1998 1 Sãmwɛlle 9 Bible Online

1 Sãmwɛlle 9 - SEBR SÕNGO, 1998 bible

1 Sãmwɛlle 9

¹Benzame buudã ned a ye n dag n be, t'a yʋʋr boondẽ t'a Kiisi, n yaa a Abiyɛll biiga. A Abiyɛll ba la a Seroore, t'a Seroor ba yaa a Bekorate, sẽn yaa a Afiya sẽn yaa Benzame buudã ned a yembr biiga. A Kiis rag n yaa gãndaoogo.

²A Kiis rag n tara biig t'a yʋʋr boondẽ t'a Sayulli. Israyɛll nebã fãa sʋka, bi-kãng rag n yaa bi-bɩɩg sẽn tar da-sãnd n yɩɩda, la a zugã woglem me rag n yɩɩda b fãa.

³A Sayull ba a Kiis bõn-yãans n meneme, la a Kiis yeela a biig a Sayull yaa: «M kotame tɩ f peeg tʋmtʋmd a ye, tɩ y kẽng n tɩ bao bõensã.»

⁴Dẽ, bãmb pɩʋʋga Efrayiim soolem ning sẽn be tãms sʋkã, n tɩ pɩʋʋg Salisa soolmã, la b pɩʋʋg Saalim soolmã, la b ka yã bõensã ye. Bãmb pɩʋʋga Benzame tẽngã n kell n ka yãnd-b ye.

⁵Bãmb sẽn wa n ta Suf tẽngã, a Sayull yeela a tʋmtʋmdã sẽn dag n be ne yẽnda wã yaa: «Wa tɩ d kuili, tɩ m baaba ra wa bas bõensã yell tagsgo, n maand yɩɩr tõnd yĩng ye.»

⁶Tʋmtʋmdã yeelame yaa: «Ad Wẽnnaam dao a ye n be tẽn-kãngã pʋgẽ, tɩ neb wʋsg sɩd waoogd-a. A sẽn yeel bũmb ning fãa paamda pidsgu. Wa-y tɩ d kẽng beenẽ, tɩ daar ninga, a na n wilga tõnd sor ning d sẽn segd n dɩke.»

⁷La a Sayull leoka a tʋmtʋmdã yaa: «Tõnd na n talla bõe n tɩ kõ Wẽnnaam daoã? Rɩɩb ning sẽn dag n be tõnd yondẽ wã la sẽn sɛ wã la. Tõnd leb n ka tar kũun me n na n tɩ kõ-a ye. La bõe la tõnd tar n tõe n tɩ kõ-a?»

⁸Tʋmtʋmdã leoka a Sayull yaa: «Mam tara wanzuri wakɩ-koɛɛng sẽn pʋɩ zĩis a naase. Mam na n dɩkame n kõ Wẽnnaam daoã, t'a wilg tõnd d sẽn tog dɩk sor ninga.»

⁹Hal pĩnda, Israyɛll tẽngã pʋga, ned sã n dag n dat n sok Wẽnnaam bũmbu, a yetame: «Wa-y tɩ d kẽng yãta nengẽ. Bala, bãmb dag n boonda Wẽnnaam no-rɛɛsdbã tɩ yãtba.»

¹⁰A Sayull yeela a tʋmtʋmdã yaa: «Yaa sõama! Wa tɩ d kẽnge!» La b tũu taab n kẽng tẽng ning Wẽnnaam daoã sẽn dag n beẽ wã.

¹¹Bãmb sẽn wa n kẽed tẽngã pʋgẽ, b yãnda kom-pugli sẽn yi tẽngã n dabd n na n tɩ toog koom. La b sok-b lame yaa: «Yaa ka la yãtã sẽn be wã bɩ?»

¹²La kom-pugli wã leokame: «N-yẽe! Yãtã renga yãmb taoor n wa. Kẽng-y tao-tao. B waa tẽngã pʋg rũndã. Bala, maoong maaneg n be maoongã kʋʋb zĩigẽ nebã yĩnga.

¹³Yãmb sã n kẽ tẽngã pʋgẽ, yãmb na n yãnd-b lame tɩ b nan ka rʋ maoongã kʋʋb zĩigẽ n na n dɩ ye. Bala, nebã ka na n dɩ tɩ Wẽnnaam no-rɛɛsã nan ka wa ye. Yaa bãmb n segd n ning maandã barka, tɩ nebã yaool n dɩ. Bɩ y kẽng moasã bala, tɩ y na n yãnd-a lame.»

¹⁴La wakat ning a Sayull ne a tʋmtʋmdã sẽn wa n ta tẽngã pʋgẽ wã, ade, b mikame t'a Sãmwɛll dag n yiime n dabd maoongã kʋʋb zĩigẽ, la Sãmwɛll yi n seg-b lame.

¹⁵A Sayull waoongã ket tɩ beoogo, Sẽn-Ka-Saab rag n zoe n keooga a Sãmwɛll n yeele:

¹⁶«Beoog woto wẽnde, mam na n tʋma Benzame buudã rao a yembr fo nengẽ, la fo na n ninga a zug rĩung kaam t'a lebg Israyɛll sẽn yaa mam nebã rĩmã. Yẽnda na n fãaga mam nebã Filistẽ-dãmbã nusẽ, bala, mam yãnda m nebã namsgã, la m wʋma b kɛlengã.»

¹⁷A Sãmwɛll sẽn yã a Sayullã wakate, Sẽn-Ka-Saab yeela a Sãmwɛll yaa: «Ad rao ning yell mam sẽn dag n gom ne foomã. Yaa yẽnda n na n soog mam nebã.»

¹⁸A Sãmwɛll sẽn wa n be tẽngã noorã, a Sayull kolg-a lame n sok-a yaa: «M soaala, m kotame tɩ y wilg-m yãtã yir sẽn be zĩig ninga.»

¹⁹A Sãmwɛll leoka a Sayull yaa: «Yaa maam la yãtã. Wa tũ maam tɩ d rʋ maoongã kʋʋb zĩigẽ. Yãmb na n naaga maam n dɩ rũndã, la beoog yibeoogo, mam na n wilga foom bũmb ning fo sẽn dat n bãngã, la m yaool n kõ-f sor tɩ f kuili.

²⁰Da maan yɩɩr ne f bõensã sẽn menem dasem a tãab rũndã wã ye. Bala, b yãnd-b lame. Ãndã soab n na n soog Israyɛll bõn-sõamyã fãa? Ka foom ne f ba wã zak rãmb fãa la?»

²¹A Sayull leokame: «Mam yaa Benzame buudã neda, la Israyɛll buudã sʋka, ka tõnd buudã n yaa bilf n yɩɩd sɩda. Benzame buudã pʋgẽ me, ka tõnd doogã neb n yaa bilf n yɩɩda? La yɩta a wãn tɩ yãmb gomd ne maam a woto?»

²²A Sãmwɛll peega a Sayull ne a tʋmtʋmdã n tall-b n kẽes rɩɩbã roogẽ, n zĩnig bãmb neb pis-tã wã b sẽn dag n boolã taoore.

²³A Sãmwɛll yeela rɩ-segendã t'a wa ne nemd ning yẽnda sẽn dag n kõ-a t'a bĩng toorã.

²⁴Rɩ-segendã talla gerã ne a nemsã zãng n wa rɩgl a Sayull taoore. La a Sãmwɛll yeela a Sayull yaa: «Ad nemdã tõnd sẽn bĩng foomã. Rɩk n wãbe, bala, yaa pʋɩɩr tõnd sẽn bĩng tɩ f wa lagem ne neb nins tõnd sẽn boolã n dɩ.» Woto, a Sayull naaga a Sãmwɛll n dɩ badaare.

²⁵Bãmb tũu taab n yi maoongã kʋʋb zĩigẽ n sig n kẽ tẽngã pʋga, la a Sãmwɛll dʋʋ gãsgã zug n sõs ne a Sayulli.

²⁶Vẽkembeoogã yibeoog pĩnda, zĩ-yẽegr wakate, a Sãmwɛll boola a Sayull roogã zug n yeel-a yaa: «Yik tɩ m yãag-f tɩ f looge.» A Sayull yikame, la bãmb b yiibã fãa rɩka sore.

²⁷Bãmb sẽn kẽn n ta tẽngã kɩrenga, a Sãmwɛll yeela a Sayull t'a kɩt t'a tʋmtʋmdã reng bãmb taoore. Tʋmtʋmdã sẽn looge, a Sãmwɛll yeela a Sayull t'a yals t'a wilg-a Wẽnnaam sẽn yeel bũmb ninga.