Read Morisien Mt 15 Bible Online

Mt 15 - Morisien bible

Mt 15

¹Bann Farizien ek bann dokter lalwa ki sorti depi Zerizalem koste ar Zezi e zot dir,

²“Kifer to disip pa respekte tradision nou bann gran dimoun? Zot pa lav lame avan manze.”

³Li reponn zot, “Be zot, kifer zot kas komannman Bondie akoz zot tradision?

⁴Bondie finn dir, ‘Onor to papa ek to mama; e osi, ninport kisannla ki modi so papa ek so mama, li merit lamor.’

⁵Me zot, zot dir si enn dimoun dir ar so papa ou so mama, ‘Seki mo ti kapav donn twa, mo rezerv li pou Bondie’ lerla sa dimoun la nepli bizin onor so papa ou so mama.

⁶Me zot, akoz zot tradision, zot pa respekte parol Bondie.

⁷Ipokrit, Izai ti ena rezon kan li ti profetiz lor zot, kan li ti dir,

⁸‘Sa pep la onor mwa zis avek so labous, me so leker lwin ar mwa;

⁹Zot lapriyer pena valer, parski zot ansegn doktrinn bann imin.’ ”

¹⁰Zezi apel lafoul e li dir, “Tande e konpran bien,

¹¹seki enn dimoun met dan so labous pa kapav rann li inpir, me seki sorti dan so labous, samem ki rann li inpir.”

¹²Lerla so bann disip aprose e dir li, “Eski to kone ki bann Farizien ofanse kan zot tann twa koz koumsa?”

¹³Li reponn, “Tou bann plant ki mo papa pa finn plante pou derasine.

¹⁴Les zot trankil; zot kouma enn lider aveg ki pe diriz bann aveg. E si enn aveg diriz enn lot aveg, toulede pou tom dan trou.”

¹⁵Me Pier dir li, “Explik nou sa parabol la.”

¹⁶Li dir, “Eski zot pankor konpran zot osi?

¹⁷Zot pa trouve ki seki rant dan labous, li al dan vant e apre sa li sorti deor, li elimine?

¹⁸Me seki sorti dan labous sorti dan leker, samem ki rann nou inpir.

¹⁹Parski dan leker sorti bann move lintansion, kouma fer krim, adilter, move lavi, kokin, mansonz ek palab.

²⁰Sa bann kiksoz la ki rann dimoun inpir, me manz avek lame pa lave pa rann enn dimoun inpir.”

²¹Zezi kit sa landrwa la e li al dan rezion Tir ek Sidon.

²²Enn fam Kananeenn ki sorti dan sa rezion la koumans kriye, “Pitie mwa Segner, Garson David! Mo tifi, li extra posede par enn demon.”

²³Me Zezi pa dir nanye; so bann disip vinn sipliy li, zot dir li, “Pous li, li pe swiv nou, li pe fatig nou.”

²⁴Zezi reponn, li dir, “Bondie finn avoy mwa zis pou bann brebi perdi pep Izrael.”

²⁵Me, fam la tom azenou devan Zezi e li dir, “Segner vinn sekour mwa!”

²⁶Zezi reponn li, “Li pa bon pran dipin bann zanfan pou zet ar bann tilisien.”

²⁷Fam la reponn, “Vremem, Segner, pourtan bann lisien manz bann bout dipin ki tom anba latab zot met.”

²⁸Alor Zezi dir li, “Fam, to ena enn gran lafwa; to demann pou exose.” E deswit so tifi geri.

²⁹Zezi kit sa landrwa la, li mars dan borlamer Galile, li mont lor montagn e li asize.

³⁰Enn gran lafoul vinn kot li, zot amenn bann bwate, andikape, aveg, sour-miye ek dimoun ar boukou lezot maladi ankor. Zot depoz zot devan Zezi e li geri zot tou.

³¹Lafoul ti emerveye ler zot trouv bann mie koze, bann andikape geri, bwate marse e bann aveg trouv kler; lerla zot koumans glorifie Bondie Izrael.

³²Zezi apel so bann disip e li dir, “Mo ranpli ar konpasion pou sa lafoul la. Sa fer trwa zour depi zot avek mwa e zot pa finn manz nanye. Mo pa anvi ranvway zot vant vid, mo per zot gagn febles lor sime.”

³³Bann disip dir li, “Dan sa landrwa dezer la, kot nou pou gagn ase dipin pou enn lafoul parey?”

³⁴Zezi dir zot, “Komie dipin zot ena?” Zot reponn, “Set, avek detrwa tipwason”

³⁵Alor li donn lord lafoul asiz anba.

³⁶Li pran sa set dipin la ek bann pwason la, ler li fini remersi Bondie, li kas zot, li donn so bann disip e bann la partaz avek lafoul.

³⁷Tou dimoun manze vant plin e zot retourn set korbey ranpli avek bann bout ki reste.

³⁸Ti ena kat mil zom ki ti manze, san kont bann fam ek bann zanfan.

³⁹Apre ki li finn ranvway lafoul, li mont dan pirog pou al dan teritwar Magadan.