Read Morisien Mt 16 Bible Online

Mt 16 - Morisien bible

Mt 16

¹Bann Farizien ek Sadisein avans ver Zezi pou piez li. Zot dimann li enn sign depi lesiel.

²Li reponn zot, “Ler soley kouse, zot dir, ‘Pou ena botan parski lesiel rouz.’

³Boner gramatin zot dir, ‘Lapli pou tonbe zordi parski lesiel kouver.’ Zot kone kouma pou interpret sign lesiel, me zot pa kapav interpret sign letan zordi.

⁴Zenerasion move ek adilter pe dimann enn sign, me okenn sign pa pou donn li exsepte sign Zonas.” Apre sa li kit zot li ale.

⁵Ler bann disip ariv lot kote lak, zot ti finn bliye amenn dipin avek zot.

⁶Zezi dir zot, “Get bien, fer atansion ar levin bann Farizien ek Sadisein.”

⁷Zot dir ant zot, “Sirman parski nou pa finn amenn dipin.”

⁸Ler Zezi aprann tousala, li dir, “Get zot lafwa kouma feb, kifer zot panse ki zot pena dipin?

⁹Eski zot ankor san konpran? Zot pa rapel sa sink dipin ki ti nouri sink mil zom la e kantite panie plin zot ti ramase?

¹⁰Zot pa rapel sa set dipin ki ti nouri sa kat mil zom la ek sa kantite panie plin ki zot ti ramase la?

¹¹Kouma zot pa konpran ki mo pa pe koz lor dipin? Fer atansion ar levin bann Farizien ek bann Sadisein!”

¹²Lerla zot konpran ki li pa ti pe dir zot fer atansion ar levin dipin, me lansegnman ki bann Farizien ek Sadisein ti pe done.

¹³Ler Zezi ariv dan distrik Sezare-Filip, li dir so bann disip, “Ki dimoun pe dir lor Garson Limanite?”

¹⁴Zot dir li, “Enn bann dir Zan Batis, enn lot bann dir Eli e enn lot bann ankor dir Zeremi oubien enn lot profet.”

¹⁵Li dir zot, “Me zot, ki zot dir mo ete?”

¹⁶Simon Pier reponn, “To Lemesi, Garson Bondie Vivan.”

¹⁷Zezi reponn li, “Bienere Simon, garson Zan! Pa to natir imin ki finn revel twa sa, me mo Papa ki dan lesiel.

¹⁸E mo dir twa Pier, to enn ros, e lor sa ros la mo pou konstrir mo Legliz, e pwisans lamor pa pou kapav dominn li.

¹⁹Mo pou donn twa lakle rwayom lesiel, e tou seki to atase lor later pou atase dan lesiel e tou seki to large lor later pou large dan lesiel.”

²⁰Lerla li donn lord so bann disip pou pa dir personn ki limem Lemesi.

²¹Depi sa, Zezi koumans montre so bann disip ki li bizin al Zerizalem, soufer boukou dan lame bann ansien, bann sef pret ek dokter lalwa e ki zot pou touy li me li pou resisite lor trwaziem zour.

²²Pier amenn li enn kote e fer li bann repros; li dir, “Tou pou pas bien, Segner! Sa pa pou zame ariv twa.”

²³Me li vire e li dir Pier, “Pas deryer mwa, Satan! To enn gro ros lor mo sime parski to pa pans kouma Bondie me kouma imin.”

²⁴Apre sa Zezi dir ar so bann disip, “Si kikenn oule vinn ar mwa, fodre pa li mazinn zis limem, me fodre li pran so lakrwa pou swiv mwa.

²⁵Seki oule sov so lavi pou perdi li, e seki perdi so lavi akoz mwa pou sov li.

²⁶Ki serti enn dimoun gagn lemonn antie me li perdi so lavi? Ki enn dimoun kapav done pou aste lavi?

²⁷Garson Limanite pou vini avek so bann anz dan laglwar so Papa, e lerla li pou tret sak dimoun dapre seki li finn fer.

²⁸Laverite mo dir zot, ena parmi zot ki pa pou konn lamor avan ki zot trouv Garson Limanite revini dan so Rwayom.”