Read Morisien Mt 22 Bible Online

Mt 22 - Morisien bible

Mt 22

¹Ankor enn fwa Zezi servi parabol pou ansegne, li dir,

²“Rwayom lesiel parey kouma enn lerwa ki organiz enn lanos pou maryaz so garson.

³Li avoy so bann serviter pou apel bann invite, me zot refiz vini.

⁴Li avoy lot serviter ankor e li donn zot sa mesaz la: ‘Dir mo bann invite, “Ala mo repa finn pare, mo finn fini touy mo bann toro ek mo bann zanimo bien gra, tou finn pare. Vinn dan lanos.”

⁵Me bann invite pa interese, ena al dan zot karo, ena al okip zot komers,

⁶ena mem ki tom lor bann serviter, maltret zot e touy zot.

⁷Lerwa bien ankoler; li avoy so bann solda al touy sa bann asasin la e bril zot lavil.

⁸Apre sa, li dir so bann serviter, ‘Lanos finn pare, me mo bann invite pa dign.

⁹Al dan bann lakrwaze sime e tou dimoun ki zot trouve invit zot dan lanos.’

¹⁰Bann serviter sorti, al lor lari e rasanble tou seki zot trouve, bon kouma pa bon; e lasal ranpli ar invite.

¹¹Me kan lerwa vini pou get bann invite, li remark kikenn ki pa ti ena kostim maryaz,

¹²e li dir li, ‘Kamarad, kouma to finn rant la san enn kostim maryaz?’ Boug la perdi laparol.

¹³Lerla lerwa dir so bann serviter, ‘Atas so lame ek so lipie, zet li deor dan teneb, la kot pou ena boukou plore, kriye ek grinsman ledan.’

¹⁴Parski boukou pou apele, me tigit pou eli.”

¹⁵Bann Farizien fer enn konplo pou piez Zezi lor bann parol ki li finn dir.

¹⁶Alor, zot avoy zot bann disip, ansam avek bann Erodien pou al get Zezi. Bann la dir li, “Met, nou kone ki to sinser, seki to ansegne lor lalwa Bondie li vre, e to pa les twa inflianse par personn parski to tret to dimoun parey.

¹⁷Dir nou alor, ki to panse: Eski nou lalwa permet nou pey tax lanperer ou non?”

¹⁸Me Zezi, ki konn zot mesanste, reponn zot, “Bann ipokrit, kifer zot anvi met mwa dan lak?

¹⁹Montre mwa enn pies avek ki zot pey tax.” Zot amenn li enn pies larzan.

²⁰Apre li dir zot: “Ki figir ena lor la e ki finn ekrir?”

²¹Zot reponn, “Lanperer.” Li dir zot, “Rann lanperer seki pou lanperer e rann Bondie seki pou Bondie.”

²²Kan zot tann sa, zot dekonserte, zot kit li, zot ale.

²³Sa mem zour la, detrwa Sadisein vinn kot Zezi pou dir ki pena rezireksion e zot poz li enn kestion:

²⁴“Met, Moiz ti dir, ‘Si enn zom mor san zanfan, so frer bizin marye ar so fam pou donn li enn desandan.

²⁵Enn fwa ti ena set frer ki ti viv isi. Premie la marye e mor san zanfan e li kit vev la ar so frer.

²⁶Deziem la fer parey, e mem zafer ariv trwaziem la ek tou lezot.

²⁷Apre sa, fam la osi mor.

²⁸Zour rezireksion, kisannla pou vinn so mari, parski li finn pran touleset kouma mari?”

²⁹Zezi reponn li, “Zot fer erer, parski zot pa konn Lekritir e pwisans Bondie.

³⁰Kan bann mor pou releve, bann dimoun pa pou pran ni zom ni fam, me zot pou viv kouma bann anz dan lesiel.

³¹Pou seki konsern rezireksion bann mor, eski zot pa finn lir seki Bondie finn dir,

³²‘Momem Bondie Abraam, Bondie Izaak, ek Bondie Zakob?’ Li pa Bondie bann mor me Bondie bann vivan.”

³³Tou dimoun letan zot tann sa, zot ti inpresione par so lansegnman.

³⁴Letan bann Farizien tande ki li finn ferm labous bann Sadisein, zot rasanble zot,

³⁵e enn parmi zot ki ti enn dokter lalwa, dimann Zezi enn kestion pou piez li.

³⁶“Met, ki pli gran komannman dan lalwa? “

³⁷Zezi dir li, “‘To bizin kontan to Segner, to Bondie avek tou to leker, avek tou to nam e avek tou to lespri.’

³⁸Samem komannman pli gran e pli inportan.

³⁹Deziem pli inportan ‘To kontan to prosin kouma tomem’

⁴⁰Tou bann lalwa ek bann profet depann lor sa de komannman la.”

⁴¹Ler bann Farizien ti finn rasanble, Zezi dimann zot:

⁴²“Ki zot panse lor Lemesi? Ki so desandan?” Zot reponn, “Desandan David”.

⁴³Zezi dir zot, “Be kouma David ki ti anba gid Lespri Sin, finn kapav apel li ‘Segner’? Parski David limem finn dir:

⁴⁴‘Lesegner finn dir mo Segner, asiz twa dan mo kote drwat ziska mo kraz mo bann lennmi anba mo lipie.’ ”

⁴⁵“Si David apel li Segner, kouma li kapav so garson?”

⁴⁶Personn pa ti kapav donn li enn repons, e depi sa zour la, personn pa ti oze poz li kestion ankor.