Read Morisien Mt 24 Bible Online

Mt 24 - Morisien bible

Mt 24

¹Letan Zezi sorti dan tanp li pe ale, so bann disip vinn kot li pou fer li remark konstriksion tanp.

²Li dimann zot, “Zot trouv tousala? Laverite, mo dir zot, pa mem enn sel ros pou reste enn lor lot; tou pou grene.”

³Plitar ler li pe asize lor montagn Pie Zoliv, bann disip vinn get li anprive, zot dimann li, “Dir nou kan sa pou arive, e ki sign pou ena pou anons lafin-dimonn.”

⁴Zezi reponn zot, “Fer atansion ki personn pa antrenn zot dan perdision

⁵Pou ena boukou ki pou vini lor mo nom pou dir ‘Momem Lemesi!’

⁶E zot pou tann tapaz lager; asire ki zot pa gagn per, parski tousala pou arive, me lafin pa ankor arive.

⁷Nasion pou lev kont nasion, rwayom kont rwayom, e pou ena lafaminn.

⁸Tousala zis komansman douler lanfantman.

⁹Dimoun pou livre zot, pou touy zot e tou bann nasion pou air zot akoz mo nom.

¹⁰Boukou pou abandonn zot lafwa, dimoun pou trayir e air zot kamarad.

¹¹Boukou fos profet pou leve e pou anbet dimoun.

¹²E lemal pou ogmante, dimoun pou nepli kontan zot kamarad.

¹³Me dimoun ki persevere ziska lafin pou sove.

¹⁴Bonn Nouvel Rwayom Bondie pou anonse partou dan lemonn, kouma enn temwagnaz pou tou bann nasion; lerla lafin pou vini.

¹⁵“Alor ler zot trouv bann sakrilez abominab parey kouma Profet Daniel ti anonse - seki lir sa pou konpran! -

¹⁶bann ki res dan Zide pou bizin sove al lor montagn,

¹⁷dimoun ki lor lakaz fode pa desann pou pran seki li ena dan lakaz,

¹⁸dimoun ki dan karo fode pa get deryer pou pran enn triko.

¹⁹Maler lor bann madam ansint e bann ki pe donn zot zanfan tete.

²⁰Priye ki zot pa sove dan liver oubien zour saba.

²¹Parski dan sa letan la pou ena pli boukou soufrans ki lemonn finn deza kone depi so lexistans, e pa pou zame ena ankor parey.

²²E si Bondie pa ti finn rakoursi sa peryod letan la, personn pa ti pou viv. Me li finn fer sa pou bann ki li finn swazir.

²³Si kikenn dir zot, ‘Get Lemesi, li la!’ oubien ‘Ala li la.’ Pa krwar li.

²⁴Parski bann fos mesi ek fos profet pou vini; zot pou fer bann gran-gran sign ek mirak pou tronp mem bann ki Bondie finn swazir.

²⁵Ekout bien! Mo finn deza averti zot davans.

²⁶Alor, si zot dir, ‘Gete, li dan dezer,’ pa ale. Oubien si zot dir, ‘Gete, li pe kasiet isi,’ pa bizin krwar.

²⁷Parey kouma zekler briye dan lesiel depi dan les ziska lwes, koumsamem Garson Limanite pou vini.

²⁸Kot ena lekor mor, ena osi bann votour.

²⁹Vit-vit apre sa bann moman soufrans, soley pou asonbri lalinn pa pou donn lalimier zetwal pou tom depi lesiel bann pwisans lesiel pou sakouye.

³⁰Lerla sign Garson Limanite pou paret dan lesiel; tou bann tribi lor later pou fer dey e zot pou trouv Garson Limanite vini dan niaz avek boukou pwisans ek laglwar.

³¹Avek son tronpet, li pou avoy so bann anz ki pou rasanble tou bann ki li finn swazir dan kat kwin later.”

³²“Konpran bien lansegnman lor pie fig; dimoman ki so brans vinn tann e koumans donn fey, zot kone ki lete pe aprose.

³³Letan zot trouv tousala, kone ki Garson Limanite pre pou vini e li deryer laport.

³⁴Laverite mo dir zot, avan ki sa zenerasion la disparet, tousala pou arive.

³⁵Lesiel ek later pou disparet me mo parol pa pou disparet.

³⁶Ki zour, ki ler, personn pa kone, ni bann anz dan lesiel, ni mem Garson Limanite, zis papa la tousel kone.

³⁷Kouma sa ti pase lepok Noe, koumsamem sa pou ete kan Garson Limanite pou vini.

³⁸Parski avan inondasion vini, dimoun ti pe manze-bwar, zot ti pe marye ek aranz maryaz, ziska ki Noe rant dan lars.

³⁹Personn pa ti pe dout nanye ziska ki deliz vini e balye zot tou. Koumsamem pou ete kan Garson Limanite vini.

⁴⁰La kot de zom pe travay dan karo, pou pran enn ale, lot pou res deryer.

⁴¹Kot de fam pe kraz dible dan moulin, pou pran enn ale, lot pou res deryer.

⁴²Alor, mo dir zot pran kont, parski personn pa kone ki zour zot Segner pou vini.

⁴³Zot konn bien, si enn propriyeter ti kone ki ler dan lanwit voler pou pas kot li, li pa ti pou dormi pouki so lakaz pa defonse.

⁴⁴Ala kifer, zot osi, zot bizin pare, parski Garson Limanite pou vinn enn ler ki zot pa kone.”

⁴⁵“Ki sa serviter fidel ek bien serye, lor ki so patron kapav konte pou servi manze tou so bann travayer dan ler ki bizin?

⁴⁶Ere sa serviter ki so met pou trouv li pe travay kan li arive.

⁴⁷Laverite mo dir zot, li pou met sa dimoun la ansarz tou so dibien.

⁴⁸Me si li enn move serviter e li dir dan limem, ‘Mo met pe tarde,’

⁴⁹e li koumans bat so bann kamarad serviter, e manze, bwar avek bann soular.

⁵⁰So met pou retourne enn zour kot li pa pe atann li e enn ler kot li pa pou kone.

⁵¹Li pou koup-koup li, e met li ansam avek bann ipokrit, la kot pou ena boukou plore ek kriye e boukou grinsman ledan.”