Read Morisien Mt 4 Bible Online

Mt 4 - Morisien bible

Mt 4

¹Zis apre sa, Lespri ti ris Zezi dan dezer kot diab ti tant li.

²Apre ki li finn pas karant zour ek karant nwit san manze, Zezi gagn fin.

³Diab vinn ar li e dir li, “Si tomem Garson Bondie, donn lord sa bann ros la vinn dipin.”

⁴Zezi reponn, “Dan liv finn ekrir: ‘Dimoun pa viv zis ar dipin me ar tou bann parol ki sorti dan labous Bondie.’ ”

⁵Alor diab amenn li dan lavil sint e fer li dibout net lao lor tanp e dir li,

⁶“Si tomem Garson Bondie, zet to lekor dan vid, parski dan liv finn ekrir: ‘Li pou donn lord so bann anz pou tini twa dan zot lame, pouki okenn ros pa bles to lipie.’ ”

⁷Zezi dir li, “Finn osi ekrir: ‘Fode pa to tant Lesegner to Bondie.’ ”

⁸Apre sa, diab amenn Zezi lor enn montagn bien-bien ot, li montre li tou bann rwayom lor later

⁹e li dir li, “Mo pou donn twa tousala, si to tom azenou pou ador mwa.”

¹⁰Zezi reponn, “Sorti la ale Satan, parski finn ekrir: ‘To pou ador Lesegner to Bondie, li tousel to bizin servi.’ ”

¹¹Alor diab kit li ale, e bann anz vinn servi li.

¹²Ler li tann dir ki bannla finn aret Zan, Zezi ti retir li dan Galile

¹³Li kit Nazaret pou al res dan Kafarnaom, dan borlamer, dan teritwar Zabilon ek Neftali.

¹⁴Sa finn arive, pouki parol Profet Izai realize:

¹⁵“Teritwar Zabilon ek Neftali, lor sime lakot, lot kote Zourdin, Galile, pei payin;

¹⁶lepep ki ti dan teneb finn trouv enn gran lalimier e bann ki ti finn mor dan zot pese, enn lalimier finn leve pou zot.”

¹⁷Depi sa letan la Zezi koumans proklame, “Sanz zot leker, parski Rwayom Bondie pe aprose.”

¹⁸Letan Zezi pe mars-marse dan borlamer Galile, li trouv de peser: Simon, ki ti apel Pier ek so frer Andre; zot ti pe lapes lasenn.

¹⁹Zezi dir zot, “Vini, swiv mwa, mo pou montre zot lapes dimoun.”

²⁰Lor vites, zot kit zot file, zot swiv Zezi

²¹Inpe pli lwin, li trouv de garson Zebede: Zak ek so frer Zan. Toulede avek zot papa ti dan pirog pe demay zot file; li apel zot.

²²Lor vites zot kit zot papa anplan dan bato e zot swiv li.

²³Zezi finn al partou dan Galile, li ti pe ansegne dan zot sinagog, li ti pe proklam Bonn Nouvel lor size Rwayom Bondie. Li ti geri bann dimoun avek toutsort kalite malad.

²⁴So repitasion finn al partou dan Lasiri. Zot amenn kot li tou bann ki pe soufer ek aflize par tou kalite maladi; bann ki posede.

²⁵Enn gran lafoul sorti Galile, Dekapol, Zerizalem, Zide ek lot kote larivier Zourdin ti swiv li.