Read Morisien Mt 8 Bible Online

Mt 8 - Morisien bible

Mt 8

¹Ler Zezi sorti lor montagn pe desann anba, enn gran lafoul swiv li.

²Enn lepre vinn kot li, tom azenou devan li e dir, “Si sa to volonte, to kapav geri mwa.”

³Zezi poz lame lor li, tous li, e dir li, “Samem mo volonte, aster to pou pirifie.” Deswit li vinn prop.

⁴Zezi dir li, “Ekout bien, pa rakont sa personn, me al get enn pret, donn seki Moiz finn dir pou pirifikasion; sa pou enn temwagnaz pou lezot.”

⁵Kouma Zezi ariv Kafarnaom, enn ofisie Romin vinn get li e sipliy li,

⁶“Segner, mo serviter finn paralize lakaz, li dan move soufrans.”

⁷Zezi dir ofisie la, “Mwa, mo pou al ar twa, pou geri li.”

⁸Me ofisie la reponn, “Segner, mo pa dign pou resevwar twa kot mwa, me dir selma enn parol e mo serviter pou geri.

⁹Momem, mo anba lotorite mo bann siperyer, e mo ena enn bann solda anba mo lotorite; si mo dir enn, ‘Ale’ li ale, enn lot ‘Vini’ li vini e avek mo esklav ‘Fer sa’ e li fer li.”

¹⁰Zezi ti etone ler li tann sa, e li dir bann ki ti swiv li, “Laverite mo dir zot, zame mo pa finn trouv kikenn avek enn lafwa parey dan Izrael.”

¹¹Ala mo dir zot: boukou pou sorti dan les ek dan lwes e pou asiz atab avek Abraam, Izaak, ek Zakob dan rwayom lesiel.

¹²Me bann ki sipoze dan rwayom, pou gagn zet deor dan nwar kot zot pou plore ek grins zot ledan.

¹³Zezi dir ofisie la, “Ale, ki tou kiksoz ariv dapre to lafwa.” E sa mem moman la serviter la finn geri.

¹⁴Zezi al dan lakaz Pier, li rantre e li trouv belmer Pier lor lili avek enn move lafiev

¹⁵Zezi trap so lame, lafiev la kit li, li dibout li koumans servi Zezi.

¹⁶Sa swar la, zot ti amenn kot li boukou ki ti posede ar move lespri; Zezi ti sas bann lespri la avek so parol e li geri tou seki ti malad.

¹⁷Tousala ti arive dapre seki profet Izai ti dir, “Li pran lor li tou nou bann infirmite ek nou bann maladi.”

¹⁸Ler Zezi trouv sa gran lafoul la otour li, li donn lord pou travers lot kote larivier.

¹⁹Enn dokter lalwa apros ar li e dir li, “Met, mo pou swiv twa ninport ki kote to ale.”

²⁰Zezi dir li, “Bann renar ena zot lakav, zwazo lesiel ena zot nik, me Garson Limanite pena okenn landrwa pou poz so latet.”

²¹Enn lot disip dir li, “Segner, les mwa al anter mo papa avan.”

²²Zezi dir li, “Swiv mwa, e les bann mor anter zot mor.”

²³Zezi mont dan bato, e so bann disip swiv li.

²⁴Enn gro divan soufle lor lamer, zot bato ti pre pou savire, me Zezi ti pe dormi.

²⁵Zot al lev li, zot dir li, “Sov nou, Segner, nou pe mor.”

²⁶Li dir zot, “Kifer zot per? Ala zot lafwa feb la.” Apre li leve, li menas divan ek vag e ti ena enn gran akalmi.

²⁷Tou dimoun etone, zot dir, “Kisannla sa? Mem divan ek lamer obeir li.”

²⁸Ler li ariv lot kote, lor teritwar Gadarenien, de posede vinn ar li; zot sorti dan simitier. Zot ti telman feros ki personn pa ti kapav pas dan sa sime la.

²⁹Zot kriye for-for, “Ki to le ar nou, Garson Bondie? Eski to finn vinn isi pou fatig nou avan ler?”

³⁰Ti ena enn troupo koson ki ti pe manze dan lezanviron.

³¹Bann posede la sipliy li, “Si to sas nou, avoy nou dan sa troupo koson la”

³²Zezi dir zot, “Ale!” Alor zot sorti e zot rant dan troupo koson. Troupo la degringol depi lao, tom dan lamer e zot tou nwaye.

³³Bann gardien koson sove, zot al dan lavil e zot rakont tou seki finn pase avek sa de posede la.

³⁴Alor tou dimoun dan lavil sorti pou vinn zwenn Zezi; ler zot trouv li, zot sipliy li kit zot teritwar.