Read Morisien Mt 9 Bible Online

Mt 9 - Morisien bible

Mt 9

¹Zezi mont dan bato, li travers larivier, li al dan so lavil.

²Zot amenn ar li enn paralize alonze lor enn brankar. Ler Zezi trouv grander zot lafwa, li dir paralize la, “Pran kouraz mo garson; to bann pese finn pardone.”

³Detrwa dokter lalwa ti pe dir dan zotmem, “Sa boug la pe blasfeme.”

⁴Me Zezi ti konn zot panse, li dir zot, “Kifer zot ena move panse dan zot leker?

⁵Ki pli fasil pou dir, ‘To pese finn pardone,’ oubien ‘Leve, marse’?

⁶Me pou zot kone ki Garson Limanite ena lotorite lor later pou pardonn pese,” Li dir paralize la, “Leve, pran to lili retourn kot twa.”

⁷Li leve, li al kot li.

⁸Letan lafoul trouv sa, laper trap zot, e zot glorifie Bondie ki finn donn limanite enn lotorite parey.

⁹Letan Zezi kite li ale, li trouv enn boug ki ti apel Matie, li ti pe asiz dan biro tax. Zezi dir li, “Swiv mwa.” Matie leve swiv li.

¹⁰Letan Zezi ti atab dan lakaz, boukou komi tax ek dimoun move lavi ti vinn asiz atab avek Zezi ek so bann disip

¹¹Letan bann Farizien trouv sa, zot dir ar bann disip Zezi, “Kifer zot Met, li manz avek bann komi tax ek dimoun move lavi?”

¹²Me ler Zezi tann sa li dir, “Bann dimoun ki bien pa bizin dokter, zis bann seki malad.

¹³Ale, al aprann seki sa parol la vedir, ‘Mo dezir mizerikord, pa sakrifis zanimo. Parski mo pa finn vini pou apel bann zis me bann peser.’ ”

¹⁴Apre sa, bann disip Zan vinn get Zezi e dimann li, “Kifer nou ek bann Farizien, nou fer karem, me to disip pa fer karem ditou?”

¹⁵Zezi dir zot, “Eski zot panse ki bann invite dan maryaz kapav andey pandan ki nouvo marye ankor avek zot? Enn zour pou arive kot nouvo marye pou ale, lerla zot pou fer karem.

¹⁶Personn pa rakomod enn vie linz avek enn tisi nef; parski latwal tisi nef la pou retresi e pou desir ankor plis sa vie linz la.

¹⁷E personn pa met nouvo divin dan bann vie damzann, sinon zot pou kase, divin pou fane e damzann la pou nepli bon. Nou met nouvo divin dan damzann nef e koumsa toulede pou konserve.”

¹⁸Letan li ankor pe koz ar zot, enn sef Zwif arive e tom azenou devan Zezi, li dir, “Mo tifi fek mor, me vinn poz to lame lor li e li pou viv.”

¹⁹Zezi leve, li swiv li avek so bann disip.

²⁰Lerla enn madam ki pe soufer avek enn lemorazi pandan douz-an, vinn deryer Zezi e tous bor so linz,

²¹parski li ti finn dir dan limem, “Si selman mo kapav tous so linz, mo pou geri.”

²²Zezi vire, e ler li trouv madam la, li dir, “Pran kouraz mo tifi, to lafwa finn geri twa.” Deswit madam la geri.

²³Ler Zezi ariv kot lakaz sa sef Zwif la, li trouv bann mizisien pe zwe laflit e lafoul ki pe fer enn pake tapaz.

²⁴Li dir, “Sorti la tou dimoun, tifi la pa finn mor, li pe dormi”. Zot tou zot riy li.

²⁵Me ler tou dimoun finn sorti, Zezi rant dan lakaz, li pran li par so lame e tifi la leve.

²⁶Sa nouvel la ti fane dan tou landrwa.

²⁷E ler Zezi al inpe pli lwin, de aveg swiv li, zot kriye bien for, “Pitie nou, garson David”

²⁸Ler li rant dan lakaz, bann aveg la vinn kot li e Zezi dir zot, “Eski zot krwar ki mo kapav fer sa?” Zot dir, “Wi Segner.”

²⁹Apre li tous zot lizie, e dir, “Sa pou arive dapre zot lafwa.”

³⁰Zot lizie ouver. Zezi donn zot enn warning pou pa rakont sa personn.

³¹Me apenn zot ale, zot fann sa nouvel la dan tou landrwa.

³²Ler zot ti pe sorti pou ale, dimoun ti amenn devan Zezi enn boug ki pa koze e ki ti posede.

³³Kouma li fini sas demon la, boug la koumans koze e lafoul ti etone, zot dir, “Zame zot finn trouv kiksoz parey dan Izrael.”

³⁴Me bann Farizien ti pe dir, “Li servi prins demon pou sas demon.”

³⁵Zezi ti al partou dan Galile, li ti pe ansegne dan zot sinagog, li ti pe proklam Bonn Nouvel Rwayom Bondie. Li ti geri bann dimoun ki ti ena tousort kalite malad.

³⁶Ler Zezi get lafoul, li ti ranpli ar konpasion pou zot, parski zot ti pe plegne e zot ti abat kouma bann mouton ki pena berze.

³⁷Lerla li dir so bann disip, “Ena enn gran rekolt, me pena ase travayer.

³⁸Alor, priye met larekolt pou avoy travayer”