Read Morisien Mk 15 Bible Online

Mk 15 - Morisien bible

Mk 15

¹Boner gramatin, bann sef pret fer enn gran reynion avek bann ansien, bann dokter lalwa avek tou manm Sanedrin okonple. Zot atas Zezi, zot pran li e zot amenn li devan Pilat.

²Pilat dimann li, “Eski tomem lerwa Zwif?” Zezi reponn li, “Twa ki pe dir sa.”

³Bann sef pret akiz li, zot met enn pake sarz lor li.

⁴Pilat redimann li “To pena nanye pou reponn? Gete ki kantite sarz bannla inn met lor twa.”

⁵Zezi pa reponn nanye. Sa ti fer Pilat res bet.

⁶Dapre koutim fet Pak, abitie larg enn prizonie ki dimoun demande.

⁷Ti ena enn prizonie ki ti apel Barabas. Li ti dan prizon avek bann lezot rebel ki ti finn komet enn krim dan emet.

⁸Lafoul monte pou dimann Pilat fer kouma li abitie fer.

⁹Pilat dimann zot, “Eski zot oule mo larg lerwa Zwif pou zot?”

¹⁰Li ti realize ki bann sef pret finn livre li parski zot zalou.

¹¹Alors bann sef pret exsit lafoul pouki zot dimann Pilat larg Barabas plito.

¹²Pilat redimann zot ankor enn fwa, “Be lerla, ki mo pou fer avek sa boug ki zot apel lerwa Zwif la?”

¹³Zot kriye pli for, “Krisifie li!”

¹⁴Pilat dir zot, “Ki li finn fer demal?” Zot kriye ankor pli for, “Krisifie li!”

¹⁵Kouma Pilat ti anvi donn lafoul satisfaksion, li larg Barabas pou zot; letan zot finn fini fwet Zezi, Pilat livre li pouki bannla krisifie li.

¹⁶Bann solda sarye li dan lakour pale gouverner; lerla zot invit bann lezot gard vinn avek zot.

¹⁷Zot met enn manto rouz fonse lor li e zot anfons enn kouronn trese ar pikan lor so latet.

¹⁸Zot koumans salye li, “Bienveni, lerwa Zwif.”

¹⁹Zot donn li enn kout zon lor so latet, zot kras lor li, zot azenou devan li e zot fer sanblan rann li omaz.

²⁰Kan zot finn bien boufonn li, zot retir so manto rouz lor li e zot remet so linz; zot sarye li deor pou al koulout li lor lakrwa.

²¹Simon, papa Alexand ek Rifis, ti enn abitan Sirenn. Letan li sorti lakanpagn, li ti pe pas par la, kan bannla obliz li sarye lakrwa Zezi.

²²Zot amenn Zezi dan enn landrwa ki ti apel Golgota, sakivedir Landrwa Krann dimoun mor.

²³Zot sey donn li bwar enn melanz divin ek lamir me li refize.

²⁴Zot koulout li lor lakrwa; zot tir lakourt-pay pou partaz so bann linz ant zot, pou gete ki sakenn pou gagne.

²⁵Ti nev-er gramatin ler zot finn krisifie li.

²⁶Ti ena enn plak ki explike pouki rezon li finn kondane e lor la ti ekrir “Lerwa Zwif.”

²⁷Ti ena de bandi ki ti krisifie avek li, enn ti dan so drwat, lotla ti dan so gos. [

²⁸Koumsa ki Lekritir finn realize kot finn ekrir, “Li finn partaz sor bann kriminel.”]

²⁹Bann ki ti pe pase insilte li. Zot sakouy zot latet, zot dir, “Twa ki kraz tanp e rekonstrir li dan trwa zour

³⁰sov tomem, desann lor lakrwa!”

³¹Bann sef pret ek bann dokter lalwa fer parey. Zot boufonn li ant zotmem e zot dir, “Li finn sov lezot me li pa kapav sov limem.

³²Si vremem to Lemesi, lerwa Izrael, desann lor lakrwa, asterlamem, lerla nou pou krwar dan twa.” Bann ki ti krisifie ansam ar li, ti pe zour li zot osi.

³³Ler finn ariv midi, teneb kouver later antie ziska trwa-zer tanto.

³⁴Trwa-zer, Zezi kriy bien-bien for, “Eli, Eli, la-ma sabaktani?” - sakivedir, “Bondie, Bondie, kifer to finn abandonn mwa?”

³⁵Letan detrwa dimoun ki ti la, tann li, zot dir, “Tande! Li pe apel Eli.”

³⁶Enn parmi zot galoupe, inbib enn leponz ar vineg, met li dan bout enn banbou e donn Zezi sa pou bwar, e li dir, “Atann, anou gete si Eli pou vini, pou fer li desann.”

³⁷Apre sa Zezi kriye bien for e li rann so dernie soupir.

³⁸Rido tanp desir an-de, depi lao ziska anba.

³⁹Letan santiryon ki ti pe debout vizavi li, trouv manier li finn rann so dernie soupir, li dir, “Vremem, sa dimoun la ti Garson Bondie.”

⁴⁰Delwin, ti ena bann fam ki ti pe asiste seki ti pe pase; parmi zot ti ena Marie-Madlenn, Marie, mama ti-Zak, Zoze ek Salome,

⁴¹Zot ti pe swiv Zezi e zot ti pe servi li depi Galile; ti ena ankor boukou lezot fam ki ti finn mont avek li ziska Zerizalem.

⁴²Kan aswar vini, kouma ti zour Preparasion, savedir lavey saba,

⁴³Zozef ki sorti Arimate e ki ti enn konseye bien respekte, (li osi, li ti pe atann avek inpasians Rwayom Bondie), pran so kouraz, al get Pilat e dimann li lekor Zezi.

⁴⁴Pilat ti etone ki li ti fini mor. Li ti fer apel santiryon e li dimann li si li ti finn mor depi lontan.

⁴⁵Kan li ti finn gagn ransegnman avek santiryon, li donn Zozef permision pran so lekor.

⁴⁶Zozef aste enn dra, desann Zezi anba, anvlop li dan dra la e met li dan enn tonbo ki ti finn taye dan ros; apre sa li ti roul enn gro ros devan so lantre.

⁴⁷Marie-Madlenn ek Marie, mama Zoze ti pe bien gete kot ti finn met so lekor.