Read Morisien Mk 3 Bible Online

Mk 3 - Morisien bible

Mk 3

¹Ankor enn fwa, Zezi rant dan sinagog; enn boug ek lame mognon ti la.

²Bannla ti pe vey Zezi, pou gete si li ti pou geri sa boug la zour saba; koumsa zot ti pou kapav met enn sarz lor li.

³Li dir ar sa boug lame mognon la, “Leve, vinn devan.”

⁴Lerla li dir bannla, “Dapre lord, ki gagn drwa fer zour saba? Fer bon kiksoz, fer move kiksoz? Sov enn lavi, tir enn lavi?” Zot tou res trankil.

⁵Li get zot ar lakoler, anmemtan, li sagrin ki zot leker dir. Li dir boug la, “Dres to lame.” Mognon la dres so lame; so lame revinn normal.

⁶Kouma bann Farizien tom deor, zot fer enn konplo avek bann Erodien pou touy Zezi.

⁷Zezi retir li dan borlamer avek so bann disip. Enn pake dimoun ti pe swiv li. Zot sorti partou kote dan Galile, Zide,

⁸Zerizalem, Idoume, lot kote larivier Zourdin, dan rezion Tir ek Sidon. Nouvel ti finn fane komie kiksoz li ti pe fer; akoz samem zot ti pe vinn get li.

⁹Zezi ti bizin dir so bann disip pare enn pirog pou li, tansion lafoul kraz li.

¹⁰Li ti finn geri boukou dimoun; tou saki ti malad, ti pe pouse pou tous li.

¹¹Sak fwa bann move lespri trouv li, zot tonbe, zot kriye, “Tomem Garson Bondie.”

¹²Zezi menas zot pouki zot pa fer dimoun kone ki li ete.

¹³Li mont lor montagn. Li apel dimoun ki li ti oule. Bannla vini.

¹⁴Li swazir douz parmi zot, (li donn zot nom apot), pou bannla res avek li e pouki li avoy zot proklame avek

¹⁵lotorite sas demon.

¹⁶Alors li nom Ledouz. Li donn Simon enn lot nom, li apel li Pier;

¹⁷apre ti ena Zak ek so frer Zan, toulede garson Zebede. Li sanz zot nom, li apel zot Boanerzes, savedir zanfan loraz ek zekler;

¹⁸ti ena osi Andre, Filip, Bartelmi, Matie, Toma, Zak garson Alfe, Tade, Simon ki ti res Kana

¹⁹ek Zida Iskaryot, limem ki ti vann Zezi.

²⁰Apre sa Zezi rant dan lakaz. Lafoul rekomans rasanble; telman dimoun ti pe ale-vini, ki zot pa ti kapav manz enn bout dipin.

²¹Kan fami Zezi aprann sa, zot ale pou trap li. Zot ti pe dir li ti finn perdi latet.

²²Bann dokter lalwa ki ti finn desann depi Zerizalem ti pe dir ki ena Belzeboul lor Zezi, ki li sas demon par lafors sef bann demon.

²³Li apel zot, li koz ar zot an parabol. Li dir zot, “Ki manier Satan kapav sas Satan?

²⁴Si enn Rwayom divize kont limem, Rwayom la pa kapav tini dibout.

²⁵Si enn fami divize kont limem, fami la pa pou kapav tini dibout.

²⁶Si Satan lev lager ar limem, savedir li divize, li pa pou kapav tini, li pou fini limem.

²⁷Ou pa kapav rant dan lakaz enn dimoun for pou kokin so bann dibien san ki ou atas li avan; lerla ou pou kapav kokin kouma ou anvi.

²⁸Mo dir zot enn zafer: laverite, laverite mo dir zot, tou pese, tou blasfem, ki dimoun fer pou pardone;

²⁹enn sel blasfem pa pou pardone, blasfem kont Lespri Sin. Li enn pese ki zame pou efase.”

³⁰Zezi ti pe koz koumsa parski bannla ti pe dir ki li ena enn move lespri lor li.

³¹So mama ek so bann frer vini. Zot res deor zot fer kriye li.

³²Enn kantite dimoun ti pe asize; zot tou ti pe antour li; zot dir li, “Gete, to mama ek to bann frer inn vinn rod twa.”

³³Li reponn zot, “Kisannla mo mama, kisannla mo frer?”

³⁴Li lev so latet, li promne so regar lor sak dimoun ki ti pe asize. “Ala mo mama, ala mo bann frer.

³⁵Dimoun ki fer volonte Bondie, limem mo frer, limem mo ser, limem mo mama.”