Read Morisien Mk 5 Bible Online

Mk 5 - Morisien bible

Mk 5

¹Apre sa, zot ariv lot kote lamer, dan landrwa bann Zerazenien.

²Kouma Zezi debarke, enn boug posede par enn move lespri, sorti dan bann tom, vinn zwenn li.

³Simitier ti so lakaz. Personn pa ti reysi atas li, mem pa avek enn lasenn.

⁴Souvan defwa, bannla ti atas so lipie avek rwayar ek lasenn; sak fwa li kas rwayar, li voltiz lasenn. Personn pa ti ase for pou dont li.

⁵Lanwit-lizour li irle dan simitier, lor montagn. Li ti koup-koup limem ar ros.

⁶Letan li trouv Zezi pe vini depi lwin, li galoupe, li tom azenou devan Zezi.

⁷Li koumans kriye bien-bien for, “Ki to oule ar mwa, Zezi Garson Bondie Treo? Mo pran Bondie pou temwin, mo sipliy twa, pa fatig mwa.”

⁸Parski Zezi ti finn dir li, “Twa, move lespri, sort dan sa boug la.”

⁹Zezi dimann li, “Twa ki to ete?” Li reponn, “Mo enn lezion parski nou boukou.”

¹⁰Li sipliy Zezi pa avoy zot dan enn lot landrwa.

¹¹Lor flan montagn, ti ena enn gran troupo koson ki ti pe manze.

¹²Bann move lespri la sipliy Zezi, “Avoy nou dan bann koson, permet nou rant dan zot.”

¹³Li donn bannla permision. Zot sorti, zot rant dan bann koson la. Troupo la deval lapant, tom direk dan lamer. Ti ena apepre demil koson, zot tou ti mor nwaye.

¹⁴Bann gardien koson sove-ale; zot fann nouvel dan lavil ek lakanpagn lor saki finn pase. Dimoun galoupe, vinn gete saki finn arive.

¹⁵Ler zot ariv kot Zezi, zot trouv sa dimoun ki ti posede la. Samem boug ki ti ena enn larme lespri lor li; li ti pe asize, so linz lor li, so lespri normal; dimoun gagn per, zot gagn sok.

¹⁶Bann ki finn trouve, finn rakont zistwar sa posede la ek saki finn ariv bann koson.

¹⁷Zot sipliy Zezi kit zot landrwa.

¹⁸Letan li pe mont dan bato, boug ki ti posede la, inplor Zezi pou li kapav swiv li.

¹⁹Zezi pa les li; li dir li, “Al to lakaz kot to bann fami; rakont zot tou saki Lesegner inn fer pou twa, kouma li finn pitie twa.”

²⁰Letan li ale, li koumans proklame dan Dekapol tou saki Zezi finn fer pou li. Tou dimoun ti plin ar admirasion.

²¹Ankor enn fwa, Zezi travers lamer pou al lot kote, enn gro lafoul ti antour li. Li ti dan borlamer.

²²Lerla enn sef sinagog ki ti apel Zair vini. Letan li trouv Zezi, li tom azenou devan li.

²³Li sipliy Zezi, li inplor li, “Ayo, Zezi, mo tifi pre pou mor; vini, poz lame lor li, sa pou sov li, li pou viv.”

²⁴Zezi al avek li. Enn gran lafoul ti pe swiv li. Dimoun ti pe pouse.

²⁵Ti ena la enn fam ki ti ena enn lemorazi depi douz-an.

²⁶Li finn soufer anba lame boukou dokter ki finn fer li depans tou so kas dan vid; letansa so maladi ti vinn pli grav.

²⁷Repitasion Zezi ti finn ariv ziska madam la. Li rant dan lafoul, li pas par deryer Zezi, li tous so linz.

²⁸Dan so latet li ti pe dir, “Si selman mo reysi tous so linz, mo pou geri.”

²⁹Enn sel kout, so lemorazi arete. Li santi klerman dan so lekor ki so maladi finn kit li.

³⁰Anmemtan Zezi santi enn lafors ki finn sort dan so lekor. Li vire, li demande, “Kisannla finn tous mo linz?”

³¹So bann disip dir li, “To pa trouve lafoul pe pouse, to demande, kisannla finn tous twa?”

³²Li vire, li gete pou kone kisannla finn fer sa?

³³Madam la gagn per, li tranble; li kone ki finn ariv li; li vini, li tom azenou devan Zezi, li dir li tou laverite.

³⁴Zezi dir li, “Mo tifi, to lafwa finn sov twa; al anpe; to finn gagn to gerizon.”

³⁵Li ti ankor pe koze, kan dimoun ki sorti lakaz sef sinagog la vinn donn nouvel, “To tifi finn mor; pou kifer bizin kontigne deranz Met la?”

³⁶Zezi pa pran kont zot koze; li dir sef sinagog, “Pa trakase, nek krwar.”

³⁷Li pa les personn swiv li apart Pier, Zak ek so frer Zan.

³⁸Zot rant dan lakaz sef sinagog; Zezi trouv enn gran deboulman, ena pe plore, ena pe gagn kriz.

³⁹Letan li rantre, li dir bann dimoun, “Kifer zot azite koumsa? Kifer zot plore? Zanfan la pa finn mor, li pe dormi.”

⁴⁰Bannla riy li. Zezi met zot tou deor; li gard zis papa ek mama zanfan la ek sa trwa ki ti vinn ar li la; li rant dan lasam kot zanfan la ti ete.

⁴¹Li trap lame zanfan la, li dir li, “Talita koum,” - kivedir, “Zennfi, mo dir twa, leve.”

⁴²Deswit tifi la leve, li koumans marse (li ti ena douz-an). Tou dimoun res bet.

⁴³Zezi donn zot lord pa les personn kone. Li dir zot, “Donn tifi la manze.”