Read Morisien Mk 8 Bible Online

Mk 8 - Morisien bible

Mk 8

¹Enn lot fwa, ti ena ankor enn gro lafoul. Zot pa ti ena nanye pou manze. Zezi apel so bann disip, li dir zot,

²“Mo leker fermal kan mo get sa lafoul la. Sa fer trwa zour ki zot ar mwa e zot pena nanye pou manze.

³Si mo dir zot al zot lakaz lestoma vid, zot pou gagn febles dan sime parski ena ki sorti bien lwin.”

⁴So bann disip dir li, “Kot pou kapav gagn dipin pou ranpli zot vant dan enn landrwa dezer koumsa?”

⁵Li dimann zot, “Komie dipin zot ena?” Zot dir li, “Set.”

⁶Li fer lafoul asiz anba; li pran touleset dipin, li rann gras, li kas bann dipin la, li donn so bann disip pouki bannla fer lapartaz e bannla partaz avek lafoul.

⁷Ti ena osi detrwa tipwason; li beni zot e li dimann bannla partaz sa osi.

⁸Bannla manze ziska zot vant plin; apre zot ti ramas set korbey ranpli ar tibout dipin.

⁹Ti ena apepre kat mil dimoun. Apre li dir zot al lakaz.

¹⁰Zis apre li mont lor bato avek so bann disip e li al paraz Dalmanouta.

¹¹Bann Farizien vini; zot koumans diskit ar Zezi; pou teste li, zot dimann li enn sign ki sorti depi lao dan lesiel.

¹²Li pous enn gran soupir, apre li reponn, “Kifer sa zenerasion la pe rod enn sign? Laverite, laverite mo dir zot, sa zenerasion la pa pou gagn okenn sign.”

¹³Lerla li kit zot, li remont dan bato, li al lot kote.

¹⁴Bann disip ti bliye amenn dipin. Ti ena zis enn sel dipin avek zot dan bato.

¹⁵Zezi averti zot, “Get bien, fer atansion ar levin bann Farizien ek levin Erod.”

¹⁶Bann disip ti pe diskite ant zot parski zot pa ti ena dipin.

¹⁷Zezi ti remarke seki ti pe pase. Li dir zot, “Kifer zot pe diskite akoz zot pena dipin? Zot lizie pankor ouver? Zot pankor konpran? Koumsa zot leker dir?

¹⁸Zot ena lizie, selman zot pa trouv kler; zot ena zorey, selman zot pa tande? Zot pa rapel?

¹⁹Kan mo ti kas sink dipin pou sink mil dimoun, komie panie ranpli ar bout dipin zot ti ramase?” Zot dir li, “Douz.”

²⁰“Kan mo ti kas set dipin pou kat mil dimoun, komie panie ranpli ar bout dipin zot ti ramase?” Bannla reponn, “Set.”

²¹Li dir zot, “Zot pankor konpran mem?”

²²Zot ariv Betsaida. Dimoun amenn enn aveg ar Zezi; zot sipliy Zezi tous li.

²³Zezi trap so lame, li amenn li andeor vilaz. Li met inpe lakras lor so lizie, li poz lame lor li apre li dimann li, “Eski to trouv kiksoz?”

²⁴Areg la lev so latet, li dir, “Mo trouv dimoun me zot koumadir bann pie ki pe marse.”

²⁵Zezi poz lame ankor enn fwa lor so lizie. Lerla li arive trouv bien, so lizie revinn normal e li trouv tou bien kler.

²⁶Zezi fer li al so lakaz, e li dir li, “Pa pas par sa vilaz la.”

²⁷Zezi pran direksion bann vilaz Sezare-Filip avek so bann disip. Dan sime, li dimann so bann disip, “Ki bann dimoun pe dir lor mwa?”

²⁸Zot reponn li, “Ena dir to Zan Batis, ena dir tomem Eli, lezot pe dir to enn parmi bann profet.”

²⁹Me li dir zot, “E zot, ki zot dir mo ete?” Pier reponn li, “Tomem Lemesi.”

³⁰Li komann zot pa dir sa personn.

³¹Apre sa li koumans ansegn zot, fode ki Garson Limanite soufer boukou, ki bann ansien, bann pret, bann dokter lalwa rezet li, touy li, apre sa li pou resisite lor so trwaziem zour.

³²Li ti pe koz fran-fran ar zot. Pier amenn li dan enn kwin e koumans menas li.

³³Zezi vire, li get so bann disip, li menas Pier; li dir li, “Sorti devan mwa, Satan, parski to pena lespri Bondie me lespri dimoun.”

³⁴Li apel lafoul ek so bann disip e li dir zot, “Si kikenn anvi mars lor mo sime pou swiv mwa, li bizin bliye limem, pran so lakrwa, swiv mwa.

³⁵Dimoun ki anvi sov so lavi, pou perdi li; saki perdi so lavi akoz mwa ek Bonn Nouvel, pou sov li.

³⁶Kiserti enn dimoun gagn lemonn antie si li ariv perdi so lavi?

³⁷Ki kiksoz enn dimoun pa pou fer pou sap so lavi?

³⁸Si kikenn, dan sa zenerasion adilter ek peser la, gagn onte akoz mwa ek mo parol, Garson Limanite, li osi pou ont li, kan li pou vinn dan laglwar so Papa ek bann anz ki sin.”