Read Morisien Lk 19 Bible Online

Lk 19 - Morisien bible

Lk 19

¹Zezi rant dan Zeriko e li travers lavil la.

²Ti ena enn dimoun ki ti apel Zase; li ti enn sef komi tax e li ti bien ris.

³Li ti anvi trouv Zezi, me akoz lafoul li pa ti kapav parski li ti tro kourt.

⁴Alors li ti galoup devan, li ti mont lor enn gran pie sikomor pou trouv Zezi parski li ti pre pou pas par la.

⁵Letan Zezi ariv pre sa plas la, li lev lizie, li get Zase, e li dir li, “Zase, degaze desann; mo bizin vinn res kot twa zordi.”

⁶Zase degaze desann e resevwar Zezi dan lazwa.

⁷Tou bann ki ti trouv sa mirmire e zot dir, “Ala li finn al res kot enn dimoun ki fer pese.”

⁸Zase leve e li dir ar Lesegner, “Ekout mwa, Segner. Mo pou donn lamwatie mo dibien bann pov; e si mo finn kokin dimoun, mo pou rann zot kat fwa plis.”

⁹Lerla Zezi dir li, “Azordi mem, delivrans finn rant dan sa lakaz la parski li osi, li enn zanfan Abraam.

¹⁰Parski Garson Limanite inn vinn rod seki finn perdi pou sov zot.”

¹¹Letan Zezi ti koste ar Zerizalem, li rakont enn lot parabol pou bann ki ti pe ekout li parski zot ti panse ki Rwayom Bondie ti pre pou manifeste limem.

¹²Alors Zezi dir zot, “Enn zom ki sorti dan enn gran fami al dan enn lot pei pou gagn tit lerwa e li ti pou retourne apre sa.

¹³Li apel dis so bann serviter, e li donn zot dis pies an-or, ki ena gran valer. Li dir zot, ‘Fer roulman ar sa ziska mo revini.’

¹⁴Me bann dimoun dan so prop pei ti deteste li. Zot avoy enn delegasion dir, ‘Nou pale li vinn nou lerwa.’

¹⁵Me apre ki li finn gagn so tit lerwa, li retourne. Li fer apel so bann serviter pou li kone ki profi zot ti finn fer ar larzan ki li ti finn donn zot.

¹⁶Premie la vinn devan li, e li dir, ‘Segner, to pies lor finn raport dis fwa plis.’

¹⁷Lerwa dir li, ‘Felisitasion, bon serviter! Parski to finn serye dan enn ti zafer, mo pou donn twa lotorite lor dis lavil.’

¹⁸Deziem la koste, li dir, ‘Segner, to pies lor finn raport sink fwa plis.’

¹⁹Lerwa la dir li osi, ‘Twa, mo pou donn twa sink lavil pou okipe.’

²⁰Enn lot vini ankor e li dir, ‘Segner, ala ou pies lor, ki mo finn kasiet dan mouswar.

²¹Mo ti per ou parski ou enn dimoun sever; ou pran la kot ou pa finn met nanye ek ou rekolte kot ou pa finn seme.’

²²Lerwa la dir li, ‘Serviter move, mo pou kondann twa par to prop parol. To ti kone mo sever, mo pran kot mo pa finn met nanye e mo rekolte kot mo pa finn seme.

²³Alors kifer to pa finn met mo larzan labank; letan mo retourne mo ti a repran li ar so lintere?’

²⁴Apre sa li dir dimoun ki ti la, ‘Aras so larzan, donn sa lot la ki ena dis pies lor.’

²⁵Zot dir li, ‘Segner, abe li ena deza dis pies!’

²⁶‘Ala mo dir zot, seki ena pou gagn plis ankor, me seki pena, pou perdi tigit ki li ena.

²⁷Asterla, mo bann ennmi, ki pa ti oule mo vinn zot lerwa, amenn zot isi e eliminn zot devan mwa.’ ”

²⁸Letan li fini koze, Zezi mars devan zot pou mont Zerizalem.

²⁹Letan li ariv pre ar vilaz Betfaze ek Betani, kot enn kolinn ki ti apel kolinn Pie Zoliv, li avoy de disip e

³⁰li dir zot, “Al dan vilaz ki lot kote. Letan zot rant laba, zot pou trouv enn ti bourik atase e ki zame personn pa finn monte. Larg li, amenn li isi.

³¹Si kikenn dimann zot, ‘Kifer zot finn larg sa ti bourik la?’, zot va reponn, ‘Lesegner bizin li.’ ”

³²Toulede disip ale e zot trouv tou parey kouma Zezi finn dir zot.

³³Letan zot pe larg ti bourik la, so bann propriyeter vinn dimande, “Kifer zot pe larg sa ti bourik la?”

³⁴Zot reponn, “Lesegner bizin li.”

³⁵Zot amenn bourik la ar Zezi; zot zet zot linz lor li e zot fer Zezi mont lor li.

³⁶Lor sime, dimoun tal zot linz devan li.

³⁷Letan Zezi pe koste ar Zerizalem, dan ladesant kolinn Pie Zoliv, lafoul bann disip ti ranpli ar lazwa; zot koumans sante, loue Bondie, pou bann mirak ki zot ti finn trouve.

³⁸Zot ti pe dir, “Li finn beni Lerwa ki pe vinn lor nom Lesegner! Lape dan lesiel e laglwar pou Bondie Treo!”

³⁹Detrwa Farizien ki ti dan lafoul dir Zezi, “Met, dir to bann disip res trankil.”

⁴⁰Zezi reponn, “Ala mo dir zot, si bannla res trankil, ros ki pou kriye.”

⁴¹Kan Zezi ariv pre ar Zerizalem, li plore kan li trouv lavil la.

⁴²Li dir, “Si selma zordizour to ti kone ki kapav donn twa lape; me asterla, tou kasiet devan to lizie.

⁴³Me bann zour pou vini kot to bann ennmi pou antour twa ar enn miray, pou anserkle twa e pou atak twa partou kote.

⁴⁴Zot pou kraz twa ek tou to zanfan, e pa pou les enn sel ros dibout, parski to pa finn rekonet Bondie kan li ti vinn vizit twa.”

⁴⁵Zezi rant dan tanp e pous bann marsan.

⁴⁶Li dir zot, “Dan liv finn ekrir, ‘Mo lakaz enn lakaz lapriyer.’ Me zot, zot finn fer li vinn enn kavern voler.”

⁴⁷Toulezour Zezi ti pe ansegne dan tanp. Bann sef pret, bann dokter lalwa ek dimoun bien inflian ti pe rod touy li.

⁴⁸Me zot pa ti kone kouma pou fer sa, parski tou lepep ti pe ekout li avek boukou atansion.