Read Morisien Lk 2 Bible Online

Lk 2 - Morisien bible

Lk 2

¹Sa lepok la Sezar Ogis donn lord fer resansman tou bann abitan Lanpir Romin.

²Ti fer sa premie resansman la letan Kirinyis ti gouverner provins Lasiri.

³Tou dimoun ti bizin al dan landrwa kot li ti ne, pou inskrir so nom.

⁴Zozef kit lavil Nazaret, an Galile, pou al Lazide dan lavil Betleem, la kot lerwa David ti ne, parski Zozef ti enn desandan David.

⁵Li ti al anrezistre so nom ansam ar Marie, so fianse, ki ti ansint.

⁶Letan zot ti laba, zour nesans tibaba la arive.

⁷Marie donn nesans enn garson, so premie zanfan e li anvlop li dan lanz e plas li dan enn manzwar, parski pa ti ena plas pou zot dan lasal pou vwayazer.

⁸Dan sa mem rezion la ti ena bann berze ki ti pe pas lanwit pou vey zot troupo.

⁹Enn anz Lesegner paret devan zot e laglwar Lesegner anvlop zot ar enn lalimier. Bannla gagn per.

¹⁰Me anz la dir zot, “Pa gagn per, mo pe anons zot enn gran nouvel ki pou fer lazwa boukou dimoun:

¹¹zordi dan lavil David, enn Sover, ki Lekris Lesegner, finn ne pou zot.

¹²Zot pou rekonet li par enn sign, zot pou trouv enn tibaba anvlope dan lanz e li dan enn manzwar.”

¹³Enn sel kout enn larme bann anz arive pou zwenn ansam ar sa enn anz la, zot loue Bondie e zot dir:

¹⁴“Laglwar pou Bondie lao e lape lor later ar tou seki li kontan.”

¹⁵Letan bann anz retourn dan lesiel, bann berze dir, “Anou al Betleem pou gete ki finn arive, ki Lesegner finn fer nou kone.”

¹⁶Zot degaze ale, e zot trouv Marie, Zozef, e tibaba la ki ti dan manzwar.

¹⁷Apre ki bann berze finn trouv li, zot rakont seki anz ti dir zot lor zanfan la.

¹⁸E tou seki ti ekout zot koze ti etone ar zot dialog.

¹⁹Me Marie ti gard tou sa bann kiksoz la dan so leker.

²⁰Lerla bann berze retourne; zot glorifie ek loue Bondie pou tou seki zot finn tande ek trouve parey kouma ti dir zot.

²¹Apre wit zour, letan pou sirkonsir li, zot ti apel li Zezi, sa nom lamem ki anz ti done, avan ki Marie ti ansint.

²²Letan ariv ler pou Marie ek Zozef pirifie zotmem dapre lalwa Moiz, zot al Zerizalem pou prezant Zezi devan Lesegner,

²³parey kouma ekrir dan lalwa Lesegner: “Bizin konsakre sak garson premie-ne pou Lesegner.”

²⁴Zot ti osi al ofer enn sakrifis kouma lalwa dimande: “Enn per tourtrel ou de ti pizon.”

²⁵Dan Zerizalem ti ena enn dimoun apel Simeon. Li ti viv enn lavi bien drwat, li ti devoue pou Bondie e li ti pe atann seki pou vinn sov Izrael. Lespri Sin ti ar li.

²⁶Lespri ti revel li ki li pa pou mor avan ki li trouv Lekris avoye par Lesegner.

²⁷Simeon ti inspire par Lespri Sin pou vinn dan Tanp. Bann paran Zezi ti amenn zot zanfan pouki zot akonplir seki lalwa dimande.

²⁸Simeon pran li dan so lebra e remersie Bondie, li dir,

²⁹“Asterla, Segner, les to serviter ale dan lape kouma to ti dir.

³⁰Mo lizie finn trouv to delivrans,

³¹Seki to finn prepare devan tou bann lepep;

³²Enn lalimier ki amenn revelasion ar bann payin e laglwar pou to lepep Izrael.”

³³So papa ek so mama ti etone ar tou seki ti dir lor li.

³⁴Simeon beni zot, e li dir Marie, mama Zezi, “Sa garson la pou abes ouswa pou relev boukou dan Izrael, li enn sign Bondie, ki ena dimoun pou konteste.

³⁵Bann panse ki kasiet dan leker boukou dimoun pou sorti okler, e tomem, enn lepe pou transpers to lam.”

³⁶Ti ena enn profetes osi, ki ti apel Ana, tifi Faniel, ki apartenir tribi Aser. Li ti bien vie, e ti viv set-an ar so mari.

³⁷Apre sa li finn res vev ziska laz katrovin-kat-ran. Li pa ti kit tanp, me ti servi Bondie lanwit-lizour; li ti fer karem ek lapriyer.

³⁸Li ti vinn dan tanp zis sa moman la e ti rann gras Bondie. Li ti koz sa zanfan la ar tou bann dimoun ki pe atann ki Bondie delivre Zerizalem.

³⁹Letan zot fini fer tou seki lalwa Lesegner dimande, zot retourn Galile, dan zot prop lavil Nazaret.

⁴⁰Zanfan la ti grandi e ti vinn for. Li ti ranpli ar sazes e lagras Bondie.

⁴¹Toulezan bann paran Zezi al Zerizalem pou fet Pak.

⁴²Letan li ti ena douz-an zot ti al laba kouma zot abitie fer.

⁴³Me letan fet fini, e zot retourne, garson la res Zerizalem, san ki so bann paran kone.

⁴⁴Zot ti krwar li ansam dan group ki ti pe vwayaze, alor zot finn vwayaz toutenn zourne, lerla ki zot koumans rod li parmi bann fami e kamarad.

⁴⁵Me letan zot pa trouv li zot retourn Zerizalem pou rod li.

⁴⁶Apre trwa zour zot retrouv li dan tanp, pe asize parmi bann ki ansegn lalwa, li pe ekout zot e li pe poz zot kestion.

⁴⁷Tou seki ti tann li ti etone ar so lintelizans e so repons.

⁴⁸So bann paran ti etone letan zot trouv li, e so mama dir li, “Mo garson, kifer to fer sa ar nou? To papa ek momem nou finn gagn traka ar rod twa.”

⁴⁹Li dir zot, “Kifer zot ti bizin rod mwa? Zot pa kone ki mo bizin dan lakaz mo Papa?”

⁵⁰Zot pa ti konpran so repons.

⁵¹Zezi retourn Nazaret ar so bann paran. Li ti kontign obeir zot; e so mama ti gard tousala dan so leker.

⁵²Zezi ti grandi dan sazes, ti grandi fizikman, e li ti trouv lagras devan Bondie e devan dimoun.