Read Morisien Lk 21 Bible Online

Lk 21 - Morisien bible

Lk 21

¹Zezi get partou e li trouv bann dimoun ris ki ti pe met larzan dan tron.

²Anmemtan, li trouv enn pov vev ki met de pies larzan.

³Lerla li dir zot, “Laverite, mo dir zot, sa pov vev la finn met plis ki zot tou.

⁴Zot tou zot finn met seki zot ti ena anplis me li, li finn donn tou seki li ti ena pou viv.”

⁵Devan bann dimoun ki ti pe admir bote tanp ek so bann ros,

⁶Zezi dir, “Enn zour pou vini, kot tou seki zot pe trouve la, pou devir anbalao. Pa pou res enn sel ros poze lor enn lot.”

⁷Lerla zot dimann Zezi, “Met, kan tousala pou arive? Ki sign pou fer nou kone ki sa pe vini?”

⁸“Pran kont, pa les dimoun anbet zot. Parski boukou dimoun pou vinn lor mo nom e zot pou dir, ‘Momem sa.’ ‘Ler finn arive’. Pa swiv zot.

⁹Kan zot pou tann bann lager ek bann revolision, pa gagn per; fodre ki tousala arive dabor, me lafin pa pou toutswit.”

¹⁰Apre Zezi dir, “Pei pou lev kont pei, rwayom kont rwayom.

¹¹Pou ena bann tranblemandeter terib ek lafaminn dan boukou landrwa ek bann lepidemi; pou ena osi bann gran sign terifian dan lesiel.

¹²Me avan tousala arive, bannla pou trap zot, pou persekit zot, pou livre zot dan sinagog e pou met zot dan prizon; zot pou pas anzizman devan bann lerwa ek bann gouverner akoz mo nom.

¹³Sa pou enn lokazion pou zot donn zot temwagnaz.

¹⁴Met dan zot latet ki zot pena pou prepar zot defans.

¹⁵Parski mo pou donn zot bann parol e enn sazes ki okenn adverser pa pou kapav reponn ek kontredir.

¹⁶Zot prop papa, zot prop mama, zot prop frer, zot bann konesans ek zot bann kamarad pou livre zot, e plizir parmi zot pou kondane amor.

¹⁷Tou dimoun pou air zot akoz mo nom.

¹⁸Me pa enn sel brin seve lor zot latet pou perdi.

¹⁹Tini ferm par zot perseverans, zot pou gagn lavi.”

²⁰“Kan zot pou trouv bann larme anserkle Zerizalem, lerla zot pou kone ki so lafin finn arive.

²¹Lerla dimoun Zide pou bizin sove al lor montagn, dimoun dan lavil pou bizin al lwin, e seki dan lakanpagn fode pa rant dan lavil.

²²Parski samem bann zour zizman, e tou seki deklare dan lekritir pou realize.

²³Maler pou bann fam ansint e pou bann seki pe donn baba bwar dan sa peryod la; pou ena enn gran detres lor later e lakoler Bondie pou abat lor lepep.

²⁴Bannla pou transpers zot ar pwint lepe, pou fer zot prizonie parmi bann lezot pep; sa bann pep la pou pil lor Zerizalem ziska ki letan ki finn akord zot termine.

²⁵Pou ena bann sign dan soley, lalinn ek zetwal; lor later bann pei pou viv dan langwas; zot pa pou kone ki pou fer letan zot tann tapaz violan lamer e fraka bann vag.

²⁶Dimoun pou tom sek telman zot gagn per letan zot mazinn seki pe vinn lor later; bann pwisans dan lesiel pou tranble.

²⁷Lerla zot pou trouv Garson Limanite sorti dan niaz, desann avek pwisans ek tou so laglwar.

²⁸Kan tousala pou arive, drese, lev latet parski zot delivrans pe aprose.”

²⁹Zezi rakont zot enn parabol, “Get enn pie fig ek lezot pie;

³⁰letan so bann fey pe sorti, zot kone ki lete pe vini.

³¹Li parey kan zot pou trouv sa bann evennman la arive; zot kone ki Rwayom Bondie pe aprose.

³²Laverite, laverite mo dir zot, sa zenerasion la pa pou disparet avan ki tousala arive.

³³Lesiel ek later pou disparet me mo parol pa pou disparet.”

³⁴“Pran kont pouki zot leker pa angourdi par tousort kalite kiksoz, par labwason ek bann difikilte lavi, sinon Gran Zour la pou tom lor zot san ki zot atann,

³⁵parey kouma enn piez; li pou tom lor tou dimoun ki lor later.

³⁶Gard zot lizie ouver, priye pouki zot gagn ase lafors pou sap dan bann maler ki pou arive, pou zot kapav dibout e prezant zot devan Garson Limanite.”

³⁷Dan lazourne, Zezi ti pe ansegn dan tanp me aswar, li kit lavil e li pas lanwit lor kolinn ki ti apel Kolinn Pie Zoliv.

³⁸Antie lepep ti vinn dan tanp boner gramatin pou ekout li koze.