Read Morisien Lk 23 Bible Online

Lk 23 - Morisien bible

Lk 23

¹Lasanble ki ti prezan leve e amenn Zezi devan Pilat.

²Zot koumans akiz li. Zot dir, “Nou finn trouv li pe met lepep dan trou, anpes nou pey tax Sezar, e lorla li pe dir ki limem Lemesi ek lerwa.”

³Lerla Pilat poz li enn kestion, “Eski tomem Lerwa bann Zwif?” Zezi reponn li, “Twa ki pe dir.”

⁴Pilat dir ar bann sef pret ek lafoul, “Mo pa trouv okenn sarz kont sa boug la.”

⁵Zot kriy pli for, “So lansegnman exsit lepep pou revolte partou dan Zide; li finn koumanse depi Galile e li finn ariv ziska isi.”

⁶Letan Pilat finn tann sa, li demande si sa boug la sorti Galile.

⁷Kouma li aprann ki Zezi sorti sa landrwa ki Erod ti pe administre la, li avoy li ar Erod ki ti dan Zerizalem pandan sa peryod la.

⁸Letan Erod trouv Zezi, li ti bien kontan. Depi lontan Erod ti pe anvi zwenn Zezi parski li ti finn tann koz li e li ti espere ki li pou trouv Zezi fer detrwa mirak.

⁹Li poz li boukou kestion me Zezi pa reponn nanye.

¹⁰Bann sef pret ek bann dokter lalwa ki ti pe dibout lamem akiz Zezi avek violans.

¹¹Erod ek so bann solda boufonn li, maltret li koumadir li enn pouritir. Zot abiy li kouma enn lerwa e zot reanvway li ar Pilat.

¹²Sa zour la Erod ek Pilat ti vinn de bon kamarad; avan zot pa ti kapav santi zot kamarad.

¹³Pilat reyni bann sef pret, bann dirizan ek lepep.

¹⁴Li dir zot, “Zot finn amenn devan mwa sa boug la e zot finn akiz li kouma kikenn ki pe met lepep dan trou. Mwa mo finn interoz li, e mo pa pe trouv okenn sarz ki zot finn met lor li.

¹⁵Erod osi pa finn trouv nanye e li finn reanvway li ar nou parski li pa finn komet enn fot ki merit lamor.

¹⁶Mo pou dir bannla fwet li apre sa mo pou larg li.”

¹⁷Pou sak fet Pak, Pilat ti abitie larg enn prizonie.[4]

¹⁸Me zot tou kriye bien for, “Fini li enn fwa, larg Barabas.”

¹⁹Barabas ti dan prizon parski li ti finn diriz enn emet dan lavil e li ti finn komet enn krim.

²⁰Pilat ti ankor anvi liber Zezi, alors li kontigne diskit ar zot.

²¹Me zot revolte, zot kriye pli for, “Krisifie li! Krisifie li!”

²²Trwaziem fwa, li redir zot, “Ki krim li finn fer? Mo pa trouv okenn sarz ki dir ki li merit lamor. Mo pou dimann bannla fwet li apre sa mo pou relarg li.”

²³Me zot kriye ankor pli for e zot dimann koulout li lor lakrwa. Zot lavwa dominn partou.

²⁴Lerla Pilat desid donn zot seki zot pe dimande.

²⁵Li larg sa boug ki zot ti dimann pou grasie la, e ki ti dan prizon akoz enn emet ek enn krim, e li livre zot Zezi dapre ki zot ti pe rode.

²⁶Letan bannla ti pe amenn Zezi, zot zwenn Simon ki enn abitan lavil Sirenn. Li ti sorti dan karo, li pe ale. Zot aret li pou li sarye lakrwa deryer Zezi.

²⁷Enn gran lafoul ti pe swiv li; bann fam ti pe kriye, plore e zot ti pe sagrin li.

²⁸Zezi vire, get par deryer e li dir zot, “Fam, zot ki tifi Zerizalem, pa plor pou mwa. Plor plito pou zotmem e pou zot bann zanfan.

²⁹Parski zour pou vini kot zot pou dir, ‘Bienerez bann fam ki pa kapav gagn zanfan, bann seki zame finn akouse, bann ki zame finn donn bwar.’

³⁰Alor dimoun pou dir bann montagn, Tom lor nou, ek kolinn Kasiet nou,

³¹Parski si zot fer koumsa ar dibwa ver, ki zot pou fer ar dibwa sek?”

³²Ti amenn osi ansam avek li de malfeter ki ti finn kondane amor.

³³Ler zot ariv landrwa ki ti apel Krann, zot koulout li lor lakrwa e zot met bann malfeter la, enn dan so drwat ek lotla dan so gos.

³⁴Zezi dir, “Papa pardonn zot parski zot pa kone ki zot pe fer.” Zot fer enn tiraz osor pou partaz so linz.

³⁵Lepep ti pe dibout e ti pe gete. Bann sef Zwif ti pe kontigne boufonn li. Zot ti pe dir, “Li finn sov lezot; les li sov limem si vremem li Lekris ki Bondie finn swazir.”

³⁶Bann solda boufonn li. Zot koste pre ar li e zot donn li vineg.

³⁷Zot dir li, “Si to Lerwa Zwif, sov twa tomem.”

³⁸Lao lor lakrwa ti finn ekrir, “Limem Lerwa Zwif.”

³⁹Enn sa de kriminel ki ti lor lakrwa la insilte li. Li dir li, “Eski to pa Lekris? Sov twa tomem ek sov nou.”

⁴⁰Lotla repros li, “To pa gagn per Bondie, twa ki finn kondane parey kouma li?

⁴¹Nou, nou pe gagn seki nou merite parski nou pe pey pou seki nou finn fer, me li, li pa finn fer nanye de mal.”

⁴²E li dir Zezi, “Zezi pa bliye mwa kan to vini kouma Lerwa.”

⁴³Zezi reponn li, “Laverite, laverite mo dir twa, azordi mem to pou avek mwa dan paradi.”

⁴⁴Ti apepre midi, letan teneb tom lor antie later ziska trwa-zer tanto.

⁴⁵Letan soley aret briye, rido tanp desire damilie.

⁴⁶Zezi kriye bien for, “Papa, mo met mo lespri dan to lame.” Letan li fini dir sa, li rann so dernie soupir.

⁴⁷Letan santiryon Romin trouv seki ti finn arive, li rann laglwar Bondie, li dir, “Vremem sa dimoun la ti inosan.”

⁴⁸Kan sa gran lafoul ki ti finn vini pou get spektak la trouv seki ti finn arive, zot rant kot zot latet bese.

⁴⁹Tou bann kamarad Zezi ek bann fam ki ti akonpagn li depi Galile ti pe dibout lwin e zot ti pe get seki ti pe pase.

⁵⁰Ti ena enn dimoun ki ti apel Zozef ki ti sorti Arimate, enn lavil Zwif. Li ti bon ek bien drwat e li ti enn manm Gran Tribinal bann Zwif. Li pa ti dakor ar zot desizion e zot aksion, e li ti pe atann Rwayom Bondie.

⁵¹

⁵²Zozef al get Pilat e li dimann li lekor Zezi.

⁵³Li desann so lekor e li anvlop li dan enn dra an lin e li met li dan enn tom ki ti finn kreze dan ros kot personn pa ti ankor antere.

⁵⁴Ti vandredi, zour Preparasion, e saba ti pre pou koumanse.

⁵⁵Bann fam ki ti pe swiv Zezi depi Galile vinn avek Zozef e zot trouv tom kot ti met so lekor.

⁵⁶Apre sa zot retourne e zot prepar bann delwil ek bann parfin. Zour saba, zot repoze dapre seki lalwa dir.