Read Morisien Lk 5 Bible Online

Lk 5 - Morisien bible

Lk 5

¹Zezi ti pe dibout danbor lamer Zenezaret. Lafoul ti pe pouse pou vinn pli pre ar li, pou ekout parol Bondie.

²Li trouv de pirog danbor lak, me bann peser pa ti ladan, parski zot ti pe lav zot file.

³Li mont dan pirog Simon, e li dir li al inpe pli lwin. Lerla li asize e li ansegn lafoul.

⁴Letan li fini koze, li dir Simon, “Al inpe dan fon e zet zot file.”

⁵Simon dir li, “Met, nou finn trime enn lanwit e nou pa finn gagn nanye! Me akoz to parol mo pou zet mo file.”

⁶Zot zet zot file. Lerla zot ramas enn kantite pwason; ti ena telman boukou pwason ki zot file ti pre pou desire.

⁷Zot signal zot kamarad dan lot pirog pou vinn donn zot enn koudme. Bannla koste, zot ranpli toulede pirog. Ti ena telman pwason, ki pirog ti pe koumans koule.

⁸Letan Simon Pier trouv sa, li tom azenou devan Zezi e li dir, “Segner, res lwin ar mwa, parski mo enn dimoun ranpli ar pese.”

⁹Simon ek tou bann ki ti ar li, ti etone ki finn may sa kantite pwason la.

¹⁰So bann asosie Zak ek Zan, de garson Zebede ti etone osi. Zezi dir ar Simon, “Pa bizin per. Asterla to pou al lapes dimoun.”

¹¹Letan zot fini ris pirog ater, zot kit tou, zot swiv Zezi.

¹²Zezi ti dan enn lavil, kan enn boug ki ti kouver ar lalep, trouv li. Boug la tom dan so lipie e so fron tous later. Li sipliy Zezi, “Segner, si to oule, to kapav pirifie mwa.”

¹³Lerla Zezi avoy so lame, tous li, e li dir li, “Wi, mo oule, to pou pirifie.” Toutswit so lalep kit li.

¹⁴Zezi donn li lord pa dir personn. Li dir li, “Ale, al get bann pret, al ofer enn sakrifis pou to pirifikasion, parey kouma Moiz ti finn komande. Sa pou enn prev pou lezot.”

¹⁵Lerla koze lor Zezi fann dan tou kwin lari plis ankor; lafoul dimoun ramase pou ekout li e pou gagn zot gerizon.

¹⁶Me li al dan bann landrwa retire pou priye.

¹⁷Enn zour, kan Zezi ti pe ansegne, bann Farizien ek bann dokter lalwa ti pe asize laba. Zot ti sorti dan bann vilaz Galile ek Zide e ena ki ti sorti Zerizalem. Pwisans Lesegner ti ar Zezi pou li fer gerizon.

¹⁸Zis lerla detrwa dimoun vini, zot ti pe sarye enn boug ki ti paralize lor enn brankar. Zot ti pe sey amenn li andan devan Zezi.

¹⁹Me pa ti ena sime pou pase akoz lafoul. Zot mont lao lor lakaz, zot fouy enn trou dan twa e zot desann li ar so brankar omilie lafoul devan Zezi.

²⁰Kan Zezi trouv zot lafwa, li dir, “Kamarad, to pese finn pardone.”

²¹Lerla bann dokter lalwa e bann Farizien koumans poz kestion, “Ki li krwar li ete? Li pe blasfeme. Kisannla kapav pardonn pese apar Bondie tousel?”

²²Zezi kone ki zot ti pe panse, li reponn zot, “Kifer zot ena bann panse koumsa dan zot leker?

²³Ki pli fasil pou dir, ‘To pese finn pardone,’ oubien, ‘Deboute marse’?

²⁴Me pouki zot kone ki Garson Limanite ena lotorite lor later pou pardonn pese” Zezi dir ar paralize la, “Mo dir twa, dibout, pran to brankar, al to lakaz.”

²⁵Toutswit li dibout devan zot, li pran so brankar e li al so lakaz e letan li pe ale, li glorifie Bondie.

²⁶Zot tou emerveye, e zot glorifie Bondie osi, zot ti an adorasion e zot dir, “Nou finn trouv kiksoz extraordiner zordi!”

²⁷Apre sa li sorti deor e li trouv enn komi tax ki apel Levi, ki ti pe asiz dan biro tax; Zezi dir li, “Swiv mwa.”

²⁸Li leve, li kit tou, li swiv Zezi.

²⁹Levi fer enn gran fet dan so lakaz; ti ena enn gran lafoul komi tax ek bann lezot ankor ki ti pe asiz atab.

³⁰Bann Farizien ek bann dokter lalwa ti pe fer repros ar so bann disip. Zot ti pe dir, “Kifer zot pe manze-bwar avek bann komi tax ek bann peser?”

³¹Zezi reponn, “Seki bien pa bizin dokter, me seki malad ki bizin;

³²mo pa finn vinn apel bann zis me bann peser pouki zot repanti.”

³³Lerla zot dir Zezi, “Bann disip Zan parey kouma bann disip Farizien, souvan gard karem ek priye, me twa to bann disip nek manze-bwar.”

³⁴Zezi reponn zot, “Eski bann invite kapav res karem kan nouvo marye ankor ar zot?

³⁵Pou ariv enn zour kot nouvo marye pou nepli la, lerla zot ava gard karem.”

³⁶Li dir zot enn parabol, “Personn pa pran enn bout linz nef pou rakomod enn vie linz. Sinon nef la pou desire e lorla, bout nef la pa pou al ar vie la.

³⁷Personn pa met divin nouvo dan vie barik; sinon divin nouvo pou eklat bann barik la, tou divin pou fane, e pou perdi bann barik la.

³⁸Met divin nouvo dan barik nef.

³⁹Personn pa pou anvi bwar divin nouvo, letan li finn gout vie divin parski zot dir, ‘Seki vie pli bon.’ ”