Read Morisien Lk 6 Bible Online

Lk 6 - Morisien bible

Lk 6

¹Enn zour saba, Zezi ti pe pas dan karo dible, so bann disip ti pe kas zepi dible, ki zot ti pe frot dan zot lame e zot ti pe manz lagrin la.

²Detrwa Farizien dir, “Kifer zour saba zot pe fer seki pa gagn drwa fer dapre lalwa?”

³Zezi reponn, “Eski zot pa finn lir seki David ek so bann kamarad ti fer kan zot ti pe gagn fin?

⁴Li ti rant dan lakaz Bondie, li ti pran dipin ki finn ofer Bondie, li finn manz li e li finn donn so bann kamarad osi. Dapre lalwa zis bann pret tousel gagn drwa manz sa dipin la.”

⁵Zezi redir zot, “Garson Limanite limem propriyeter saba.”

⁶Enn lot zour saba, letan li rant dan sinagog e ki li ti pe ansegne, ti ena enn boug prezan ki so lame drwat ti paralize.

⁷Bann dokter lalwa ek bann Farizien ti pe vey li, pou gete si pa li pou fer gerizon zour saba; koumsa zot ti pou gagn enn pwin pou met enn sarz lor li.

⁸Me Zezi ti konn zot panse, li dir sa dimoun ki ena lame paralize la, “Leve vinn dibout devan.” Lerla dimoun la leve, li vinn dibout devan zot.

⁹Apre sa Zezi dir ar bannla, “Mo poz zot enn kestion: ki lalwa permet zour saba? Fer dibien oubien fer dimal? Sov lavi ou detrir lavi?”

¹⁰Li get bann ki ti otour li, e li dir paralize la, “Dres to lame.” Li fer seki dir li, e so lame revinn normal.

¹¹Bannla irite e zot diskit ant zotmem pou kone ki kapav fer ar Zezi.

¹²Zezi mont lor montagn pou priye. Li pas lanwit priye Bondie.

¹³Letan barlizour leve, li apel so bann disip, e li swazir douz parmi zot, li donn zot nom apot.

¹⁴Ti ena Simon - li ti apel li Pier - ek so frer Andre, Zak ek Zan, Filip ek Bartelmi,

¹⁵Matie ek Toma, Zak garson Alfe ek Simon ki ti apel Zelot,

¹⁶Zida garson Zak ek Zida Iskaryot, ki ti trair Zezi.

¹⁷Zezi desann ansam ar zot e li aret dan enn landrwa plat. Enn kantite disip ek enn gran lafoul dimoun ki vinn depi Zide, Zerizalem ek danbor lakot Tir ek Sidon ti la osi.

¹⁸Zot ti vinn ekout li e pou gagn zot gerizon. Bann ki ti tourmante par lespri malsin ti geri.

¹⁹Tou dimoun ki dan lafoul ti pe sey tous li, parski enn lafors ti pe sorti dan li e ti pe geri zot tou.

²⁰Apre sa Zezi get so bann disip e li dir, “Bienere zot ki bann pov, Rwayom Bondie pou zot.

²¹Bienere zot ki gagn fin asterla, zot pou rasazie. Bienere zot ki pe plore asterla, zot pou riye.

²²Bienere kan dimoun air zot, e kan met zot deor, insilte zot, abes zot, mal parl zot akoz Garson Limanite.

²³Rant dan lazwa sa zour la, sot anler, parski enn gran rekonpans pe atann zot dan lesiel; parski koumsamem zot bann gran dimoun ti maltret bann profet.

²⁴Bienmalere zot ki bann ris parski zot finn deza resevwar zot konsolasion.

²⁵Bienmalere zot ki viv dan labondans aster, parski zot pou gagn fin. Bienmalere zot ki pe riye aster, parski zot pou andey e zot pou plore.

²⁶Bienmalere kan tou dimoun koz lor zot anbien, parski koumsamem zot gran dimoun ti fer ar bann fos profet.

²⁷“Me mwa mo pe dir ar zot ki pe ekout mwa, kontan zot lennmi, fer dibien dimoun ki air zot,

²⁸beni dimoun ki modi zot, priye pou seki maltret zot.

²⁹Si kikenn tap twa enn kalot lor to lazou, donn li lot kote lazou; si kikenn pran to palto, pa anpes li pran to simiz osi.

³⁰Donn tou dimoun ki dimann twa sarite; e si kikenn pran to dibien, pa dir li rann twa.

³¹Seki to ti a kontan lezot fer pou twa, fer samem pou zot.

³²Si to kontan zis bann seki kontan twa, ki rekonesans to merite ladan? Parski mem bann peser kontan seki kontan zot.

³³Si to fer dibien zis pou dimoun ki fer dibien pou twa, ki to merite ladan? Mem bann peser fer parey.

³⁴Si to pret zis dimoun ki to krwar pou rann twa, ki to merite ladan? Mem bann peser pret bann peser, pou ki zot resevwar mem som larzan.

³⁵Me zot, kontan zot lennmi, fer dibien, e prete san atann nanye anretour. Zot rekonpans pou gran, e zot pou zanfan Bondie Treo parski li bon ar bann ingra ek bann move.

³⁶Montre enn leker ranpli ar mizerikord parey kouma Bondie zot Papa.”

³⁷“Pa port zizman e personn pa pou ziz zot; pa kondane e personn pa pou kondann zot. Pardone, zot pou gagn pardon.

³⁸Done, zot pou resevwar dan pos zot tabliye enn mezir bien ranpli, bien dame e ki pe deborde; mezir ki to servi pou lezot, samem mezir ki pou servi pou twa.”

³⁹Zezi servi bann parabol ankor e li dir zot, “Eski enn aveg kapav gid enn lot aveg? Sinon eski toulede pa pou tom dan trou?

⁴⁰Enn disip pa pli gran ki so met, me tou seki gagn enn bon formasion pou kouma so met.

⁴¹Kifer to trouv lapay dan lizie to prosin, me to pa trouv poto ki dan to lizie?

⁴²Oubien, kouma to kapav dir to prosin, ‘Frer, les mo retir lapay ki dan to lizie,’ kan tomem to pa trouv poto dan to prop lizie? Twa ipokrit, tir poto ki dan to lizie avan, lerla to pou trouv kler pou tir lapay dan lizie to prosin.

⁴³“Okenn bon zarb fritie kapav donn fri gate, ek enn move zarb pa kapav donn bon fri;

⁴⁴nou rekonet sak pie par so fri. Pa kapav ramas fig dan pikan, ni rezin lor raket.

⁴⁵Enn bon dimoun prodwir dibien depi bon trezor ki dan so leker, e move dimoun prodwir lemal depi so move trezor; parski labous exprim seki debord dan leker.

⁴⁶“Kifer zot apel mwa Segner, Segner, me zot pa fer seki mo dir?

⁴⁷Mo pou montre zot kouma li ete sa dimoun ki vinn ar mwa la, ki ekout mo parol e met li anpratik.

⁴⁸Li parey kouma enn dimoun ki pe mont so lakaz. Li fouy enn transe bien fon, li poz fondasion la lor enn pavaz ros; letan inondasion vini, larivier deborde, bat ar lakaz la; lakaz la pa kraze parski li bien solid.

⁴⁹Me dimoun ki ekout mo parol me pa met li anpratik, li kouma enn dimoun ki finn mont so lakaz san fouy fondasion. Kouma larivier desann, li balye lakaz la, nanye pa reste.”