Read Morisien Lk 7 Bible Online

Lk 7 - Morisien bible

Lk 7

¹Letan Zezi fini dir tou sa bann parol la devan lafoul, li rant dan Kafarnaom.

²Laba, enn santiryon ti ena enn serviter ki li ti estim boukou. Li ti malad e ti pre pou mor.

³Kan santiryon la finn tann koz Zezi, li avoy detrwa sef Zwif al get li pou dimann li vinn geri so serviter.

⁴Kan zot ariv devan Zezi, zot sipliy li e zot dir, “Li merit ki to fer sa pou li,

⁵parski li kontan nou pep, e limem ki finn mont nou sinagog.”

⁶Zezi al ar zot. Li pa ti tro lwin ar lakaz la kan santiryon la avoy bann kamarad pou dir li, “Segner, pa deranze; parski mo pa dign ki to vinn dan mo lakaz;

⁷akoz samem mo pa finn oze vinn kot twa. Dir zis enn parol, lerla mo serviter pou geri.

⁸Parski momem mo enn dimoun ki anba lotorite mo bann sef, e mo ena solda anba mwa; e kan mo dir ar enn, ‘Ale,’ li ale; ar enn lot, ‘Vini,’ li vini; e ar mo serviter, ‘Fer sa,’ e li fer li.”

⁹Kan Zezi tann sa li ti emerveye par so bann parol, e li tourn ar lafoul ki ti pe swiv li, e li dir, “Mo dir zot, mem dan Izrael mo pa finn trouv enn lafwa koumsa.”

¹⁰Letan bann ki ti vinn get Zezi retourn lakaz, zot trouv serviter la an bonn sante.

¹¹Enn zour, Zezi ti al dan enn lavil ki ti apel Nainn. So bann disip ek enn gran lafoul ti pe swiv li.

¹²Letan li ariv devan laport lavil, ala ki lanterman enn zennom ti pe sorti. Li ti sel garson pou so mama, e so mama ti enn vev. Enn gran lafoul ti pe mars ar mama la.

¹³Letan Lesegner trouv li, so leker fer mal, e li dir mama la, “Pa plore.”

¹⁴Zezi koste ar serkey e tous li. Bann dimoun ki ti pe sarye serkey arete. Zezi dir, “Zennom, mo dir twa, leve.”

¹⁵Mor la leve, li asize, li koumans koze. Zezi rann garson la so mama.

¹⁶Lafreyer sezi bann dimoun e zot glorifie Bondie; zot dir, “Enn gran profet finn leve parmi nou e Bondie finn vizit so pep.”

¹⁷Sa nouvel la fane partou dan Zide ek dan lezanviron.

¹⁸Bann disip Zan rakont zot met tou sa bann kiksoz la. Alors Zan apel de disip

¹⁹e li avoy zot kot Lesegner pou dimann li, “Tomem ki sipoze vini la, oubien nou bizin atann enn lot?”

²⁰Letan bannla ariv kot Zezi, zot dir, “Zan Batis finn avoy nou dimann twa, ‘Eski tomem ki sipoze vini, oubien nou bizin atann enn lot?”

²¹Dan sa ler la, Zezi ti pe geri boukou malad ki dan douler, ki ti ena lespri move; e bann aveg ti pe trouv kler.

²²Alors li reponn zot, “Al dir Zan seki zot finn trouve ek seki zot finn tande: aveg trouv kler, paralize marse, bann lepre geri, bann sourd tande, bann mor leve, bann pov resevwar Bonn Nouvel.

²³Bienere seki pa tonbe akoz mwa.”

²⁴Letan bann mesaze Zan inn ale, Zezi koumans koz ar lafoul lor Zan: “Ki zot finn al gete dan dezer? Enn voun ki pe balote ar divan?

²⁵Ki zot finn al gete alor? Enn dimoun ki ti abiy ar kostim letof? Gete, bann ki met zoli linz, viv dan lix e res dan sato lerwa.

²⁶Abe ki zot finn al gete? Enn profet? Laverite, mo dir zot, li plis ki enn profet.

²⁷Lor limem Lekritir dir, ‘Mo pe avoy mo mesaze devan twa, li pou ouver enn sime devan twa.’

²⁸Mo dir zot, parmi tou seki sorti dan vant zot mama, pena personn ki pli gran ki Zan; pourtan seki pli piti dan Rwayom Bondie, pli gran ki li.”

²⁹Lafoul dimoun ek bann komi tax, ki ti tann sa, ti trouve ki Bondie zis parski zot ti deza resevwar batem Zan;

³⁰me bann Farizien e bann dokter lalwa ti rezet plan ki Bondie ti ena pou zot parski zot ti refiz batem Zan.

³¹“Ar ki mo pou konpar dimoun zordizour? Kouma zot ete?

³²Zot parey kouma bann zanfan ki pe asize lor laplas piblik e zot pe kriye zot kamarad: ‘Nou ti zwe laflit pou zot, me zot pa ti danse; nou ti sant kantik lanterman, me zot pa ti plore.’

³³Zan Batis vini, li pa manz dipin, pa bwar divin, e zot dir, ‘Li ena enn demon lor li.’

³⁴Garson Limanite vini, li manze li bwar, e zot dir, ‘Get sa, li enn gourman, enn soular e li kamarad ar komi tax ek bann peser!’

³⁵Me tou seki finn aksepte lasazes Bondie finn rekonet ki Bondie zis.”

³⁶Enn Farizien invit Zezi vinn manze kot li. Zezi ale e li asiz atab.

³⁷Dan sa lavil la, ti ena enn fam ki ti pe amenn enn move lavi. Li ti tann dir ki Zezi ti pe manze dan lakaz Farizien la; alors, li amenn enn flakon an albat ranpli ar parfin.

³⁸Li dibout deryer Zezi, kot so lipie, li ti pe plore, li ti pe mouy lipie Zezi avek so larm e li ti pe souy li avek so seve. Li ti pe anbras lipie Zezi e vers parfin lor so lipie.

³⁹Letan Farizien ki ti invit Zezi trouv sa, li dir dan limem, “Si vremem li ti enn profet li ti pou kone ki kalite fam pe tous li e ki li enn fam move lavi.”

⁴⁰Zezi dir li, “Simon, mo ena enn kestion pou poz twa.” Li dir Zezi, “Koze Met.”

⁴¹Zezi dir Simon, “Ti ena de dimoun ki ti dwa enn kaser; enn ti dwa sink-san pies larzan, lot ti dwa sinkant.

⁴²Letan zot pa ti kapav ranbourse, li ti rey zot det. Dir mwa, kisannla pou plis kontan li?”

⁴³Simon reponn, “Mo sipoze seki ti ena pli gro det la.” Zezi dir li, “To ena rezon.”

⁴⁴Zezi vire get madam la, li dir Simon, “To trouv sa madam la? Mo finn rant kot twa, to pa finn donn mwa dilo pou lav mo lipie, me li, li finn tranp mo lipie ar so larm e li finn souy li ar so seve.

⁴⁵To pa finn anbras mwa, me depi ki mo finn rantre, li pa finn aret anbras mo lipie.

⁴⁶To pa finn vers delwil lor mo latet, me li finn frot mo lipie avek parfin.

⁴⁷Ala mo dir twa, tou so pese finn pardone parski li finn montre boukou lamour. Dimoun ki gagn tigit pardon, montre tigit lamour”.

⁴⁸Lerla Zezi dir madam la, “Tou to pese finn pardone.”

⁴⁹Bann ki ti la dir ant zotmem, “Ki li ete li pou li mem oze pardonn bann pese?”

⁵⁰Lerla Zezi dir ar madam la, “To lafwa finn sov twa, al anpe.”