Read Morisien Lk 8 Bible Online

Lk 8 - Morisien bible

Lk 8

¹Zis apre, Zezi travers bann lavil ek bann vilaz pou anons ek proklam Bonn Nouvel Rwayom Bondie. Ledouz ti avek li,

²ek detrwa madam lor ki Zezi ti tir bann lespri move e ti geri zot bann maladi. Parmi ti ena Marie, ki ti apel Magdala lor ki ti ena set demon ki Zezi ti pouse,

³Zann, fam Souza ki ti enn administrater kot Erod, ti ena osi Sizann, e boukou lezot ankor, ki ti servi zot dibien pou ed Zezi ek bann disip.

⁴Kan enn gran lafoul dimoun sorti dan bann lavil e vinn ar Zezi, li dir zot enn parabol,

⁵“Enn planter sorti pou sem so bann lagrin; pandan li seme, inpe tom lor sime, dimoun mars lor la, e bann zwazo lesiel vinn manz tou.

⁶Inpe tom lor ros; letan zot grandi, zot sek parski ti mank limidite.

⁷Inpe tom dan pikan, e kan pikan la grandi ansam avek bann lagrin la, li touf zot.

⁸Inpe tom dan bon later, e kan zot grandi, zot prodwir san fwa plis.” Letan li fini dir sa, li dir avek otorite, “Seki ena zorey pou tande, li a tande!”

⁹So bann disip dimann li ki sa vedir sa parabol la.

¹⁰Li dir, “Zot, finn donn zot konesans sekre Rwayom Bondie; me ar lezot mo koz an parabol, koumsa ‘zot pou gete san trouve, e zot pou tande san konpran.’

¹¹“Ala seki sa parabol la vedir: lagrin la, parol Bondie.

¹²Seki tom dan bor sime, sa bann ki finn tande me lerla diab vini, aras parol dan zot leker pouki zot pa krwar e zot pa sove.

¹³Seki tom lor ros, sa bann ki tann laparol e zot resevwar li dan lazwa; me zot pena rasinn, zot krwar pou enn letan e kan difikilte vini zot abandonn lafwa.

¹⁴Seki tom dan pikan, sa bann ki tande, me kan traka, larises ek plezir lavi vini, li touf zot; zot fri pa mir.

¹⁵Seki tom dan bon later, sa bann ki ekout laparol, gard li dan enn leker bon ek onet, e zot raport fri ar pasians ek perseverans.

¹⁶“Personn pa alim enn lalanp pou kouver li ar enn vaz, oubien met li anba lili, me li met li lor enn stenn, pouki seki rantre kapav trouv lalimier.

¹⁷Tou seki kasiet pou vinn dan lalimier e tou seki sekre pou devwale e pou vinn dan kler.

¹⁸Alor fer atansion manier ki zot ekoute parski seki ena pou gagn plis e seki pena, mem seki li krwar li ena, pou ras tou ar li.”

¹⁹Lerla so mama ek so bann frer vinn zwenn li, me zot pa ti reysi koste ar li akoz lafoul.

²⁰Bannla dir li, “To mama ek to bann frer pe dibout deor, zot anvi trouv twa.”

²¹Me li reponn zot, “Seki ekout Parol Bondie ek met li anpratik samem mo mama ek mo bann frer.”

²²Enn zour li rant dan enn pirog ar so bann disip, e li dir zot, “Anou al lot kote lak.” E zot ale.

²³Lor bato, Zezi gagn somey. Enn koudvan leve lor lak, pirog koumans pran dilo, lerla zot lavi andanze.

²⁴Bannla al lev li, zot kriye, “Met, Met, nou pe mor!” Zezi leve, li menas divan ek gran laoul, lerla gagn enn akalmi.

²⁵Li dir zot, “Kot zot lafwa ete?” Zot gagn per e zot sezi, e sakenn dir ar so kamarad, “Kisannla sa, li komann divan ek dilo, e bannla obeir li?”

²⁶Lerla zot ariv pei bann Zerazenien, ki vizavi ar Galile.

²⁷Kouma li debarke, enn abitan lavil ki ti posede ar boukou demon vinn zwenn li. Depi lontan li ti finn aret met linz e li pa ti pe res dan lakaz me dan simitier.

²⁸Kan li trouv Zezi, li zet so lekor devan Zezi e li kriye for-for, “Ki to oule ar mwa, Zezi, Garson Bondie Treo? Mo sipliy twa, pa tourmant mwa.”

²⁹Zezi donn move lespri lord pou sorti lor sa dimoun la. (Enn kantite fwa lespri la ti akapar li; lerla zot ti atas so lame ek so lipie ar lasenn pou tini li, me li ti kas lasenn e demon ti sarye li dan dezer.)

³⁰Lerla Zezi dimann li, “Ki to nom?” Li reponn, “Lezion,” - parski enn pake demon ti rant dan li.

³¹Zot sipliy Zezi pouki li pa avoy zot dan pwi-san-fon.[1]

³²Be ti ena enn gran troupo koson ki ti pe manze lor kolinn; bann demon la sipliy Zezi pou les zot rant dan bann koson la. Zezi donn zot permision.

³³Lerla bann demon la sorti ar li, rant dan bann koson ki ti la, ek troupo la deval lapant, tom dan lak e zot nwaye.

³⁴Letan bann gardien troupo trouv seki finn arive, zot sove zot al rakont sa dan lavil ek dan lakanpagn.

³⁵Lerla bann dimoun vinn gete ki finn arive vremem; letan zot koste ar Zezi zot trouv sa dimoun ki ti posede par demon la, pe asiz kot lipie Zezi, so linz lor li e li sindespri. Lerla zot gagn per.

³⁶Bann ki ti finn trouv sa, rakont lezot kouma posede la ti geri.

³⁷Lerla tou bann abitan dan lezanviron ek bann Zerazenien dimann Zezi kit zot lavil ale parski zot ti gagn enn gran lafreyer. Alors Zezi rant dan pirog e li retourne.

³⁸Sa dimoun ki demon ti finn kit li la, sipliy Zezi pou res ar li; me Zezi ranvway li. Li dir,

³⁹“Retourn kot twa, e al rakonte seki Bondie finn fer pou twa.” Li ale, li proklam partou dan lavil seki Zezi inn fer pou li.

⁴⁰Letan Zezi retourne, lafoul akeyir li parski zot tou ti pe atann li.

⁴¹Ala enn sef sinagog ki ti apel Zair vinn get Zezi. Sef la tom dan so lipie e li sipliy Zezi pou vinn kot li.

⁴²Zair ti ena enn sel tifi ki ti ena ape pre douz-an, e li ti pe mor. Letan Zezi ale, lafoul antour li e dimoun ti pe pouse.

⁴³Ti ena enn madam parmi, ki ti ena enn lemorazi ki ti pe minn li depi douz-an. Li ti finn depans tou seki li ti ena ar dokter. Personn pa finn kapav geri li.

⁴⁴Li vinn deryer Zezi e li tous rebor so linz. Toutswit li aret segne anplas.

⁴⁵Zezi dir, “Kisannla finn tous mwa?” Tou dimoun res trankil, lerla Pier dir li, “Met, enn gro lafoul pe antour twa e dimoun pe pouse.”

⁴⁶Zezi dir, “Kikenn finn tous mwa. Mo kone enn lafors finn sorti dan mwa.”

⁴⁷Letan madam la trouve ki finn dekouver li, li gagn tranbleman, li tom dan lipie Zezi e li dir devan tou dimoun kifer li ti finn tous Zezi e kouma li finn geri toutswit.

⁴⁸Zezi dir li, “Mo tifi, to lafwa finn sov twa; al anpe.”

⁴⁹Letan Zezi pe dir sa, enn dimoun sorti lakaz sef sinagog e dir li, “To tifi finn mor, pa deranz Met plis ki sa.”

⁵⁰Me letan Zezi tann sa, li dir Zair, “Pa per, zis krwar e to tifi pou sove.”

⁵¹Letan Zezi ariv lakaz Zair, li pa les personn rant ansam ar li, zis Pier, Zan, Zak, papa ek mama tifi la osi.

⁵²Tou dimoun ti pe plore, e kriye, akoz tifi la. Me Zezi dir zot, “Pa plore. Tifi la pa finn mor, li zis pe dormi.”

⁵³Me zot riy li, parski zot kone ki tifi la finn fini mor.

⁵⁴Zezi pran lame tifi la e dir li, “Zennfi, leve!”

⁵⁵Lespri tifi la retourne, e li leve deswit. Zezi dimann bannla donn li kiksoz pou manze.

⁵⁶Bann fami tifi la ti etone; me Zezi donn zot lord pa dir personn ki finn arive.