Read Morisien Lk 9 Bible Online

Lk 9 - Morisien bible

Lk 9

¹Zezi apel Ledouz e li donn zot pouvwar ek lotorite pou sas tou bann demon e pou geri tou bann maladi.

²Li avoy zot al proklam Rwayom Bondie e al geri bann malad.

³Li dir zot, “Pa pran nanye pou zot vwayaz, okenn baton, ni sak, ni dipin, ni larzan, mem pa enn semiz anplis.

⁴Kan zot rant dan enn lakaz, res lamem, ziska ki zot kit landrwa la.

⁵La kot pa akeyir zot, tap zot lipie, tir tou lapousier letan zot kit lavil la. Li pou enn temwagnaz kont bannla.

⁶Ledouz sorti ale; zot al dan bann vilaz, zot amenn Bonn Nouvel laba e zot geri bann malad partou kot zot pase.

⁷Erod, lerwa Galile, ti pe tann tou seki ti pe pase, e li pa ti pe konpran parski ena ti pe dir ki Zan finn resisite,

⁸ena ti pe dir Eli finn aparet, e lezot ti pe dir, li enn parmi bann ansien profet ki finn releve.

⁹Erod dir, “Mo finn dekapit Zan; me ki sa dimoun lor ki mo pe tann tou sa bann koze la?” Alor li ti pe anvi zwenn Zezi.

¹⁰Letan bann apot retourne, zot rakont Zezi tou seki zot finn fer. Li pran zot, e li amenn zot apar dan lavil Betsaida.

¹¹Kan lafoul ti konn sa, zot ti swiv li; li ti akeyir zot, li ti koz ar zot lor Rwayom Bondie, e li ti geri bann ki ti bizin geri.

¹²Lazourne ti pe al fini e Ledouz vinn ar Zezi, zot dir li, “Fer lafoul la ale, pouki zot al dan bann vilaz ek bann laferm dan landrwa, pou gagn enn plas pou manze ek dormi; parski nou lwin ar tou isi.”

¹³Me li dir zot, “Donn bannla manze zotmem.” Zot reponn, “Nou ena zis sink dipin ek de pwason - amwin ki nou al aste manze pou tou sa bann dimoun la.”

¹⁴Ti ena apepre sink mil zom. Li dir ar so bann disip, “Fer bannla asiz par group sinkant.”

¹⁵Lerla zot fer tou dimoun asize.

¹⁶Zezi pran sink dipin ek de pwason la, li lev so lizie, li get lesiel, li beni zot, li kas zot, e li donn so bann disip pou distribie ar lafoul.

¹⁷Tou dimoun manze ziska vant plin. Zot ramas douz panie ranpli ar bout-bout dipin ki ti finn reste.

¹⁸Zezi ti pe priye tousel e ti ena zis so bann disip ki ti la; li dimann zot, “Ki dimoun dir mo ete?”

¹⁹Zot reponn, “Zan Batis; me ena dir, Eli; e lezot dir ki to enn parmi bann ansien profet ki finn resisite.”

²⁰Li dir so bann disip, “Me zot, ki zot dir mo ete?” Pier reponn, “Tomem Mesi Bondie.”

²¹Lerla li donn zot lord pa dir sa personn.

²²Li dir, “Garson Limanite bizin soufer boukou, bann ansien, bann sef pret e bann dokter lalwa pou rezet li, zot pou touy li, lor trwaziem zour li pou resisite.”

²³Apre sa li dir zot tou, “Si kikenn anvi swiv mwa, li bizin aret pans zis limem, pran so lakrwa toulezour e swiv mwa.

²⁴Seki anvi sov so lavi, pou perdi li; seki perdi so lavi akoz mwa, pou sov li.

²⁵Kiserti enn dimoun gagn lemonn antie pouki apre li perdi limem oubien detrir so lavi?

²⁶Seki gagn onte akoz mwa ek akoz mo parol, Garson Limanite pou ont li, kan li pou vinn dan so laglwar, dan laglwar so Papa ek bann anz ki sin.

²⁷Me laverite mo dir zot, ena parmi zot ki pa pou konn lamor avan ki zot trouv Rwayom Bondie.”

²⁸Wit zour apre ki Zezi ti finn dir sa bann parol la, li ti pran Pier, Zan ek Zak e li ti mont lor montagn pou al priye.

²⁹Letan li pe priye, so figir sanze e so linz vinn enn blan ki kas lizie.

³⁰Ennselkout de dimoun ti pe koz ar li: Moiz ek Eli.

³¹Zot aparet dan laglwar, e zot pe koz lor so depar ki ti pre pou realize dan Zerizalem.

³²Pier ek so bann kamarad ti dan enn profon somey; letan zot leve, zot trouv laglwar Zezi ek sa de ki ti ar li la.

³³Letan sa de la kit Zezi, Pier dir li, “Met, li bon nou isi; anou dres trwa latant, enn pou twa, enn pou Moiz ek enn pou Eli.” Me li pa ti kone ki li ti pe dir.

³⁴Kan li ti pe koze, enn niaz ti vinn kouver zot; zot ti gagn per letan niaz la anvlop zot.

³⁵Enn lavwa sorti dan niaz, dir, “Samem mo Garson ki mo finn swazir. Ekout li!”

³⁶Letan lavwa la aret koze, zot nek trouv Zezi tousel. Sa lepok la, zot ti res trankil, zot pa ti rakont personn seki zot ti trouve.

³⁷Landime, zot desann depi montagn, enn gran lafoul vinn zwenn Zezi.

³⁸Ala ki enn boug dan lafoul kriye, “Met, mo sipliye twa vinn get mo garson, mo sel piti;

³⁹enn kout lespri sezi piti la; piti la irle, li gagn konvilsion, li kime e lespri la maltret li, sakouy li e larg li avek difikilte.

⁴⁰Mo finn sipliy to bann disip pou sas sa lespri la, me zot pa finn kapav fer nanye.”

⁴¹Zezi dir, “Ziska kan mo pou res ar zot, pou siport zot, zenerasion san lafwa ranpli ar mesanste? Amenn to garson isi.”

⁴²Letan garson la vini, demon la zet li ater, sakouy-sakouy li. Me Zezi menas lespri inpir la, geri garson la e retourn li so papa.

⁴³Zot tou ti inpresione par grander inkonparab Bondie. Alor ki zot tou ti pe emerveye par tou seki li pe ti fer, li dir so bann disip,

⁴⁴“Les sa parol la rant bien dan zot zorey: Garson Limanite pou livre dan lame bann zom.”

⁴⁵Me zot pa ti konpran sa parol la; li ti res flou dan zot latet pouki zot pa konpran. Zot ti gagn per pou poz li kestion lor sa size la.

⁴⁶Bann disip koumans diskite kisannla pli gran parmi zot.

⁴⁷Me Zezi ti konn zot panse. Alors li pran enn zanfan, li plas li pre ar li

⁴⁸e li dir zot, “Dimoun ki akeyir sa zanfan la lor mo nom, pe akeyir momem, e seki akeyir mwa pe akeyir Sa-Enn ki finn avoy mwa la; parski pli tipti parmi zot tou, limem pli gran.”

⁴⁹Zan pran laparol, “Met, nou finn trouv enn dimoun pe servi to nom pou pous demon, nou finn anpes li, parski li pa dan mem group ki nou.”

⁵⁰Me Zezi dir li, “Pa anpes li, parski seki pa kont twa, li ar twa.”

⁵¹Letan ler ti pe arive kot Zezi pou kit lemonn, li ti met latet devan pou mont Zerizalem.

⁵²Li avoy bann mesaze devan li. Bannla rant dan enn vilaz Samaritin pou prepar so larive.

⁵³Me bann abitan sa vilaz la refiz akeyir li parski li ti pe monte pou al Zerizalem.

⁵⁴Letan Zak ek Zan trouv sa, zot dir, “Segner, to oule nou fer dife sort dan lesiel tom lor zot pou detrir zot?”

⁵⁵Zezi vire get zot, e li menas zot.

⁵⁶Lerla zot al dan enn lot vilaz.

⁵⁷Lor larout enn dimoun dir Zezi, “Mo pou swiv twa partou kot to ale.”

⁵⁸Zezi dir li, “Renar ena lakaz pou reste, zwazo dan lesiel ena so nik, me Garson Limanite pena enn plas pou poz so latet.”

⁵⁹Zezi dir enn lot, “Swiv mwa.” Me li reponn, “Segner, les mwa anter mo papa avan.”

⁶⁰Me Zezi dir li, “Les bann mor anter bann mor; twa, al anons Rwayom Bondie.”

⁶¹Enn lot dir li, “Mo pou swiv twa, Segner, me les mo al dir orevwar mo fami avan.”

⁶²Zezi dir li, “Seki pe labour later e get par deryer, li pa dign pou Rwayom Bondie.”