Read Morisien Zn 15 Bible Online

Zn 15 - Morisien bible

Zn 15

¹“Mwa, mo vre pie rezin, mo Papa, propriyeter karo.

²Tou brans ki lor sa pie la e ki pa raporte, mo Papa tir zot zete; me tou brans ki raporte, li tay zot pouki zot donn ankor plis.

³Zot finn deza pirifie par parol ki mo finn dir zot.

⁴Res ar mwa, kouma mwa mo res ar zot. Parey kouma enn brans pa kapav raport fri si li pa res lor pie rezin la, zot osi, zot pa pou kapav fer nanye si zot pa res ar mwa.

⁵Mwa, mo pie rezin e zot, zot bann brans. Dimoun ki res ar mwa e mwa ar zot, zot pou raport enn kantite fri parski san mwa zot pa kapav fer nanye.

⁶Si kikenn pa res ar mwa, pou zet li deor parey kouma fer ek enn brans ki pa raporte; lerla li pou sek. Dimoun ramas sa bann brans la, zet zot dan dife e zot brile.

⁷Si zot res ar mwa e mo parol res ar zot, tou seki zot demande zot pou gagne.

⁸Mo Papa glorifie, ler zot raport boukou fri e ler zot vinn mo bann disip.

⁹Kouma mo Papa kontan mwa, mwa osi mo kontan zot. Res dan mo lamour.

¹⁰Si zot gard mo bann komannman, zot pou res dan mo lamour parey kouma mwa, mo gard komannman mo Papa e mo res dan so lamour.

¹¹Mo finn dir zot tousala pouki mo lazwa res dan zot e ki zot lazwa konple dan enn gran lazwa.

¹²Ala mo komannman, kontan zot prosin, parey kouma mwa mo kontan zot.

¹³Pena pli gran lamour ki existe ler kikenn donn so lavi pou so bann kamarad.

¹⁴Zot mo bann kamarad si zot fer tou seki mo komann zot.

¹⁵Mo nepli apel zot serviter, parski enn serviter pa kone ki so met fer; mo apel zot kamarad, parski tou seki mo finn tande kot mo Papa, mo finn fer zot kone.

¹⁶Pa zot ki finn swazir mwa, me mwa ki finn swazir zot. Mo finn donn zot mision, ale, raport fri e ki zot fri dire. Lerla tou seki zot demann mo Papa lor mo nom, li pou donn zot.

¹⁷Mo donn zot enn komannman: kontan zot prosin.

¹⁸Kan lemonn pou air zot, pa bliye ki li finn air mwa avan.

¹⁹Si zot ti viv pou lemonn, lerla lemonn ti pou konsider zot kouma so prop zanfan; me zot pa pou lemonn; mwa, mo finn swazir zot, mo finn tir zot dan lemonn, akoz samem lemonn air zot.

²⁰Rapel parol ki mo finn dir zot, ‘Enn serviter pa pli gran ki so met.’ Si bannla finn persekit mwa, bannla pou persekit zot osi. Si bannla swiv mo parol, bannla pou swiv zot parol osi.

²¹Me bannla pou fer tousala parski zot ar mwa e parski bannla pa konn Sa-Enn ki finn avoy mwa la.

²²Si mo pa ti vini e mo pa ti koz ar bannla, zot pa ti pou ena pese me asterla zot pena okenn exkiz pou zot pese.

²³Dimoun ki air mwa, air mo Papa osi.

²⁴Si mo pa ti fer pou zot, travay ki personn pa kapav fer, zot ti pou ena bon exkiz pou zot bann pese; me asterla zot finn trouve e zot kontigne air mwa ek mo Papa.

²⁵Tousala finn arive pouki parol lalwa realize, ‘Zot pou air mwa san okenn rezon.’

²⁶Kan Sa-Enn ki pou defann zot la pou vini, li pou donn so temwagnaz lor mwa. Li sorti kot mo Papa; mo pou avoy li e limem Lespri laverite.

²⁷Zot osi zot pou donn zot temwagnaz parski depi komansman zot avek mwa.”