Read Morisien Zis 1 Bible Online

Zis 1 - Morisien bible

Zis 1

¹Dan mo premie liv, Teofil, mo finn ekrir lor tou seki Zezi ti koumans fer ek ansegne

²ziska ki li mont dan lesiel. Avan sa, li ti donn instriksion, par Lespri Sin, bann apot ki li ti swazir.

³Apre so lamor, li ti donn zot boukou prev ki li ankor vivan. Li ti aparet ar zot pandan karant zour e li ti koz ar zot lor Rwayom Bondie.

⁴Letan li ti pe manze ansam ar zot, li ti donn zot lord napa kit Zerizalem, me atann ki promes so Papa realize kouma li ti dir,

⁵“Zan finn batiz ar dilo, me zot, dan enn de zour zot pou resevwar batem dan Lespri Sin.”

⁶Alor ler zot ti zwenn ansam, zot dimann Zezi, “Segner, eski asterlamem ki to pou remet Rwayom Izrael dibout?”

⁷Zezi reponn, “Zot pena pou kone ki ler ki moman, mo Papa limem finn deside.

⁸Me zot pou gagn enn lafors kan Lespri Sin pou desann lor zot - lerla zot pou vinn mo temwin dan Zerizalem, dan Zide ek Samari e partou lor later.”

⁹Kouma Zezi ti fini koze, li ti mont dan ler e li disparet dan enn niaz.

¹⁰Zot ti ankor pe get li monte dan lesiel kan zot trouv de zom anblan kot zot

¹¹ki dir zot, “Bann abitan Galile, kifer zot pe kontign get lao dan lesiel koumsa? Sa Zezi la ki finn separe ar zot pou al dan lesiel, pou retourne parey kouma zot finn trouv li ale.”

¹²Lerla zot ti retourn Zerizalem depi Kolinn Pie Zoliv, enn distans ki ti permet pou marse zour saba, setadir enn kilomet.

¹³Kan zot ti ariv Zerizalem, zot ti mont dan lasam dan lakaz kot zot ti pe reste; la ti ena Pier, Zan, Zak ek Andre, Filip ek Toma, Bartelmy ek Matie; Zak garson Alfe, Simon Zelot e Zid, garson Zak.

¹⁴Zot tou ti plonze dan lapriyer ansam avek detrwa fam. Parmi ti ena Marie, mama Zezi ek so bann frer.

¹⁵Detrwa zour apre, Pier debout dan milie bann frer ki ti la; ti ena anviron san-vin e li ti dir,

¹⁶“Mo bann frer, Lekritir ti bizin akonpli, la kot Lespri Sin ti predir par labous David konsernan Zida ki ti servi kouma gid letan bannla ti vinn aret Zezi.

¹⁷Li ti parmi nou e li ti ena so par dan nou mision.”

¹⁸(Sa zom la finn aste enn terin avek kas ki li ti finn resevwar pou so traizon - li finn tom tou so grander, so vant finn ouver e tou so trip finn sorti deor.

¹⁹Tou dimoun Zerizalem finn konn sa e zot finn apel sa terin la ‘Akeldama’, seki vedir, ‘Karo disan.’)

²⁰“Koumsamem finn ekrir dan liv Psom: ‘Ki so Lakaz vinn dezer, ki personn pa res ladan.’ Finn osi ekrir: ‘Ki enn lot pran so plas.’

²¹Parmi bann dimoun ki ti mars avek nou depi batem Zan letan Lesegner Zezi ti ale-vini parmi nou ziska ki li ti remont dan lesiel,

²²omwin enn bizin zwenn ar nou pou fer temwagnaz lor rezireksion Zezi.”

²³Zot ti propoz de nom: Zozef ki ti apel Barsabas (li osi apel Zistis) ek enn lot ki ti apel Matias.

²⁴Lerla zot ti priye e dir, “Segner, twa ki konn leker tou dimoun, dir nou kisannla ant sa de la to finn swazir pou ranplas

²⁵Zida ki finn abandonn so plas apot pou al kot li finn ale.”

²⁶Zot tir lakourt-pay e nom Matias sorti. Li ti vinn zwenn avek lezot onz apot.