Read Morisien Zis 10 Bible Online

Zis 10 - Morisien bible

Zis 10

¹Dan Sezare ti ena enn zom ki ti apel Korney. Li ti kapitenn enn divizion larme ki ti apel ‘Batayon Italien.’

²Li ti bien relizie; li ansam ar tou so fami ti ador Bondie. Li ti bien ed bann pov e toultan li ti priye Bondie.

³Enn zour ver trwa-zer tanto, li fer enn vizion. Li trouv enn anz Bondie ki rant kot li e ki dir li, “Korney!”

⁴Li get anz la avek freyer e li dir, “Ki ena, Segner?” Anz la dir li, “Bondie finn pran kont to lapriyer ek led ki to donn bann pov.

⁵Asterla, avoy dimoun Zope pou amenn Simon, ki zot apel Pier.

⁶Li pe res kot Simon, enn zouvrie ki travay lapo e ki res dan borlamer.”

⁷Kan anz la finn ale, Korney apel de serviter ek enn solda ki ti bien relizie e ki ti servi li.

⁸Li rakont zot tou saki finn arive, e li avoy zot Zope.

⁹Landime ver midi letan zot ti pe vwayaze e ti pe apros Zope, Pier al lao lor twa lakaz pou priye.

¹⁰Li koumans gagn fin e li ti pe anvi manze. Pandan ki ti pe prepar enn repa pou li, li gagn enn vizion.

¹¹Li trouv lesiel ouver ek enn kiksoz ki resanble enn nap ki pe desann par so kat kwin.

¹²Ladan ti ena tousort kalite zanimo, reptil ek zwazo.

¹³Enn lavwa dir li, “Pier, leve; touye, manze.”

¹⁴Me Pier reponn, “Non, zame, Segner. Mo pa finn zame manz kiksoz ki interdi e pa finn pirifie.”

¹⁵Lavwa enn deziem fwa dir li, “Pa konsider kiksoz inpir si Bondie finn deklar li prop pou manze.”

¹⁶Sa ti arive trwa fwa, lerla lobze la retourn dan lesiel lao.

¹⁷Letan Pier pe reflesi lor kisavedir sa vizion la, bann dimoun ki sorti kot Korney ti reysi trouve kikote lakaz Pier ete. Zot finn aret devan laport lantouraz.

¹⁸Zot kriye pou dimande si Pier ti res dan sa lakaz la.

¹⁹Pier ti ankor pe sey konpran vizion la letan Lespri dir li, “Gete, ena trwa zom ki pe rod twa.

²⁰Leve e desann. Pa ezite pou swiv zot parski mwa ki finn avoy zot.”

²¹Pier desann e li dir bannla, “Momem ki zot pe rode. Kifer zot finn vinn isi?”

²²Zot reponn li, “Kapitenn Korney ki finn avoy nou isi. Li enn dimoun drwat ki ena bel respe pou Bondie, e bann Zwif bien estim li. Enn anz Bondie ki finn dir li invit twa dan so lakaz pou li ekout seki to ena pou dir.”

²³Pier invit zot rantre pou pas lanwit kot li. Landime li prepar limem pou al ar zot. Detrwa bann frer dan Zope ti akonpagn li.

²⁴Se nek zour apre ki zot ariv Sezare. Korney ti pe atann ki zot vini, alor li finn reyni so bann fami e kamarad pros.

²⁵Zis letan Pier pou rantre, Korney vinn zwenn li e li tom dan so lipie, li kourb devan li pou montre so respe.

²⁶Me Pier fer li leve. Pier dir li, “Leve. Mo nek enn zom parey kouma twa.”

²⁷Li kontign koz ar Korney pandan ki zot rant dan lakaz, e la li trouv enn kantite dimoun ki finn vinn ansam.

²⁸Li dir zot, “Zot tou bien kone ki dapre lalwa, enn Zwif pa asosie limem ar enn etranze, e li pa frekant lezot ki pa Zwif. Me Bondie finn montre mwa ki fode pa mo konsider okenn dimoun inpir oubien indign pou mo frekant li.

²⁹Akoz sa, kouma zot finn apel mwa pou vini, mo pa finn ena okenn obzeksion. Asterla, mo kapav dimann zot kifer finn apel mwa isi?”

³⁰Korney reponn, “Ena trwa zour letan mo ti dan mo lakaz mo pe priye, apepre sa lerlamem, trwa-zer lapre-midi, enn sel kout enn dimoun avek enn linz bien briyan, paret devan mwa.

³¹Li dir mwa, ‘Korney, Bondie finn pran kont to lapriyer ek led ki to donn bann pov.

³²Avoy dimoun Zope pou amenn Simon, ki zot apel Pier. Li pe res kot Simon, enn zouvrie ki travay lapo e ki res danbor lamer.’

³³Alor mo finn fer apel twa toutswit, e to finn vremem bon pou aksepte vini. Nou tou la, dan prezans Bondie pou ekout seki Bondie finn komann twa pou dir nou.”

³⁴Pier pran laparol, li dir, “Asterla mo realize ki Bondie tret tou dimoun parey lor mem baz.

³⁵Bondie aksepte ninport ki dimoun dan ninport ki nasion si li ador li e fer seki drwat.

³⁶Zot konn mesaz ki li finn avoy lepep Izrael, enn Bonn Nouvel ki ena lape par Zezi Kris ki Lesegner tou dimoun.

³⁷Zot kone ki finn arive premie dabor dan Galile, ek answit partou dan Zide, apre batem ki Zan ti anonse.

³⁸Zot kone kouma Bondie ti vers pwisans Lespri Sin lor Zezi ki sorti Nazaret. Li ti al partou, li fer dibien e ti geri tou dimoun ki ti may dan pouvwar diab, parski Bondie ti avek li.

³⁹E nou, nou temwin tou seki li finn fer dan pei Izrael ek dan Zerizalem. Bannla finn koulout li lor lakrwa pou touy li.

⁴⁰Me lor trwaziem zour Bondie finn relev li parmi bann mor, e fer li aparet.

⁴¹Pa tou dimoun ki finn trouv li, me bann temwin ki Bondie ti finn fini swazir, setadir nou ki finn manze-bwar ar li apre ki li ti regagn lavi.

⁴²Li finn komann nou anons Bonn Nouvel e rann temwagnaz ki limem ki Bondie finn swazire kouma ziz lor bann vivan ek bann mor.

⁴³Tou bann profet ti koz lor li. Zot ti dir seki krwar dan li pou resevwar pardon zot pese par pwisans so nom.”

⁴⁴Letan Pier ti ankor pe dir sa bann parol la, Lespri Sin ti desann lor tou seki ti pe ekout so mesaz.

⁴⁵Bann krwayan ki lorizinn Zwif e ki ti akonpagn Pier, ti etone ki don Lespri Sin ti osi verse lor bann dimoun ki pa Zwif.

⁴⁶Zot tann bannla koz anlang etranz e zot pe loue grander Bondie. Lerla Pier dir,

⁴⁷“Sa bann dimoun la finn resevwar Lespri Sin parey kouma nou, eski zot krwar nou kapav anpes zot batize dan dilo?”

⁴⁸Alor li donn lord ki batiz zot dan nom Lesegner Zezi Kris. Bannla dimann Pier res kot zot ankor detrwa zour.