Read Morisien Zis 11 Bible Online

Zis 11 - Morisien bible

Zis 11

¹Bann apot ek bann frer ki ti dan Zide ti tann dir ki bann non-Zwif osi finn resevwar parol Bondie.

²Lerla, letan Pier retourn Zerizalem, bann krwayan ki anfaver sirkonsizion dir,

³“To finn al kot bann ki pa fer sirkonsizion ek to finn mem manz avek zot.”

⁴Lerla Pier koumans explik zot andetay seki finn arive. Li dir zot,

⁵“Mo ti pe priye dan lavil Zope e mo finn gagn enn vizion. Enn kiksoz ki resanble enn gran dra ti pe desann par so kat kwin depi lesiel ziska devan mwa.

⁶Ler mo get pli pre ladan mo trouv bann zanimo, bann bebet sovaz, bann reptil e bann zwazo.

⁷Mo tann enn lavwa ki dir mwa, ‘Pier, diboute; touye manze.’

⁸Me mo reponn, ‘Non Segner, zame mo met kiksoz ki defann ou ki inpir dan mo labous.’

⁹Me depi lesiel lavwa la redir mwa, ‘Pa apel inpir seki Bondie finn deklar pir.’

¹⁰Sa finn arive trwa fwa, apre tou kiksoz finn remont dan lesiel.

¹¹Lerlamem trwa zom ki sorti Sezare ti ariv dan lakaz kot nou ti ete.

¹²Lespri Sin dir mwa al ar zot san okenn ezitasion. Sa sis frer la finn al ar mwa kot Korney e nou finn rant dan so lakaz.

¹³Korney rakont nou kouma li ti trouv enn anz pe dibout dan so lakaz, e ti dir li, ‘Avoy dimoun Zope pou al sers Simon ki apel Pier.

¹⁴Li pou donn twa enn mesaz ki pou sov twa ek to fami.’

¹⁵Kouma mo koumans koze, Lespri Sin desann lor zot parey kouma ti desann lor nou dan komansman.

¹⁶Mo finn rapel parol Bondie ki dir, ‘Zan ti batiz ar dilo, me zot, zot pou resevwar batem dan Lespri Sin.’

¹⁷Si Bondie finn donn bannla mem don ki li finn donn nou kan nou ti krwar dan Zezi Kris, mwa ki mo ete pou reziste Bondie?”

¹⁸Kan bannla tann sa zot res trankil. Zot ti glorifie Bondie. Zot dir, “Alor Bondie finn donn bann ki pa Zwif repantans ki donn vre lavi.”

¹⁹Bann ki ti disperse akoz persekision ki ti koumanse par lamor Etienn ti al ziska Fenisi, Sip ek Antios. Zot ti pe partaz laparol zis ar bann Zwif.

²⁰Me ti ena parmi zot ki ti sorti Sip ek Sirenn. Kan zot ti vinn Antios zot finn koz ar bann Grek pou anons zot Bonn Nouvel lor Zezi Kris.

²¹Lame Bondie ti lor zot ek enn kantite ti krwar e ti tourn ver Lesegner.

²²Sa nouvel la ti ariv dan zorey bann ki ti dan Legliz Zerizalem. Lerla zot avoy Barnabas Antios.

²³Letan li ariv laba li trouv lagras Bondie, li ti bien-bien kontan. Li ti ankouraz zot tou pou res fidel ar Lesegner ar tou zot leker.

²⁴Barnabas ti enn bon dimoun ranpli ar Lespri Sin ek lafwa. Ti gagn enn kantite dimoun pou Lesegner.

²⁵Lerla Barnabas ti al Tars pou rod Sol.

²⁶Kan li finn trouv li, li finn amenn li Antios. Zot finn pas enn lane dan legliz pou ansegn enn kantite dimoun. Dan Antios mem ki premie fwa ti apel bann disip Kretien.

²⁷Sa lepok la detrwa profet sorti Zerizalem finn vinn Antios.

²⁸Enn parmi zot, Agabis, met li dibout e par pwisans Lespri Sin li koumans anonse ki pou ena enn faminn lor later. (Sa ti arive lepok Klod ti anperer.)

²⁹Bann disip deside pou avoy otan led ki zot kapav bann krwayan ki abit dan Zide.

³⁰Zot finn fer samem, e finn avoy zot don kot bann ansien dan legliz Zide par Barnabas ek Sol.