Read Morisien Zis 15 Bible Online

Zis 15 - Morisien bible

Zis 15

¹Ti ena detrwa zom ki ti sorti Lazide e ti vinn Antios, e zot ti ansegn bann frer, “Zot pa pou sove si zot pa fer sirkonsizion dapre lalwa Moiz.”

²Pol ek Barnabas pa ti dakor ar zot, e finn ena gran diskision lorla. Lerla, finn swazir Pol ek Barnabas ek detrwa krwayan pou al get bann apot ek bann ansien dan Zerizalem pou regle sa kestion la.

³Apre ki Legliz finn ed zot pou zot vwayaz, zot ti travers Fenisi ek Samari, pou vizit bann krwayan; zot ti rakonte kouma bann payin finn krwar dan Lesegner. Sa nouvel la ti amenn boukou lazwa parmi bann frer.

⁴Kan zot ti ariv Zerizalem, Legliz, ek bann apot ek bann ansien ti akeyir zot. Zot ti rakont tou seki Bondie ti fer par zot.

⁵Alor detrwa parmi bann Farizien ki finn konverti, diboute dir, “Li neseser ki bann payin fer sirkonsizion e nou exize ki zot obeir lalwa Moiz.”

⁶Bann apot ek bann ansien ti reyni pou diskit lor sa size la.

⁷Apre enn long diskision Pier diboute e li dir, “Mo bann frer, zot kone ki depi lontan Bondie finn swazir mwa parmi zot pou al anons Bonn Nouvel ar bann non-Zwif pouki zot tande e ki zot krwar.

⁸Bondie konn leker tou dimoun. Pou montre ki li anvi ki bann non-Zwif osi krwar, li finn donn bannla Lespri Sin, parey kouma li finn donn nou.

⁹Li pa finn fer okenn diferans ant zot ek nou, li finn pirifie zot leker par lafwa.

¹⁰Alors, kifer nou bizin inpoz enn fardo lor ledo bannla pouki nou defie Bondie? Enn fardo ki ni nou bann anset, ni noumem pa finn kapav sarye.

¹¹Me nou krwar ki nou, osi bien ki bannla, pou sove par lagras Lesegner Zezi.”

¹²Lasanble antie res trankil, e finn kontign ekout Barnabas ek Pol rakont bann sign ek bann mirak ki Bondie finn fer atraver zot parmi bann payin.

¹³Kan zot ti fini koze, Zak dir, “Bann frer ekout mwa.

¹⁴Simon finn explik nou kouma Bondie finn vizit bann non-Zwif pou swazir parmi zot enn pep ki pou port so nom.

¹⁵Parol bann profet dakor ar sa, parey kouma finn ekrir,

¹⁶‘Apre sa mo pou retourne e mo pou rekonstrir lakaz David ki finn tom anrwinn, e mo pou redres li.

¹⁷Lerla leres limanite pou rod Bondie, osi bien ki bann non-Zwif ki port mo nom.

¹⁸Ala seki Lesegner deklare, limem ki realiz so bann proze, ki bien kler depi toultan.’

¹⁹Alors dapre mwa, nou bizin pa rann lavi difisil pou bann non-Zwif ki pe tourn ver Bondie.

²⁰Okontrer nou bizin ekrir zot pou dimann zot pa manz manze ki finn ofer kouma sakrifis ar bann idol, pa viv dan limoralite, e pa manz laser zanimo ki finn trangle ek pa konsom disan.

²¹Depi lontan pe lir lalwa Moiz dan bann sinagog, ek pe anons li dan tou lavil, sak zour saba.”

²²Lerla bann apot avek bann ansien, e Legliz antie, ti desid pou swazir detrwa parmi zot pou avoy Antios avek Pol ek Barnabas. Zot ti swazir Zid ki ti osi apel Barsabas, ek Silas, de dimoun ki ti bien respekte parmi bann frer.

²³Ti donn zot enn let pou amene. Dan let la ti ekrir: “Nou, bann apot ek bann ansien, nou salye zot bann frer parmi non-Zwif ki viv dan Antios, Siri ek Silisi.

²⁴Nou finn tann dir ki detrwa dimoun ki sorti kot nou, finn trakas zot ek boulvers zot par seki zot finn dir. Nou pa ti donn bannla okenn instriksion.

²⁵Nou finn tom dakor pou swazir detrwa zom e avoy zot ansam avek nou bann kamarad Pol ek Barnabas,

²⁶ki finn riske zot lavi pou servi Lesegner Zezi Kris.

²⁷Nou pe avoy Zid ek Silas ki pou dir zot anparol seki nou finn ekrir.

²⁸Lespri Sin e nou mem finn pran enn desizion pou pa met pli gran fardo lor zot ledo. Ala saki nou pe dir:

²⁹Pa manz seki finn ofer bann idol, ni disan; napa manz zanimo ki finn trangle; e prezerv zot kont pratik imoral. Zot pou bien fer si zot evit tou sa la. Orevwar.”

³⁰Lerla delegasion la ti kit bann frer e ti al Antios, kot zot ti zwenn tou legliz ansam e zot ti donn let la.

³¹Bann dimoun ti lir sa let la e zot ti bien kontan par sa bann mesaz ankourazan la.

³²Zid ek Silas, ki zotmem zot ti bann profet, ti explik boukou pou ankouraz ek ranforsi bann frer dan zot lafwa.

³³Apre ki zot ti finn pas inpe letan la, bann frer ti donn zot benediksion ek finn retourn zot kot bann seki ti avoy zot. [

³⁴Silas ti desid pou res laba[4]]

³⁵Me Pol ek Barnabas ti res Antios. Ansam ar boukou lezot, zot ti pe ansegn ek pres parol Bondie.

³⁶Apre enn bon letan Pol dir Barnabas, “Nou al rann vizit tou bann frer dan tou lavil kot nou finn pres parol Bondie ek gagn inpe zot nouvel.”

³⁷Barnabas ti anvi amenn Zan ki ti osi apel Mark ar zot,

³⁸Me Pol pa ti dakor pou amenn li, parski Mark ti kit zot kan zot ti dan Panfili ek li pa ti kontign travay ar zot.

³⁹Pol ek Barnabas ti gagn enn gran diskision e zot finn separe. Barnabas ti pran Mark ar li ek zot ti al Sip.

⁴⁰Me Pol ti swazir Silas, e bann frer ti remet zot dan lame Bondie pouki li pran zot swin.

⁴¹Li ti al Lasiri ek Sisil pou fortifie bann legliz.