Read Morisien Zis 25 Bible Online

Zis 25 - Morisien bible

Zis 25

¹Festis ti vinn dan so provins, e apre trwa zour li ti al Zerizalem depi Sezare.

²Bann gran Pret ek bann Zwif inportan ti prezant Festis bann sarz kont Pol e zot ti sipliy li

³rann enn servis avoy Pol Zerizalem. Anverite zot ti finn fer enn konplo pou touy li lor larout.

⁴Festis reponn, “Pol ferme dan prizon dan Sezare, e momem mo pe al laba la.

⁵Alors, bann zom ki ena lotorite parmi zot kapav vinn ar mwa, ek si ena kiksoz move kont Pol les zot akiz li laba.”

⁶Festis pa finn pas plis ki wit ou dis zour laba. Li ti desann Sezare, ek so landime li ti al siez dan tribinal ek li ti fer amenn Pol devan li.

⁷Kan Pol ti vini, bann Zwif ki ti desann depi Zerizalem ti antour li e ti met enn ta sarz lor li, ki zot pa ti kapav prouve.

⁸Pou defann limem Pol dir, “Mo pa finn komet okenn ofans, ni kont lalwa bann Zwif, ni kont tanp, ni kont Sezar.”

⁹Me Festis, ki ti anvi fer plezir bann Zwif, dimann Pol, “Eski to anvi al Zerizalem pouki mo ziz twa laba lor sa bann akizasion la?”

¹⁰Me Pol dir, “Mo pe pas anzizman devan tribinal Sezar; e kouma zot kone, mo pa finn fer nanye demal kont bann Zwif.

¹¹Me si mo enn kriminel ki merit lamor, mo aksepte lamor. Si zot pa kapav prouv nanye kont mwa, personn pa kapav livre mwa ar bann Zwif. Mo fer apel Sezar.”

¹²Alors, apre ki Festis finn koz ar so bann konseye, li reponn, “To finn fer apel ar Sezar, to pou al devan Sezar.”

¹³Apre detrwa zour lerwa Agripa ek Berenis ariv Sezare pou rann vizit Festis.

¹⁴Kouma zot ti pe res laba detrwa zour, Festis ti koz ar lerwa lor Pol. Li dir lerwa Agripa, “Ena enn dimoun isi ki Felix ti met dan prizon.

¹⁵Letan mo ti al Zerizalem, bann gran pret ek bann ansien ti met enn sarz kont li e ti dimann mwa kondann li.

¹⁶Mo finn dir zot ki li pa dan koutim bann Romin pou kondann kikenn avan ki li pas devan bann ki akiz li e ki li gagn lokazion defann limem.

¹⁷Letan zot finn vinn isi ar mwa, mo pa finn tarde ar sa ka la. Landime mo finn siez dan tribinal e mo finn dimann amenn li devan mwa.

¹⁸Kan bann akizater dibout, zot pa finn akiz li ar okenn krim ki mo ti pe atann.

¹⁹Okontrer, zot ti pe diskit zot larelizion, ek lor kikenn ki apel Zezi ki zot ti dir finn mor, me ki Pol pretann li vivan.

²⁰Mo pa ti kone kouma bizin ziz sa zafer la; alors mo finn dimann Pol si li anvi al Zerizalem pou fer ziz sa ka la.

²¹Me Pol finn fer lapel. Li finn dimande ki Anperer ziz li. Mo finn gard li dan prizon ziska ki mo avoy li devan Sezar.”

²²Agripa dir Festis, “Mo anvi tann sa dimoun la momem.” Festis reponn, “Dime to ava tann li.”

²³Landime, Agripa ek Berenis ti vinn dan lasal lodians avek gran-gran seremoni, ar bann sef larme ek bann dimoun bien inportan dan site Sezare. Festis donn lord amenn Pol.

²⁴Festis dir, “Lerwa Agripa, e tou bann ki prezan isi, zot trouv sa boug la? Kominote Zwif antie, dan Zerizalem ek isi, finn vinn get mwa avek enn sarz, ek zot kriye ki li pa merit kontign viv.

²⁵Me mo pa finn trouv nanye ar li ki merit lamor. Parski li finn fer lapel Lanperer, mo finn desid pou avoy li Rom.

²⁶Me mo bizin dir ki mo pena nanye pou ekrir lor so ka. Akoz sa mo prezant li devan zot, sirtou twa Agripa, pouki apre ki zot finn examinn li, mo gagn kiksoz pou ekrir.

²⁷Mo pa trouv sa korek ki avoy enn prizonie Rom san ki ena enn sarz bien kler lor li.”