Read Morisien Zis 28 Bible Online

Zis 28 - Morisien bible

Zis 28

¹Letan nou ti ansekirite, nou aprann ki sa lil la apel Malt.

²Bann abitan laba ti tret nou avek boukou bonte. Akoz lapli ti pe tonbe ek ti fre-fre, zot ti alim enn dife ek zot ti akeyir nou otour li.

³Pol ramas enn ta brans pou li zet lor dife, me akoz saler dife enn serpan sorti, li mord Pol ek li anpandan ar so lame.

⁴Kan bann abitan lil trouv serpan la pe anpandan ar so lame, zot dir, “Sa zom la bizin enn kriminel. Li finn sap dan lamer, me bondie ki apel Zistis pa les li viv.”

⁵Me Pol sakouy serpan la dan dife, e li pa santi okenn douler.

⁶Zot ti pe atann ki lame Pol anfle, ki li tonbe, li mor. Zot atann mem, me nanye pa ariv li. Lerla zot sanz zot lide, zot dir li enn bondie.

⁷Dan sa landrwa la ti ena enn propriyete ki ti pou enn gran dimoun apel Pibliyis. Li ti resevwar nou avek boukou lamitie pandan trwa zour.

⁸Papa Pibliyis ti malad lor lili, li ti gagn lafiev ek disantri. Pol al get li, poz lame lor li, priye pou li, e geri li.

⁹Apre ki sa ti arive, lezot dimoun malad lor lil ti vinn get li pou gagn zot gerizon.

¹⁰Zot ti tret nou avek boukou loner ek respe, e letan nou anbarke, zot finn fourni nou tou seki neseser pou nou vwayaz.

¹¹Trwa mwa plitar ki nou ti pran lamer lor enn bato ki ti pas liver lor lil. Ti enn bato ki sorti Aleksandri, ki ti port nom bondie zimo Kastor ek Polix.

¹²Nou ti fer eskal Sirakiz pou trwa zour.

¹³Depi la nou ti al Reggio. Landime divan lesid ti pe soufle e enn zour apre nou ti ariv Pouzol.

¹⁴Laba nou finn trouv detrwa frer ki ti invit nou pou pas enn semenn kot zot. Ala kouma nou finn ariv Rom.

¹⁵Bann frer ki ti la, ti kone ki nou pe vini e zot ti vwayaz depi Bazar Apyis e Trwa Tavern pou vinn zwenn nou. Kan Pol ti trouv sa bann dimoun la, li remersie Bondie e li pran kouraz.

¹⁶Kan nou ti ariv Rom, Pol ti gagn drwa res tousel avek enn solda pou vey li.

¹⁷Trwa zour apre, Pol invit kot li bann sef Zwif ki ti dan Rom. Kan tou ti la, Pol dir zot, “Frer, mo pas finn fer nanye kont nou pep ni kont okenn bann koutim nou bann anset. Zot finn aret mwa dan Zerizalem e zot finn livre mwa dan lame bann Romin.

¹⁸Kan zot ti interoz mwa, zot ti oule donn mwa mo liberte, parski pa ti ena rezon pou kondann mwa amor.

¹⁹Me bann Zwif pa ti dakor, akoz sa mo ti oblize fer apel Sezar; pourtan mo pa ti ena lintansion akiz mo pep.

²⁰Pou sa rezon la ki mo finn dimann pou trouv zot e koz ar zot. Mo pe fer prizon pou mem esperans ki Izrael ena.”

²¹Zot reponn li, “Nou pa finn gagn okenn let sorti Zide lor twa, e pena okenn to bann frer ki finn vinn isi pou fer rapor ou dir dimal lor twa.

²²Me nou anvi tann twa, ki to panse. Nou kone ki partou dimoun pa dakor ar sa group ki to pe swiv la.”

²³Zot ti tom dakor lor enn dat randevou avek Pol, e zot ti vinn kot li ar boukou lot dimoun ankor. Pol ti anons zot Rwayom Bondie. Li ti servi lalwa Moiz ek liv profet pou li konvink zot lor Zezi. Li ti fer sa depi gramatin ziska tanto.

²⁴Ena ki ti dakor ar so bann parol, ena ti refiz krwar.

²⁵E zot finn ale san ki zot dakor ant zotmem. Pol dir zot, “Lespri Sin ti ena rezon letan li ti koz ar zot anset par labous profet Izai, e li ti dir:

²⁶‘Al kot sa pep la, e dir zot: Zot ena zorey pou tande, me zot pa konpran; zot ena lizie pou gete me zot pa trouve.

²⁷Parski leker sa pep la inn vinn dir, zot refize tande, zot refize trouve; tansion zot lizie ouver, tansion zot zorey tande, tansion zot leker konpran, e zot tourn ver mwa pouki mo geri zot.’

²⁸Les mo dir zot ki Bondie finn avoy mesaz delivrans pou bann payin osi, e ki bannla, zot pou ekoute, zot.” [

²⁹Apre ki zot finn tann seki Pol ti ena pou dir, zot tou ti ale e zot ti pe diskit ant zot mem[6]]

³⁰Pol ti lwe enn lakaz laba pandan de-zan, e li ti resevwar tou dimoun ki ti vinn rann li vizit.

³¹Li ti proklam Rwayom Bondie, ek li ti ansegn lor Lesegner Zezi Kris ar boukou lasirans ek liberte.