Read Morisien Zis 6 Bible Online

Zis 6 - Morisien bible

Zis 6

¹Sa lepok la, letan nonb bann disip ti pe ogmante, bann krwayan ki ti koz Grek ti pe grogne kont bann ki ti koz Ebre parski zot bann vev ti santi zot neglize letan ti ena distribision manze.

²Ledouz ti rasanble tou bann disip e ti dir zot, “Li pa korek ki nou negliz laparol Bondie pou nou servi repa.

³Alors, bann frer, swazir set zom parmi zot ki ena bon repitasion, ki ranpli avek Lespri Sin ek sazes pou fer sa travay la.

⁴Koumsa nou kapav kontign lapriyer ek predikasion.”

⁵Sa parol la ti fer kominote la plezir. Zot ti swazir Etienn ki ti ranpli avek lafwa ek Lespri Sin, ansam avek Filip, Prokor, Nikanor, Timon, Parmenas, ek Nikola ki ti sorti Antios, ki lontan ti konverti pou vinn enn Zwif.

⁶Group disip prezant sa set la bann apot, ki ti priye e ti inpoz lame lor zot.

⁷Parol Bondie ti pe kontign repann; nonb disip ti ogmante dan Zerizalem, e mem enn lafoul pret ti aksepte lafwa.

⁸Etienn ki ti ranpli ar lagras ek pwisans, ti fer bann gran mervey ek mirak parmi lepep.

⁹Enn parti bann manm sinagog Esklav Libere, ki ti bann Zwif ki ti sorti Sirenn, Aleksandri, ek osi bann ki ti sorti Silisi e Lazi, ti diskit ar Etienn.

¹⁰Me zot ti perdi pwin parski Lespri ti donn Etienn enn gran sazes.

¹¹Lerla zot ti mont latet detrwa dimoun ankasiet pouki bannla dir, “Nou finn tann li blasfeme kont Moiz ek Bondie.”

¹²Zot ti eksit lepep, bann ansien ek bann dokter lalwa; lerla bannla ti vinn aret Etienn, e ti trenn li devan konsey.

¹³Zot amenn fos temwin ki ti dir, “Sa zom la pe toultan koz kont tanp ek lalwa Moiz.

¹⁴Nou finn tann li dir ki sa Zezi ki sorti Nazaret la, pou detrir sa plas la e pou sanz koutim ki Moiz finn donn nou.”

¹⁵Tou seki ti pe asiz dan konsey e ti pe fixe Etienn, ti trouv so figir parey kouma figir enn anz.