Read Morisien Zis 8 Bible Online

Zis 8 - Morisien bible

Zis 8

¹Sol ti dakor ar zot krim lor Etienn.

²Sa zour lamem enn gran persekision ti koumanse kont legliz Zerizalem. Tou dimoun, apart bann apot, finn fane dan rezion Zide ek Samari. Bann zom relizie ti anter Etienn e zot ti plor boukou lor so lamor.

³Me Sol ti pe persekit legliz; li ti rant dan lakaz apre lakaz, li tir bann krwayan - ki li zom ki li fam - e li ti al zet zot dan prizon.

⁴Bann ki ti finn fane partou kote, finn al proklam Bonn Nouvel.

⁵Filip desann dan enn lavil Samari e li proklam Lemesi.

⁶Tou bann abitan sa lavil la ti ekout mesaz Filip avek boukou latansion parski zot ti temwin bann mirak ki li ti pe fer.

⁷Bann move lespri ti pe kriye kan zot ti pe sorti depi bann posede, bann paralize ek bann andikape ti geri.

⁸Ti ena enn gran lazwa dan lavil.

⁹Me ti ena enn zom ki ti apel Simon ki avan ti pe fer mazik; li ti etonn boukou dimoun dan sa lavil la; li ti deklar li enn gran dimoun.

¹⁰Bann abitan, tipti kouma gran, ti ekout li, zot ti pe dir, “Sa zom la, li pe montre pwisans Bondie ki apel ‘Gran pouvwar.’ ”

¹¹Zot ti ekout li avek boukou lintere parski depi lontan li finn fer zot res bet avek so mazik.

¹²Me kan zot finn krwar dan Bonn Nouvel rwayom Bondie ek Zezi Kris ki Filip ti pe proklame, zom kouma fam, ti batize.

¹³Mem Simon ti krwar. Apre so batem li ti res avek Filip e li ti etone kan li ti trouv bann sign ek mirak ki ti pe arive.

¹⁴Kan bann apot dan Zerizalem tann dir ki Samari finn aksepte parol Bondie, zot avoy Pier ek Zan laba.

¹⁵Toulede desann e priye pou bannla resevwar Lespri Sin.

¹⁶Lespri Sin pa ti ankor desann lor personn parmi zot; zot ti finn zis batize dan nom Segner Zezi.

¹⁷Lerla Pier ek Zan poz lame lor zot e zot resevwar Lespri Sin.

¹⁸Letan Simon trouve ki Lespri Sin inn desann lor bann krwayan kan bann apot inn poz lame lor zot, li ofer Pier ek Zan enn som larzan.

¹⁹Li dir, “Donn mwa osi sa pouvwar la, pouki ler mo poz lame lor enn dimoun, li kapav resevwar Lespri Sin.”

²⁰Me Pier reponn, “Twa ek to kas pou fini ansam! To panse to kapav aste sa don la ar Bondie?

²¹To pena nanye pou gagne parski to leker pa drwat devan Bondie.

²²Sanz to move lintansion e priy Lesegner; kikfwa li va pardonn move lintansion to leker.

²³Parski mo trouve ki to leker amer e to prizonie to pese.”

²⁴Simon reponn, “Priy Bondie pou mwa tomem pouki tou seki to pe dir la pa ariv mwa.”

²⁵Apre ki Pier ek Zan finn rann temwagnaz e proklam parol Bondie, zot retourn Zerizalem. Lor zot sime, zot ti anons Bonn Nouvel dan enn kantite vilaz Samari.

²⁶Apre sa, enn anz Lesegner dir Filip, “Leve, al dan direksion lesid, lor sime ki desann depi Zerizalem ziska Gaza. Enn sime ki pa frekante sa.”

²⁷Li leve, li ale. Lor so sime ti ena enn gran ofisie Etiopien ki ti ansarz trezor larenn Kandas; li ti vinn Zerizalem pou ador Bondie.

²⁸Li ti pe retourn dan so pei dan enn kales, e li ti pe lir enn pasaz liv profet Izai.

²⁹Lespri Lesegner dir Filip, “Koste ar sa kales la.”

³⁰Filip galoup kot kales la e li tann ofisie la pe lir enn pasaz liv profet Izai. Filip dimann li, “Eski to konpran saki to pe lir?”

³¹Li reponn, “Kouma mo pou konpran, si personn pa explik mwa?” Lerla li invit Filip pou mont dan kales e asiz kot li.

³²Ala pasaz Lekritir ki li ti pe lir: “Parey kouma enn mouton ki zot pe amenn labatwar kouma enn annyo bien trankil devan bann ki pe koup so lalenn, li pa ouver so labous.

³³Zot finn abes li e pa finn ena lazistis; kisannla kapav dekrir so desandan? Parski zot finn pran so lavi lor later.”

³⁴Ofisie Etiopien la dimann Filip, “Dir mwa, lor kisannla profet la pe dir sa, lor limem oubien lor enn lot?”

³⁵Alors Filip koumans explike. Li koumans par sa pasaz Lekritir la pou anons li Bonn Nouvel lor Zezi.

³⁶Letan zot pe kontign zot sime, zot ariv kot ena dilo; lerla ofisie la dir Filip, “Ala dilo, ki anpes mwa resevwar batem?” [

³⁷Filip dir, “Si to krwar avek tou to leker, li posib.” Li reponn, “Mo krwar ki Zezi Kris limem Garson Bondie.” [3]]

³⁸Li donn lord pou aret kales, e toulede, Filip ek ofisie la, desann dan dilo, lerla Filip batiz li.

³⁹Letan zot sorti dan dilo, Lespri Lesegner anlev Filip; ofisie la nepli trouv Filip ankor, e li ale ranpli ar lazwa.

⁴⁰Filip retrouv limem dan enn landrwa ki ti apel Azot, e li ti anons Bonn Nouvel dan tou bann lavil ki li finn traverse ziska li ariv Sezare.