Read Morisien Rom 2 Bible Online

Rom 2 - Morisien bible

Rom 2

¹Zot ki fer zizman lor enn lot, zot pena okenn exkiz, parski letan zot ziz enn lot alor ki zot, zot fer mem aksion, zot pe kondann zotmem.

²Nou kone ki Bondie ena rezon letan li ziz dapre laverite bann ki fer sa bann kalite aksion la.

³To panse ki Bondie pa pou pini twa kan to azir parey kouma bann dimoun ki to pe akize?

⁴Oubien to mepriz bonte, pasians ek tolerans Bondie, san ki to realize ki so bonte pe rod fer twa repantir?

⁵Me to pa oule konpran, to pa dispoze sanze. Akoz sa to atir enn pli gran pinision lor twa pou sa zour kot Bondie pou revel so zizman ki zis.

⁶Sakenn pou gagn seki li merite ar Bondie.

⁷Li pou donn lavi eternel bann ki persevere pou fer dibien, bann ki pe rod laglwar, loner ek lavi imortel.

⁸Me pou ena koler ek zizman pou seki pans zis limem, ki rezet laverite e swiv lemal.

⁹Detres ek angwas pou tom lor tou seki fer lemal, ki li Zwif oubien non-Zwif.

¹⁰Parkont, tou seki fer dibien, Bondie pou akord zot laglwar, loner ek lape, ki li Zwif ki li non-Zwif,

¹¹parski devan Bondie tou dimoun parey.

¹²Bann ki pena lalwa Moiz ek zot fer pese, zot pou sibir pinision, me san aplikasion lalwa; bann ki konn lalwa Moiz ek fer pese, zot pou zize dapre lalwa.

¹³Pa seki ekout lalwa ki drwat devan Bondie, me seki met lalwa anpratik ki Bondie deklar drwat.

¹⁴Kan bann non-Zwif ki pa konn lalwa Bondie met li anpratik par zotmem, li komsi zot enn lalwa pou zotmem, mem si zot pena lalwa.

¹⁵Sa montre ki seki lalwa demande finn ekrir dan zot leker. Zot konsians osi prouve ki sa vre; parfwa zot lespri akiz zot, parfwa li defann zot.

¹⁶Samem ki pou arive zour ki Bondie pou ziz leker bann dimoun par Zezi Kris, kouma mo Bonn Nouvel anonse.

¹⁷Me si twa, ki dir to enn Zwif, ki met tou to konfians dan lalwa Moiz, ki fier lor to relasion ar Bondie,

¹⁸twa, to konn so volonte, e to finn aprann par lalwa kouma swazir seki bien;

¹⁹twa ki ena lasirans ki to enn gid pou bann aveg, tomem lalimier pou seki dan teneb;

²⁰to enn edikater bann ignoran, to enn profeser bann zanfan, parski to sir ki to posed dan lalwa tou seki neseser pou konesans ek laverite;

²¹abe, twa ki montre lezot, to pa montre tomem?

²²Twa ki dir pa komet adilter, kifer twa to fer li? Twa ki denons bann idol, to pa fer piyaz dan zot tanp?

²³Twa ki koz gran-gran koze lor lalwa, to pa dezonor Bondie letan to fer lekontrer ki lalwa dir?

²⁴Lekritir dir, “Akoz zot, lezot nasion blasfem nom Bondie.”

²⁵Sirkonsizion ena valer kan to obzerv lalwa, me si to dezobeir lalwa, li parey koumadir to pa finn fer sirkonsizion.

²⁶Si enn zom pa finn fer sirkonsizion, me li obeir komannman lalwa, eski Bondie pa pou konsider sa koumadir li finn fer sirkonsizion?

²⁷Seki pa finn fer sirkonsizion dan so lekor, me li obeir lalwa, li pou kondann twa ki dezobeir lalwa, mem si to ena lalwa dan form Lekritir ek to finn fer sirkonsizion.

²⁸Pa seki paret andeor ki fer enn dimoun enn Zwif, ni seki vizib dan lekor ki fer sirkonsizion;

²⁹non, me vre Zwif li interyer, dan leker. Sirkonsizion osi li dan leker, par Lespri Bondie, pa par seki finn ekrir. Sa, se vre Zwif, so louanz pa sorti kot bann imin, me kot Bondie.