Read Morisien Rom 7 Bible Online

Rom 7 - Morisien bible

Rom 7

¹Mo bann frer, mo bann ser, mo pe koz ar dimoun ki bien konn lalwa. Eski zot pa kone ki lalwa ena lotorite lor enn dimoun osi lontan ki li vivan?

²Par exanp, enn fam marye atase ar so mari tanki mari la vivan; me kouma li mor, so fam pa atase par lalwa maryaz, fam la lib.

³Si letan so mari ankor vivan li viv avek enn lot zom, dimoun konsider li kouma enn adilter; me si so mari mor, li lib par rapor ar lalwa, li pa enn adilter si li marye enn lot zom.

⁴Li parey pou zot mo bann frer, mo bann ser. Par rapor ar lalwa zot finn mor, parski zot fer parti lekor Lekris, pouki zot apartenir ar enn lot ki finn resisite depi bann mor, koumsa nou kapav raport fri pou Bondie.

⁵Letan nou ti kontrole par nou natir imin, bann move dezir provoke par lalwa ti pe azir dan nou lekor e nou ti pe raport fri ki amenn lamor.

⁶Asterla nou lib par rapor ar lalwa. Nou finn mor par rapor ar seki ti gard nou esklav. Koumsa nou servi dan enn nouvo fason dapre Lespri, nou pa servi dan vie fason dapre lalwa ki finn ekrir.

⁷Ki nou kapav dir alor? Nou pou dir ki lalwa pese? Pena sime! Mo pa ti pou kone kisavedir pese si pa ti ena lalwa. Mo pa ti pou kone kisavedir konvwatiz si lalwa pa ti dir, “Pa dezir kiksoz lezot dimoun.”

⁸Me pese finn profit lor sa komannman la pou prodwir tou sort kalite dezir dan mwa. San lalwa, pese pena pouvwar.

⁹Momem mo ti vivan letan pa ti ena lalwa, me letan komannman ti vini, pese ti gagn lavi e mwa mo ti mor.

¹⁰Dan mo ka, sa mem komannman ki ti sipoze donn lavi la, sa mem ki finn amenn lamor.

¹¹Pese finn tronp mwa, li finn sezi lokazion e par komannman ki ti vini, li finn touy mwa.

¹²Alor, lalwa li sin, e komannman li sin, drwat ek bon.

¹³Eski savedir ki seki bon ki finn koz mo lamor? Pena sime! Pese ki lakoz. Koumsa li montre so vre natir pese; li koz mo lamor atraver seki bon, koumsa atraver komannman pese paret pli grav ankor.

¹⁴Nou kone ki lalwa li spiritiel; me mwa mo pa spiritiel, mo kouma enn esklav ki obeir pese.

¹⁵Mo pa konpran ki mo pe fer. Seki mo anvi fer, mo pa kapav fer, me seki mo pale fer, samem ki mo fer.

¹⁶Si mo fer seki mo pa oule fer, mo pe dakor ki lalwa bon.

¹⁷Me ofet, nepli mwa ki fer sa, me pese ki viv dan mwa ki fer li.

¹⁸Mo kone ki nanye debon pa viv dan mwa, setadir, dan mo natir imin. Mo ena dezir pou fer seki bien, me mo pena kapasite pou fer li.

¹⁹Mo pa reysi fer bien ki mo oule fer, me mo pratik lemal ki mo pa oule.

²⁰Si mo fer seki mo pa oule, alor savedir pa mwa ki pe azir koumsa, me pese ki pe viv dan mwa.

²¹Alor mo dekouver enn prinsip ki pe azir: kan mo oule fer kiksoz bien, mo retrouv mwa pe fer lemal.

²²Dan mo leker mo pran plezir dan lalwa Bondie.

²³Me mo trouv enn lot lalwa ki pe fer so louvraz dan mo lekor, li pe fer lager ar lalwa mo lintelizans. Li fer mwa prizonie lalwa pese ki pe travay dan mo lekor.

²⁴Mo vremem enn dimoun malere! Ki sannla pou sap mwa dan sa lekor ki pe antrenn mwa ver lamor la?

²⁵Granmersi Bondie, par nou Segner Zezi Kris! Par mo lintelizans mo esklav Bondie, me par mo lekor mo esklav lalwa pese.