Read Morisien Rom 8 Bible Online

Rom 8 - Morisien bible

Rom 8

¹Asterla pena okenn kondanasion pou bann dimoun ki dan Zezi Kris.

²Anefe, lalwa Lespri Sin ki donn lavi par Zezi Kris finn liber twa depi lalwa pese ek lamor.

³Bondie finn akonpli seki inposib pou lalwa fer parski febles natir imin finn rann li inpwisan. Bondie finn kondann pese ki dan nou natir imin par so prop Garson ki li ti anvwaye dan enn natir imin parey kouma pou nou.

⁴Sa finn fer pouki lazistis ki lalwa dimande li akonpli dan nou ki pa pe viv dapre natir imin, me dapre Lespri.

⁵Seki pe viv dapre natir pese ena tandans swiv seki natir la dimande; me seki viv dapre Lespri swiv seki Lespri dezire.

⁶Si natir imin ki pe kontrole, sa li amenn lamor; me si Lespri ki dirize, sa li donn lavi ek lape.

⁷Bann dimoun ki preokipe par natir imin zot ennmi Bondie, parski sa natir la li pa soumet li ar lalwa Bondie, dayer li mem pa kapav fer li.

⁸Bann seki obeir zot natir imin pa kapav fer Bondie plezir.

⁹Me zot, zot pa kontrole par natir pese, me par Lespri, si Lespri Bondie viv dan zot. Seki pena Lespri Lekris, li pa apartenir ar Lekris.

¹⁰Me si Lekris dan zot, mem si li vre ki zot lekor li mor akoz pese, zot lespri li vivan parski finn fer zot vinn drwat devan Bondie.

¹¹Si Lespri Bondie, ki ti resisit Zezi, pe viv dan zot, Sa-Enn ki ti resisit Zezi la pou donn lavi zot lekor mortel par so Lespri ki viv dan zot.

¹²Alor, mo bann frer, mo bann ser, nou ena enn obligasion, me pa anver natir imin pouki nou viv dapre li.

¹³Si zot viv dapre natir pese, zot pou mor. Me si par Lespri zot touy aksion natir pese, alor la, zot pou viv.

¹⁴Tou seki dirize par Lespri Bondie, zot zanfan Bondie.

¹⁵Sa Lespri ki zot finn gagne la, li pa enn lespri esklavaz, e ki replonz zot dan lafreyer, me zot finn resevwar enn Lespri ki fer zot zanfan Bondie, e ki fer nou kriye, “Abba! Papa!”

¹⁶Lespri Bondie zwenn li ansam ar nou lespri pou deklare ki nou zanfan Bondie.

¹⁷Si nou zanfan Bondie, alor nou eritie Bondie, ek nou eritie ansam ar Lekris. Si nou soufer avek Lekris nou pou osi partaz so laglwar.

¹⁸Mo panse seki nou pe soufer dan sa letan prezan la, pa kapav konpare ar laglwar ki Bondie pou revel nou.

¹⁹Kreasion anantie pe atann avek inpasians ki Bondie revel so bann zanfan.

²⁰Kreasion anba enn lafors ki pena okenn aboutisman; pa par so prop swa, me par volonte seki finn met li dan sa plas la. Me ena lesperans

²¹ki kreasion limem enn zour pou sap dan pouvwar sa esklavaz ki detrir la, e ki li pou ena par dan laliberte ek laglwar bann zanfan Bondie.

²²Nou kone ki ziska asterla kreasion anantie pe soufer douler lanfantman.

²³Me pa zis kreasion ki pe soupire. Nou osi; nou ki ena premie fri Lespri, nou soupire dan fon noumem pandan ki nou pe atann ki Bondie adopte nou, e akord nou delivrans total.

²⁴Se dan lesperans ki nou finn sove. Me si nou trouv seki nou pe espere, li nepli lesperans ditou. Kisannla ki esper kiksoz ki li deza ena?

²⁵Me si nou esper seki nou pankor ena, nou atann avek boukou pasians.

²⁶Dan mem manier Lespri vinn ed nou dan nou febles, parski nou pa konn priye kouma bizin, me Lespri limem intersed pou nou par bann soupir ki pa kapav exprime par okenn parol.

²⁷Bondie ki kapav lir dan nou leker, li kone ki ena dan panse Lespri, parski Lespri intersed pou bann krwayan dapre volonte Bondie.

²⁸Nou kone ki Bondie pou servi tou kiksoz pou bienet bann dimoun ki kontan li, ki li finn apele dapre so plan.

²⁹Bondie finn met apar bann ki li ti finn swazire davans pou vinn kouma so Garson, pou ki li premie-ne parmi enn kantite frer.

³⁰Sa bann ki Bondie ti swazire davans, li ti osi apel zot; bann ki li ti apele, li finn zistifie zot; bann ki li ti zistifie, li finn glorifie zot.

³¹Alor ki nou kapav dir lor sa size la? Si Bondie avek nou, ki sannla kapav kont nou?

³²Li pa finn epargn so prop Garson, me finn livre li pou nou; si li pe donn nou so prop garson, eski li pa pou donn nou tou seki bizin par so lagras?

³³Ki sannla kapav met sarz lor seki Bondie finn swazire davans? Bondie limem deklar zot pa koupab!

³⁴Ki sannla kapav kondann zot? Personn. Parski Lekris limem ki ti mor, me plis ki sa, li finn resisite e li adrwat Bondie pou intersed pou nou.

³⁵Ki sannla kapav separ nou ar lamour Lekris? Eski lasoufrans kapav fer sa, oubien langwas, persekision, faminn, lamizer, danze, oubien lamor?

³⁶Parey kouma finn ekrir: “Akoz twa nou dan danze lamor toulezour, tret nou kouma mouton ki pou egorze dan labousri.”

³⁷Me dan tousala, nou plis ki vinker par Sa-Enn ki finn kontan nou la.

³⁸Wi, mo ena lasirans ki ni lamor, ni lavi, ni bann anz, ni lezot pouvwar dan lesiel, ni letan prezan, ni lavenir,

³⁹ni bann lafors lao, ni bann lafors anba, ni okenn lot kiksoz dan kreasion, kapav separ nou ar lamour ki Bondie ena pou nou dan Kris Zezi nou Segner.