Read Morisien 1 Ko 1 Bible Online

1 Ko 1 - Morisien bible

1 Ko 1

¹Mwa Pol, ki Bondie finn swazire, par so volonte, pou vinn enn apot, ansam avek nou frer Sostenn,

²Mo pe ekrir legliz Bondie ki dan Korint, zot ki finn apele pou vinn lepep Bondie, ki li finn met apar pou li dan Zezi Kris, ansam ar lezot ki partou pe invok nom Segner Zezi Kris, zot Segner ek nou Segner.

³Mo souet zot lagras ek lape ki sorti kot nou Papa Bondie ek Lesegner Zezi Kris.

⁴Mo toultan dir Bondie mersi pou zot akoz sa lagras ki li finn donn zot dan Zezi Kris.

⁵Dan linion avek Lekris, zot finn vinn ris dan tou kiksoz, zot ena don laparol ek konesans.

⁶Temwagnaz ki nou finn rann lor Lekris finn bien ankre dan zot.

⁷Zot pa mank okenn don ki Lespri Bondie done pandan ki zot pe atann Lesegner Zezi Kris aparet.

⁸Li pou gard zot ferm ziska lafin, koumsa pa pou ena okenn repros kont zot sa zour kan Zezi Kris retourne la.

⁹Bondie ki finn apel zot pou viv enn kominion ar so Garson Zezi Kris, sa Bondie la li fidel.

¹⁰Dan nom nou Segner Zezi Kris, mo fer enn lapel pouki zot tou res dakor ant zot, pouki pena okenn divizion parmi zot e ki zot bien ini dan enn sel panse ek enn sel konviksion.

¹¹Bann pros fami Kloe finn inform mwa ki ena rivalite parmi zot.

¹²Ala seki mo pe rod dir zot: ena pe dir, “Mo swiv Pol”; enn lot dir, “Mo swiv Apolos”; enn lot ki dir, “Mo swiv Kefas[1]”; ankor lezot pe dir, “Mo swiv Lekris.”

¹³Eski Lekris divize? Eski Pol ki finn mor lor lakrwa pou zot? Eski dan nom Pol ki finn batiz zot?

¹⁴Granmersi Bondie mo pa finn batiz personn, apart Krispis ek Gayis,

¹⁵koumsa personn pa kapav dir ki zot finn resevwar batem dan mo nom.

¹⁶A, li vre ki mo finn osi batiz lafami Stefanas; me mo pa krwar ki mo finn batiz lezot dimoun ankor.

¹⁷Lekris pa finn avoy mwa pou batiz dimoun me pou proklam laparol, san servi enn langaz dapre lasazes imin, pouki lamor Zezi lor lakrwa pa perdi so pwisans.

¹⁸Parski mesaz lor lamor Lekris lor lakrwa li enn foli pou seki dan perdision, me pou nou ki Bondie pe sove, sa parol la samem pwisans Bondie.

¹⁹Parski finn ekrir, “Lasazes bann dimoun saz, mo pou detrir, konesans bann koneser, mo pou rezete.”

²⁰Kot dimoun saz ete? Kot dokter lalwa ete? Bann ki fer gran-gran diskour zordi, kot zot? Eski Bondie pa finn rann bet lasazes sa lemonn la?

²¹Bann imin avek tou zot sazes pa finn kapav rekonet Bondie, la kot li finn manifeste so sazes. Akoz sa ki Bondie finn desid pou sov seki krwar par so mesaz swadizan fou.

²²Bann Zwif demann sign, bann Grek rod sazes,

²³me nou, nou proklam Lekris krisifie. Sa li enn mesaz ki kre skandal parmi bann Zwif, ek li enn foli pou bann Grek.

²⁴Me pou bann dimoun ki Bondie finn apele, Lekris limem ki montre sazes Bondie ek pwisans Bondie.

²⁵Foli Bondie pli saz ki sazes bann zom, ek febles Bondie pli for ki lafors bann zom.

²⁶Frer ek ser, pa bliye kisannla zot ti ete, zot ki finn gagn lapel Bondie. Dapre zizman zom, pena boukou saz parmi zot, ni boukou pwisan, pena parmi zot boukou ki sorti dan gran fami inportan.

²⁷Me pou fer bann saz onte Bondie finn swazir kiksoz ki dapre lizie dimoun pena valer. Li finn swazir saki feb dan lemonn pou fer bann pwisan onte.

²⁸Bondie finn swazir seki pli piti, seki meprize, seki mem pa existe, pou fer seki existe vinn nanye ditou,

²⁹pouki personn pa fer fezer devan Bondie.

³⁰Limem lasours zot lavi dan Zezi Kris, ki finn vinn pou nou sazes ki sorti kot Bondie. Lekris rann nou drwat, li met nou apar pou Bondie, limem nou delivrans.

³¹Alors, parey kouma finn ekrir, “Si kikenn anvi vremem fer vantar, ki li montre laglwar Bondie.”