Read Morisien 1 Ko 10 Bible Online

1 Ko 10 - Morisien bible

1 Ko 10

¹Mo bann frer ek mo bann ser Kretien, mo rapel zot ki nou bann anset ti anba proteksion niaz e zot tou ti travers lamer.

²Par sa lexperyans la zot ti komsi batize dan enn lakominion avek Moiz,

³e zot ti manz mem manze spiritiel,

⁴e ti bwar mem labwason spiritiel, parski zot ti bwar dan mem ros spiritiel ki ti pe akonpagn zot; sa ros la ti Lekris limem.

⁵E pourtan Bondie pa ti kontan zot manier fer, akoz sa zot ti perdi zot lavi dan dezer.

⁶Sa finn arive kouma enn lexanp pouki nou pa gagn move dezir dan nou leker kouma bannla.

⁷Pa koumans al ador bann idol kouma ena parmi bannla ti fer. Kouma Lekritir dir, “Lepep ti asize pou manze-bwar, apre zot leve pou diverti.”

⁸Fode pa nou tom dan limoralite sexiel kouma bannla, ek dan enn sel zour venn-trwa mil ant zot ti mor.

⁹Fode pa ki nou teste Lesegner kouma ena parmi bannla ti fer, e zot finn trouv lamor par bann serpan.

¹⁰Fode pa ki zot grogne kouma bann la ti fer, e finn trouv lamor par Anz Lamor.

¹¹Tousa maler la finn ariv bannla kouma enn lexanp pou lezot, e sa finn ekrir pou averti nou parski nou pe viv dan letan kot lafin pe vini.

¹²Alors si to krwar to pe tini ferm, fer atansion ki to pa tonbe.

¹³Tou tantasion ki zot finn gagne li parey kouma seki tou dimoun gagne. Bondie fidel dan so promes ek li pa pou les zot gagn enn tantasion ki zot pa kapav tini. Kan zot pou tante, li pou donn zot enn sime pou sorti ladan.

¹⁴Akoz sa, mo bann kamarad, zot bizin sove devan lidolatri.

¹⁵Mo pe koz ar zot kouma bann dimoun rezonab. Zize zotmem seki mo pe dir.

¹⁶Sa koup benediksion ki nou servi dan lakominion e pouki nou rann gras, eski li pa enn kominion avek disan Lekris, sa? E dipin ki nou kase dan lakominion, eski li pa enn partisipasion dan lekor Lekris, sa?

¹⁷Akoz ena enn sel dipin, nou tou nou enn sel lekor, parski nou tou nou partisip dan enn sel dipin.

¹⁸Anou konsider lepep Izrael; bann ki manz zanimo ki finn sakrifie, eski zot pa dan lakominion avek Bondie pouki sa lotel la finn konsakre?

¹⁹Zot panse ki par sa, mo pe dir ki enn idol ou bien sakrifis ki finn ofer li ena kik valer?

²⁰Non, me mo dir ki bannla pe ofer sakrifis ar demon, pa ar Bondie. Mo pa oule ki zot ena kominion avek bann demon.

²¹Zot pa kapav bwar dan koup ki servi dan seremoni ki ofer demon, ek anmemtan bwar dan koup ki servi dan kominion avek Lesegner. Zot pa kapav partisip dan repa ki servi lor latab Lesegner ek anmemtan manz lor latab demon.

²²Eski nou oule provok zalouzi Lesegner? Zot panse nou pli for ki li?

²³Ena enn koze ki dir, “Nou kapav fer seki nou oule.” Wi, me pa tou kiksoz ki bon. “Nou kapav fer seki nou oule,” wi, me pa tou kiksoz ki konstriktif.

²⁴Fode ki personn pa rod so prop lintere me lintere lezot.

²⁵Zot lib pou manz tou seki vande dan bazar-laviann san bizin poz okenn kestion ki ena pou fer ar konsians,

²⁶parski Lekritir dir, “Lesegner ki propriyeter later ek tou seki ena lor la.”

²⁷Si enn non-krwayan invit twa pou pran enn repa e twa to anvi ale, manz seki li servi twa san poz kestion konsians.

²⁸Me si kikenn dir twa, “Sa manze la finn ofer kouma enn sakrifis,” alor lerla to pa manze, akoz dimoun ki finn fer sa remark la, ek akoz konsians;

²⁹mo pa pe koz to konsians, me konsians lot la. Kifer mo liberte bizin depann lor konsians enn lot?

³⁰Si mo rann gras Bondie pou mo repa, kifer mo bizin gagn kritik lor size sa nouritir pouki mo finn dir mersi Bondie?

³¹Kan zot manze, kan zot bwar, kan zot fer ninport ki kiksoz, toultan fer li pou laglwar Bondie.

³²Viv enn fason ki zot pa kre skandal ni pou bann Zwif ni pou bann Grek ni pou legliz Bondie.

³³Koumsamem mo viv pou fer plezir tou dimoun; olie mo rod mo prop lintere, mo rod lintere tou dimoun pouki zot kapav sap dan pese.