Read Morisien 1 Ko 12 Bible Online

1 Ko 12 - Morisien bible

1 Ko 12

¹Asterla, konsernan bann don spiritiel, mo bann kamarad, mo pale ki zot res dan lignorans.

²Letan zot ti ankor payin, zot ti antrene ver bann idol ki pa koze.

³Mo oule zot kone ki dimoun ki gide par Lespri Bondie pa pou kapav dir, “Zezi li modi.” E personn pa kapav dir, “Zezi li mem Segner,” si li pa gide par Lespri Sin.

⁴Ena enn varyete don, me enn sel Lespri Bondie ki donn sa bann don la.

⁵Ena enn varyete fason servi, me enn sel Segner ki nou servi.

⁶Ena enn varyete aktivite, me enn sel Bondie ki donn sak dimoun kapasite pou fer bann aktivite la.

⁷Sakenn fer lexperyans Lespri Sin dan enn fason pouki sa fer dibien tou lezot.

⁸Lespri Bondie donn enn dimoun enn mesaz ranpli ar sazes, me pou enn lot dimoun mem Lespri donn enn mesaz ranpli ar konesans.

⁹Sa mem Lespri la donn enn dimoun enn gran lafwa, e enn lot li donn pouvwar pou fer gerizon.

¹⁰Mem Lespri donn pouvwar fer mirak, li donn enn lot don profesi, enn lot li donn kapasite disteng ant fos lespri ek vre Lespri, e ankor pou enn lot Lespri Bondie donn kapasite koz diferan langaz ki ena bann son etranz, ek enn lot li gagn pouvwar pou interpret sa bann langaz la.

¹¹Tousala, aktivite enn sel e mem Lespri Bondie, e li akord sakenn enn don diferan dapre so volonte.

¹²Enn lekor, mem si ena plizir manm, li form enn sel linite. Lekris, li parey.

¹³E nou tou, ki nou Zwif ou non-Zwif, esklav ou lib, nou tou finn batize pou form enn sel lekor par mem Lespri, e Bondie finn donn nou tou mem Lespri dan nou leker.

¹⁴Ena boukou parti dan enn lekor. Li pa konpoze par enn sel parti.

¹⁵Si lipie dir, “Parski mo pa enn lame, mo pa fer parti dan lekor,” pa pou otan ki li pa fer parti lekor la.

¹⁶Si zorey dir, “Akoz mo pa enn lizie, mo pa fer parti lekor,” pa pou otan ki li pa fer parti lekor la.

¹⁷Si lekor anantie ti zis lizie, kouma lekor la ti pou tande? Si lekor anantie ti zis enn zorey, kouma lekor la ti pou santi loder?

¹⁸Anrealite, Bondie finn dispoz sak parti dan enn lekor dapre so volonte.

¹⁹Pa ti pou ena lekor si tou ti enn sel parti.

²⁰Ena boukou parti, me enn sel lekor.

²¹Lizie pa kapav dir ar lame, “Mo pa bizin twa!” Latet pa kapav dir ar lipie, “Mo pa bizin twa!”

²²Okontrer, parti lekor ki paret pli feb, samem ki pli neseser;

²³e parti ki nou panse ena mwins loner, samem nou donn plis lestim. Parti ki nou plis pa anvi koze, samem nou tret avek plis respe;

²⁴me parti pli respektab pa bizin sa tretman la. Me Bondie finn dispoz nou lekor dan enn fason ki donn plis loner bann parti ki mank lestim,

²⁵pouki pena divizion dan lekor, me ki sak parti pran swin lezot.

²⁶Si enn parti soufer, tou lezot soufer ar li; si enn gagn loner, tou lezot partaz so lazwa.

²⁷Zot tou fer parti lekor Lekris, e sakenn parmi zot enn manm sa lekor la.

²⁸Bondie finn met tou anplas dan legliz. Premie, li finn met apot, deziem bann profet, trwaziem bann ki responsab pou ansegne, apre bann ki akonplir mirak, apre bann ki kapav geri malad, bann ki ed lezot, bann ki diriz travay legliz, e bann ki koz langaz ki ena parol etranz.

²⁹Eski tou dimoun li enn apot? Eski tou dimoun profet? Eski tou donn lansegnman? Eski tou fer mirak?

³⁰Eski tou ena don gerizon? Eski tou parl anlang? Eski tou donn enn interpretasion sa bann langaz la?

³¹Alor, fixe zot leker lor seki pli inportan. Mo pou montre zot, asterla, ki sime ki pli bon lor tou.