Read Morisien 1 Ko 3 Bible Online

1 Ko 3 - Morisien bible

1 Ko 3

¹Frer, ser; mo pa finn kapav koz ar zot kouma bann dimoun ki ena Lespri, me kouma bann dimoun dan lemonn, kouma bann tibaba dan lafwa Kretien.

²Mo finn donn zot dile, ki pa enn manze solid, parski zot pa ti pare pou sa. Ofet, mem asterla zot pa ankor pare pou siport manze solid.

³Zot ankor viv kouma dimoun dan lemonn. Kan ena zalouzi ek rivalite ant zot, eski zot pa pe konport zot kouma bann dimoun ki dan lemonn? Eski zot pa pe mars dapre tandans imin?

⁴Kan enn dir, “Mo swiv Pol,” enn lot dir, “Mo swiv Apolos,” eski sa pa montre ki zot mars kouma ninport ki imin?

⁵Apre tou, ki Apolos ete? Ki Pol ete? Nou zis bann serviter ki Bondie finn servi pou fer zot gagn lafwa. Sakenn finn servi don ki Lesegner finn konfie li.

⁶Mwa mo finn plant lagrin, Apolos finn aroze, me Bondie ki finn fer pouse.

⁷Alor dimoun ki finn plante ek dimoun ki finn aroze pena linportans, me zis Bondie ki fer tou kiksoz pouse ki konte.

⁸Seki plante ek seki aroze ena enn mem rezon travay, e Bondie pou rekonpans sakenn dapre so travay.

⁹Nou pe travay ansam avek Bondie, e zot, zotmem plantasion Bondie, zotmem konstriksion Bondie.

¹⁰Dapre lagras ki Bondie finn donn mwa, mo finn poz enn fondasion kouma enn arsitek intelizan, me enn lot pe konstrir lor la. Sakenn bizin fer bien atansion manier ki li pe konstrir.

¹¹Personn pa kapav poz enn lot fondasion apar fondasion ki finn fini poze, setadir, Zezi Kris.

¹²Si kikenn batir lor sa fondasion la avek lor, larzan, pier presiez, dibwa, lerb sek oubien lapay,

¹³so travay pou devwale zour zizman dapre valer ki li ena, parski sa zour la tou travay pou vizib par dife. Dife pou teste travay la, dife pou montre seki li vo.

¹⁴Si kikenn finn fer enn travay ki reziste dife, li pou gagn enn rekonpans.

¹⁵Par kont si travay la brile, li pou fer enn gran lapert. Dimoun la pou sove, li, me koumadir li finn travers dife.

¹⁶Zot tou sirman kone ki zot lekor tanp Bondie e ki Lespri Bondie li viv dan zot.

¹⁷Si kikenn detrir tanp Bondie, Bondie pou detrir li, parski tanp Bondie li sin, e zotmem ki sa tanp la.

¹⁸Fode ki personn pa tom dan lerer. Si ena parmi zot krwar ki li saz dapre sistem lemonn, ki li vinn enn fouka dabor pou lerla li vremem vinn enn saz.

¹⁹Lasazes dapre sa lemonn la, li enn foli devan Bondie. Lekritir dir, “Bondie may bann saz dan zot prop riz.”

²⁰Lekritir deklare osi, “Lesegner konn panse bann saz Li kone ki zot pena valer.”

²¹Alor pa batir zot fierte lor bann imin. Zot propriyeter tou kiksoz.

²²Ki li Pol, oubien Apolos, oubien Kefas, ki li lemonn ou lavi ou lamor, prezan ou lavenir, tou kiksoz li pou zot.

²³Me zot, zot apartenir ar Lekris, e Lekris li pou Bondie.