Read Morisien 1 Ko 7 Bible Online

1 Ko 7 - Morisien bible

1 Ko 7

¹Lor kestion ki zot finn ekrir mwa, li bon ki enn zom pa marye.

²Me parski ena otan imoralite, sak zom ti bizin ena so prop fam, e sak fam ena so prop mari.

³Enn mari bizin akonplir devwar maryaz ar so fam, ek fam la osi parey anver so mari.

⁴Lekor fam la pa zis pou li, me pou so mari osi. Parey, enn mari so lekor pa zis pou li, me osi pou so fam.

⁵Pa refiz ena relasion ansam, amwin ki zot dakor pou enn timama pou zot konsakre zot pou lapriyer.

⁶Pa enn lord ki mo pe done, me mo pe fer enn konsesion.

⁷Mo ti pou kontan si tou zom ti kouma mwa. Me sak zom gagn enn don ki Bondie donn li; ena ki gagn enn kalite don, ena ki ena lot don.

⁸Me ar bann ki pa ankor marye e ki bann vev, mo dir zot li bon ki zot res san marye kouma mwa.

⁹Me si zot pa kapav kontrol zotmem, li preferab ki zot marye. Li pli bon ki zot marye, olie ki zot brile ar dezir.

¹⁰Pou seki marye, mo ena enn komannman, pa mwa me Lesegner: enn fam bizin pa kit so mari.

¹¹Me si li kit so mari li bizin res san marye, sinon li bizin rekonsilie ar so mari. Ek enn mari bizin pa kit so fam.

¹²Pou toulezot (pa Lesegner ki dir sa, me mwa) mo dir: si enn frer ena enn fam ki pa krwayan me ki dispoze viv ar li, fode pa ki frer la repous li.

¹³Parey, si enn fam ena enn mari ki pa krwayan e li dispoze viv ar fam la, ki li pa repous mari la.

¹⁴Parski enn mari non-krwayan li sanktifie par so fam e enn fam non-krwayan li sanktifie par so mari. Sinon zot zanfan ti pou inpir, tandi ki la, zot pre ar Bondie.

¹⁵Me, si seki pa krwayan la desid pou kite ale, les li ale. Frer la ou ser la pena okenn lien. Bondie oule ki so zanfan viv dan lape.

¹⁶Ki kone? Apre tou, twa fam krwayan to kapav sov to mari. E twa mari krwayan to kapav sov to fam.

¹⁷Apar sa ka la, sakenn parmi zot bizin kontign viv so lavi dapre seki Bondie finn donn li letan ti apel li. Samem lalwa ki mo finn etablir dan legliz partou.

¹⁸Si kikenn ti finn fer sirkonsizion letan Bondie ti apel li, fode pa li rod kasiet mark sa sirkonsizion la. Si kikenn pa ti finn pratik sirkonsizion letan Bondie ti apel li, fode pa li rod sirkonsizion.

¹⁹Li pa inportan si finn fer ou pa finn fer sirkonsizion. Seki inportan, bizin gard komannman Bondie.

²⁰Sakenn bizin gard kondision dan lakel li ti ete letan Bondie ti apel li.

²¹To ti enn esklav letan Bondie ti apel twa? Ki sa pa trouble twa, me si lokazion prezante, profite pou gagn to liberte.

²²Parski enn esklav ki Lesegner apele li enn zom lib ki depann lor Lesegner; parey, zom lib ki Lekris apele, li so esklav.

²³Finn pey enn gro pri pou aste twa, alors pa vinn esklav bann zom.

²⁴Bann frer ek bann ser, ki sakenn res dan mem kondision kot li ti ete letan Bondie ti apel li.

²⁵Asterla, lor size bann fam ki pa marye, mo pena okenn lord ki Lesegner finn done, me mo donn mo lopinion parski mo enn zom ki merit zot konfians akoz labonte Lesegner.

²⁶Akoz sitiasion kriz ki nou pe viv zordi, li meyer ki zot res kouma zot ete.

²⁷Si to marye, pa rod divors. To pa marye? Pa al rod enn fam.

²⁸Si to rant dan lavi maryaz to pa pe fer pese, e si enn fam ki pa marye desid pou marye, li pa komet pese. Me seki rant dan lavi maryaz, pou fer fas enn kantite difikilte dan sa lemonn la. Samem ki mo pe rod protez zot.

²⁹Seki mo pe rod dir, bann frer ek bann ser, letan ki reste bien tigit. Depi aster bann zom marye bizin viv kouma dir zot pena fam;

³⁰bann ki dan dey komsi zot pa tris; bann ki dan boner komsi zot pa ere; bann ki aste kiksoz, komsi zot pa posed kiksoz la;

³¹bann ki servi seki ena dan sa lemonn la, komsi zot pa gagn profi ladan. Parski sa lemonn la, dan form ki li ete asterla, li pa pou res lontan.

³²Mo ti pou kontan ki zot pena enn sou traka. Enn zom ki pa marye pou konserne par travay Lesegner, li pou rod fer Lesegner plezir,

³³me enn zom marye li preokipe ar zafer lemonn, li rod fer so fam plezir.

³⁴Li partaze ant sa de la. Parey pou enn fam ki pa marye oubien enn zennfi, li pou preokipe ar travay Lesegner, parski li oule devoue li pou Lesegner dan tou seki li fer ek panse. Me enn fam marye preokipe par zafer sa lemonn la, li oule fer plezir so mari.

³⁵Mo pe dir sa pou zot prop dibien, pa pou inpoz enn difikilte lor zot. Mo oule zot viv enn lavi korek ek zot bien devoue pou Lesegner.

³⁶Si kikenn panse ki so fianse avanse dan laz e ki li pa kapav tini, les li marye dapre so lide, li pa pe fer pese.

³⁷Me dimoun ki pena okenn presion lor li, dan so latet tou kiksoz bien kler, dan so leker li finn pran enn desizion bien ferm pou pa ena relasion ar so fianse, sa zom la li pe bien azir.

³⁸Alors, seki marye ar so fianse fer bien, me seki desid pou pa marye, fer pli bien ankor.

³⁹Enn fam atase ar so mari tanki li vivan. Me si mari la mor, fam la lib pou remarye, me avek enn Kretien.

⁴⁰Selma dapre mwa, li pli erez si li res kouma li ete. Sa mo lopinion, e mo panse ki mo ena Lespri Bondie dan mwa.